ຄະນະສົ່ງເສີມຄຸ້ມຄອງເຂດເສດຖະກິດເຄື່ອນໄຫວວຽກຢູ່ຈຳປາສັກ

  ໃນວັນທີ 6 ກໍລະກົດ 2021 ຜ່ານມານີ້ທີ່ຫ້ອງວ່າການປົກຄອງແຂວງຈໍາປາສັກໄດ້ມີການຕ້ອນຮັບຄະນະສົ່ງເສີມ ແລະຄຸ້ມຄອງເຂດເສດຖະກິດກະຊວງແຜນການ ແລະການລົງທຶນຂຶ້ນໂດຍໃຫ້ກຽດຕ້ອນຮັບຂອງທ່ານ ປອ. ວິໄລວົງ ບຸດດາຄໍາ ເຈົ້າແຂວງໆຈໍາປາສັກພ້ອມດ້ວຍຄະນະ.

 ໃນໂອກາດດັ່ງກ່າວ ທ່ານນາງ ພັນຈິນດາ ເລັ່ງສະຫວັດ ຮອງຫົວໜ້າຫ້ອງການສົ່ງເສີມ ແລະຄຸ້ມຄອງເຂດເສດຖະກິດພິເສດໄດ້ກ່າວຈຸດປະສົງຂອງການມາເຄື່ອນໄຫວວຽກງານຄັ້ງນີ້ວ່າ: ເພື່ອຕິດຕາມກວດກາ ແລະຊຸກຍູ້ວຽກງານການນໍາເຂົ້າສົ່ງອອກພ້ອມທັງປຶກສາຫາລືຮ່ວມກັບຂະແໜງການທີ່ກ່ຽວຂ້ອງກ່ຽວກັບກົນໄກການຈັດຕັ້ງປະຕິບັດການຂໍເປີດການນໍາໃຊ້ລະບົບໜ່ວຍງານຫ້ອງການບໍລິການປະຕູດຽວຢູ່ທ່າບົກວັງເຕົ່າໃນເຂດເສດຖະກິດພິເສດວົງເຕົ່າ-ໂພນທອງ ແຂວງຈໍາປາສັກ ເພື່ອອໍານວຍຄວາມສະດວກໃນການຕິດຕາມກວດກາສິນຄ້າຂາເຂົ້າ-ຂາອອກຜ່ານແດນຢູ່ໃນເຂດດັ່ງກ່າວ.

    ໃນໂອກາດດັ່ງກ່າວທ່ານເຈົ້າແຂວງໆ ຈໍາປາສັກໄດ້ສະແດງການຕ້ອນຮັບຄະນະສົ່ງເສີມ ແລະຄຸ້ມຄອງເຂດເສດຖະກິດພິເສດກະຊວງແຜນການ ແລະການລົງທຶນທີ່ໄດ້ຕິດຕາມຊຸກຍູ້ວຽກຄຸ້ມຄອງການນໍາເຂົ້າ-ສົ່ງອອກ ແລະ ຄວາມພ້ອມຂອງຫ້ອງການບໍລິການປະຕູດຽວທ່າບົກຢູ່ແຂວງຈໍາປາສັກເຫັນວ່າມາຮອດປະຈຸບັນໄດ້ສໍາເລັດການກໍ່ສ້າງແລ້ວປະມານ 95% ຂອງໜ້າວຽກທັງໝົດ ແລະ ຄາດວ່າຈະເປີດນໍາໃຊ້ເປັນທາງການໃນໄວໆນີ້, ຊຶ່ງເປັນການປະກອບສ່ວນພັດທະນາພື້ນຖານໂຄງລ່າງຄົມມະນາຄົມຂົນສົ່ງ, ການບໍລິການໂລຈິດສຕິກ ແລະການບໍລິການທາງຜ່ານສົ່ງເສີມການດໍາເນີນທຸລະກິດ, ການຄ້າ, ການລົງທຶນ ແລະການບໍລິການຢູ່ແຂວງຈໍາປາສັກ ແລະພາກພື້ນ.

 

แชร์