ໄຊສົມບູນ ປິດຮັບຂໍລົງທຶນໃໝ່ເລື່ອງແຮ່ທາດ

    ໄຊສົມບູນ ແມ່ນອີກໜຶ່ງແຂວງຂອງລາວທີ່ມີຄວາມອຸດົມຮັ່ງມີດ້ວຍຊັບໃນດິນສິນໃນນໍ້າຍ້ອນມີພູຜາປ່າໄມ້ທີ່ສວຍງາມດົກໜາ ແລະແຮ່ທາດມີລາຄານາໆຊະນິດເຮັດໃຫ້ໃນຜ່ານມາບັນດານັກລົງທຶນທັງໃນ ແລະຕ່າງປະເທດຫຼັ່ງເຂົ້າໄປແຂວງດັ່ງກ່າວຢ່າງບໍ່ຂາດສາຍໂດຍສະເພາະແມ່ນດ້ານແຮ່ທາດ.

  ຢ່າງໃດກໍ່ຕາມເມື່ອບໍ່ດົນຜ່ານມານີ້ທ່ານ ໄຊຍະເດດ ວົງສາຣະວັນ ຫົວໜ້າພະແນກແຜນການ ແລະການລົງທຶນແຂວງໃນນາມຜູ້ປະຈຳການກອງເລຂາຄະນະກຳມະການສົ່ງເສີມ ແລະຄຸ້ມຄອງການລົງທຶນແຂວງໄຊສົມບູນອອກແຈ້ງການວ່າ: ໃນປະຈຸບັນແຂວງໄຊສົມບູນແມ່ນໄດ້ປິດຮັບເອກະສານການຂໍລົງທຶນກິດຈະການກ່ຽວກັບແຮ່ທາດໂລຫະທຸກປະເພດຢູ່ແຂວງໄຊສົມບູນນັບແຕ່ວັນທີ 15 ມິຖຸນາ 2021 ເປັນຕົ້ນໄປຍົກເວັ້ນສະເພາະໂຄງການທີ່ໄດ້ຮັບແຈ້ງການເຫັນດີຈາກຄະນະຮັບຜິດຊອບຊີ້ນຳການພັດທະນາເຂດຈຸດສຸມໃຈກາງແລ້ວ ແລະໂຄງການຈຳນວນໜຶ່ງທີ່ແຂວງໄດ້ຈັດບູລິມະສິດໄວ້ແລ້ວ.

    ສ່ວນການລົງທຶນດ້ານກະສິກຳ, ການທ່ອງທ່ຽວ, ພະລັງງານໄຟຟ້າ, ການບໍລິການເຊື່ອມຈອດເຊື່ອມໂຍງ ແລະການສ້າງຕັ້ງໂຮງງານອຸດສາຫະກໍາແມ່ນຍັງສືບຕໍ່ຮັບເອກະສານເພື່ອຄົ້ນຄວ້າອະນຸຍາດລົງທຶນ.

• 08/07/2021