ລາວ-ຣັດເຊຍ ເພີ່ມທະວີການພົວພັນສອງຝ່າຍຫຼາຍຂົງເຂດ

    ວັນທີ 7 ກໍລະກົດ 2021 ທີ່ນະຄອນຫຼວງວຽງຈັນ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດໄດ້ໃຫ້ກຽດຕ້ອນຮັບ ແລະພົບປະປຶກສາຫາລືກັບ ທ່ານ ເຊຣເກ ລາວະຣົບ ລັດຖະມົນຕີກະຊວງການຕ່າງປະເທດແຫ່ງສະຫະພັນຣັດເຊຍໃນໂອກາດນຳພາຄະນະຜູ້ແທນມາຢ້ຽມຢາມເຮັດວຽກຢູ່ ສປປ ລາວ ລະຫວ່າງວັນທີ 6-7 ກໍລະກົດ 2021.

    ການພົບປະຄັ້ງນີ້, ສອງຝ່າຍທົບທວນຄືນ ແລະຕີລາຄາສູງຕໍ່ການພົວພັນຮ່ວມມືໃນຂອບການຮ່ວມມືສອງຝ່າຍ ແລະຫຼາຍຝ່າຍໃນໄລຍະຜ່ານມາໂດຍໄດ້ຮັບການຮັດເເໜ້ນ ແລະເສີມຂະຫຍາຍຢ່າງຕໍ່ເນື່ອງບົນພື້ນຖານຄວາມເຂົ້າອົກເຂົ້າໃຈ,ການຊ່ວຍເຫຼືອເຊິ່ງກັນ ແລະກັນ,ການພົວພັນມິດຕະພາບ ແລະການຮ່ວມມືອັນເປັນມູນເຊື້ອມາແຕ່ດົນນານໃນປີ 2021 ນີ້ແມ່ນຄົບຮອບ 10 ປີ ແຫ່ງການເປັນຄູ່ຮ່ວມມືຍຸດທະສາດດ້ານຄວາມໝັ້ນຄົງໃນຂົງເຂດອາຊີ-ປາຊີຟິກ. ບົນຈິດໃຈດັ່ງກ່າວ, ສອງຝ່າຍໄດ້ເປັນເອກະພາບກັນເພີ່ມທະວີຊຸກຍູ້ການພົວພັນສອງຝ່າຍໃນຫຼາຍຂົງເຂດເຊັ່ນ: ການຮ່ວມມືດ້ານເສດຖະກິດ-ການຄ້າ,ການລົງທຶນ,ພະລັງງານ, ການສຶກສາ, ການທະຫານ, ວິທະຍາສາດ-ເຕັກໂນໂລຊີ, ການທ່ອງທ່ຽວ ແລະອື່ນໆທີ່ສອງຝ່າຍມີຄວາມສົນໃຈ ແລະມີຜົນປະໂຫຍດຮ່ວມກັນ. 

    ສອງຝ່າຍພ້ອມກັນຕີລາຄາສູງຕໍ່ການຮ່ວມມືໃນຂອບອາຊຽນ-ຣັດເຊຍ, ປີນີ້ແມ່ນຄົບຮອບ 30 ປີ ແຫ່ງການພົວພັນອາຊຽນ-ຣັດເຊຍ ແລະ 25 ປີ ແຫ່ງການເປັນຄູ່ຮ່ວມເຈລະນາ ອາຊຽນ-ຣັດເຊຍ, ຊຶ່ງໄລຍະຜ່ານມາຣັດເຊຍໄດ້ປະກອບສ່ວນຊຸກຍູ້ໃນຂົງເຂດການເມືອງ-ຄວາມໝັ້ນຄົງ, ເສດຖະກິດ ແລະວັດທະນະທຳ-ສັງຄົມຂອງອາຊຽນກໍ່ຄືການຮ່ວມມືຕ້ານການກໍ່ອາຊະຍາກຳຂ້າມຊາດ, ການຄ້າ ແລະການລົງທຶນ, ພະລັງງານ ແລະການຕ້ານໄພພິບັດປະກອບສ່ວນຊ່ວຍໃຫ້ອາຊຽນຮັບມືກັບສິ່ງທ້າທາຍ ແລະມີຜົນດີຕໍ່ການພັດທະນາໃນພາກພື້ນ. ນອກຈາກນີ້, ສອງຝ່າຍຍັງໄດ້ໃຫ້ການສະໜັບສະໜູນເຊິ່ງກັນ ແລະກັນໃນການແກ້ໄຂບັນຫາສາກົນທີ່ພົ້ນເດັ່ນ ແລະສິ່ງທ້າທາຍຕ່າງໆ. ພ້ອມນີ້, ສອງຝ່າຍໄດ້ລົງນາມຮ່ວມກັນໃນແຜນການປຶກສາຫາລືລະຫວ່າງສອງກະຊວງການຕ່າງປະເທດ ລາວ-ຣັດເຊຍ.

    ໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ຍັງໄດ້ຕາງໜ້າໃຫ້ລັດຖະບານແຫ່ງ ສປປ ລາວ ສະແດງຄວາມຂອບໃຈຢ່າງຈິງໃຈຕໍ່ການຊ່ວຍເຫຼືອອັນລໍ້າຄ່າຂອງລັດຖະບານ ແລະປະຊາຊົນຣັດເຊຍທີ່ມີຕໍ່ ສປປ ລາວ ຕະຫຼອດໄລຍະຜ່ານມາໂດຍສະເພາະການຊ່ວຍເຫຼືອສ້າງຊັບພະຍາກອນມະນຸດ ແລະອຸປະກອນເຕັກນິກດ້ານການທະຫານ, ການຊ່ວຍເຫຼືອດ້ານມະນຸດສະທໍາ, ອຸປະກອນການແພດເພື່ອກວດຫາເຊື້ອພະຍາດໂຄວິດ-19 ແລະວັກແຊງ ສະປຸດ ນິກວີ ຂອງຣັດເຊຍ.

    ພ້ອມກັນນີ້, ທ່ານ ເຊຣເກ ລາວະຣົບ ຍັງໄດ້ປະດັບຫຼຽນໄຊມິດຕະພາບໃຫ້ແກ່ທ່ານ ສະເຫຼີມໄຊ ກົມມະສິດ ເພື່ອເປັນການຍ້ອງຍໍສັນລະເສີນຜົນງານທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ສາຍພົວພັນມິດຕະພາບແລະການຮ່ວມມືອັນເປັນມູນເຊື້ອມາຍາວນານລວມທັງການເປັນຄູ່ຮ່ວມມືຍຸດທະສາດລະຫວ່າງລາວ-ຣັດເຊຍ ສືບຕໍ່ໄດ້ຮັບການຮັດແໜ້ນ ແລະເສີມຂະຫຍາຍຢ່າງຕັ້ງໜ້າຕະຫຼອດໄລຍະຊຸມປີຜ່ານມາ.

     ວຽກຢູ່ ສປປ ລາວ ໃນຄັ້ງນີ້, ທ່ານ ເຊຣເກ ລາວະຣົບ ພ້ອມດ້ວຍຄະນະຍັງໄດ້ເຂົ້າຢ້ຽມຂໍ່ານັບ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ແລະທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ.

แชร์