ຈັບມືພັດທະນາພະລັງງານສີຂຽວໃນລາວ

    ໃນຕອນເຊົ້າຂອງວັນທີ 6 ກໍລະກົດ 2021 ຢູ່ທີ່ຕຶກ 2 ຊັ້ນ 6, ໄດ້ມີພິທີເຊັນສັນຍາການຮ່ວມມືທາງດ້ານວິຊາການກ່ຽວກັບວິທະຍາສາດ ແລະເຕັກໂນໂລຊີສາກົນພະລັງງານສີຂຽວລະຫວ່າງສະຖາບັນສົ່ງເສີມພະລັງງານທົດແທນ, ກະຊວງພະລັງງານ ແລະບໍ່ແຮ່ກັບບໍລິສັດ Power China Kunming Engineering Corporation Limited.

    ໃນພິທີດັ່ງກ່າວໃຫ້ກຽດເປັນປະທານໂດຍທ່ານ ປອ ສີນາວາ ສຸພານຸວົງ, ຮອງລັດຖະມົນຕີກະຊວງພະລັງງານ ແລະບໍ່ແຮ່ ແລະທ່ານ Mr. RUAN CHAO QI ກຳມະການພັກ, ຮອງຫົວໜ້າພະແນກວິທະຍາສາດ ແລະເຕັກໂນໂລຊີ ແຂວງຢຸນນານ ຫົວໜ້າພະແນກກິດຈະການຊ່ຽວຊານຕ່າງປະເທດແຂວງຢຸນນານ, ພ້ອມນັ້ນຍັງມີ ທ່ານ ຈັນໂທ ມີລັດຕະນະແພງ, ຫົວໜ້າສະຖາບັນສົ່ງເສີມພະລັງງານທົດແທນ ແລະທ່ານ Mr. GAO CAI KUN ຮອງຜູ້ອຳນວຍການໃຫ່ຍ, ບໍລິສັດ Power China Kunming Engineering Corporation Limited ແລະ ທ່ານ Mr. ZHU GUO JIN ນັກວິສະວະກອນເອກບໍລິສັດ Power China Kunming Engineering Corporation Limited ແລະມີຜູ້ຕາງໜ້າຈາກບັນດາຫົວໜ້າຫ້ອງການ,ບັນດາກົມ ແລະສະຖາບັນອ້ອມຂ້າງກະຊວງ ເຂົ້າຮ່ວມເປັນສັກຂີພິຍານ. ການເຊັນສັນຍາການຮ່ວມມືທາງດ້ານວິຊາການ (MTC) ລະຫວ່າງສະຖາບັນສົ່ງເສີມພະລັງງານທົດແທນຮ່ວມກັບບໍລິສັດ Power China Kunming Engineering Corporation Limited ກ່ຽວກັບວິທະຍາສາດ ແລະເຕັກໂນໂລຊີສາກົນພະລັງງານສີຂຽວ.

   ໂດຍອີງຕາມແຜນຍຸດທະສາດຂອງການພັດທະນາພະລັງງານທົດແທນຮອດປີ 2025 ລັດຖະບານຈະແນ່ໃສ່ການເພີ່ມສັດສ່ວນການຊົມໃຊ້ພະລັງງານທົດແທນໃຫ້ເຖິງ 30% ຂອງພະລັງງານທີ່ຊົມໃຊ້ທັງໝົດ ແລະສົ່ງເສີມຍານພາຫະນະການນຳໃຊ້ພະລັງງານສະອາດໃຫ້ໄດ້ 1% ຂອງຈໍານວນຍານພາຫະນະທັງໝົດທຽບໃສ່ຂໍ້ມູນປີ 2017. ສະນັ້ນການພັດທະນາພະລັງງານແສງຕາເວັນເປັນອີກພະລັງງານໜື່ງທີ່ນອນໃນແຜນພັດທະນາພະລັງງານທົດແທນ ແລະແຜນພັດທະນາເສດຖະ ກິດ-ສັງຄົມຄັ້ງທີ 8 ຂອງລັດຖະບານໄດ້ກຳນົດວິໃສທັດຄື: ຫັນການພັດທະນາເສດຖະກິດໃຫ້ເປັນອຸດສາຫະກຳ ແລະທັນສະໄໝພ້ອມທັງປົກປັກຮັກສາສິ່ງແວດລ້ອມໃຫ້ເປັນສີຂຽວຕາມທິດທີ່ຍືນຍົງ.

   ການພັດທະນາພະລັງງານທົດແທນໃນປັດຈຸບັນມີທ່າແຮງເພີ່ມຂຶ້ນອັນເນື່ອງມາຈາກການພັດທະນາເຕັກໂນໂລຊີມີການຂະຫຍາຍຕົວເຮັດໃຫ້ລາຄາເຕັກໂນໂລຊີພະລັງ ງານທົດແທນຖືກລົງໄປເລື້ອຍໆ ລວມທັງບັນຫາການປ່ຽນແປງດິນຟ້າອາກາດເຮັດໃຫ້ຫຼາຍປະເທດໄດ້ມີແຜນ ແລະວາງຄາດໝາຍໃນການພັດທະນາພະລັງງານທົດແທນຫຼາຍຂື້ນເພື່ອທົດແທນພະລັງງານທີ່ມາຈາກຟອດຊິວ. ສປປ ລາວ ເປັນປະເທດໜື່ງທີ່ມີທ່າແຮງທາງດ້ານພະລັງງານທົດແທນໂດຍສະເພາະພະລັງງານແສງຕາເວັນເຊິ່ງສາມາດຜະລິດປະສົມປະສານກັບແຫຼ່ງພະລັງງານອື່ນໄດ້ ແລະສົ່ງເສີມໃຫ້ມີການນຳໃຊ້ພາຫະນະທີ່ແລ່ນດ້ວຍໄຟຟ້າໃນ ສປປ ລາວ ໃຫ້ຫຼາຍຂື້ນ ແລະຊ່ວຍຫຼຸດຜ່ອນຜົນກະທົບທາງດ້ານສິ່ງແວດລ້ອມໂດຍສະເພາະແມ່ນມົນລະພິດທາງອາກາດທັງເປັນການສົ່ງເສີມແນວທາງການພັດທະນາຕາມທິດສີຂຽວ ແລະຍືນຍົງຂອງລັດຖະບານ, ແຕ່ເຖິງແນວໃດກໍ່ຕາມທ່າມກາງການເພີ່ມຂຶ້ນຂອງພະລັງງານທົດແທນໃນປັດຈຸບັນການພັດທະນາພະລັງງານທົດແທນໂດຍສະເພາະໄຟຟ້າແສງຕາເວັນ ແມ່ນຍັງມີຂີດຈຳກັດເນື່ອງຈາກວ່າຍັງຂາດລະບຽບການ ແລະມາດຕະຖານໃນການຄຸ້ມຄອງ, ຄວາມຮູ້ຄວາມສາມາດທາງດ້ານວິຊາສະເພາະຂອງພະນັກງງານຍັງມີຈຳ ກັດທັງເຮັດທັງຮຽນຮູ້ໄປພ້ອມໆກັນ.

    ເພື່ອບັນລຸເປົ້າໝາຍ ແລະແກ້ໄຂຂໍ້ຈໍາກັດທັງໝົດທີ່ກ່າວມານັ້ນການຮ່ວມມືກັບ ບໍລິສັດ Power China Kunming Engineering Corporation Limited ແມ່ນມີຜົນປະໂຫຍດຫຼາຍໃຫ້ແກ່ກະຊວງພະລັງງານ ແລະບໍ່ແຮ່ເຊິ່ງຈຸດປະສົງການຮ່ວມມືແມ່ນປັບປຸງບັນດາລະບຽບການ, ຂັ້ນຕອນການກວດກາດ້ານເຕັກນິກທີ່ຕິດພັນກັບພະລັງງານໄຟຟ້າແສງຕາເວັນ ແລະຜະລິດພະລັງງານແບບປະສົມປະສານກັບປະເພດພະລັງງານອື່ນ, ສ້າງແຜນແມ່ບົດກ່ຽວກັບສະຖານີສາກ ລົດໄຟຟ້າດ້ວຍພະລັງງານແສງຕາເວັນ.

แชร์