ສະພາກາຊາດໄທ ມອບເຄື່ອງຊ່ວຍເຫຼືອ ໃຫ້ອົງການກາແດງລາວ

  ວັນທີ 5 ມີນາ 2019 ນະຄອນຫຼວງວຽງຈັນ ທີ່ອົງການກາແດງລາວໄດ້ຈັດພິທີມອບ-ຮັບເຄື່ອງຊ່ວຍເຫຼືອຈາກສະພາກາຊາດໄທ ຊຶ່ງໃຫ້ກຽດມອບໂດຍ ທ່ານ ພົນໂທ ດຣ ອຳນາດ ບາຫຼີ ຜູ້ອຳນວຍການສຳນັກງານບັນເທົາທຸກ, ສະພາກາຊາດໄທ ແລະ ກ່າວຮັບຂອງ ທ່ານ ດຣ ກາວີພອນ ສຸດທິ ຫົວໜ້າກອງຊ່ວຍ ເຫຼືອບັນເທົາທຸກອົງການກາແດງລາວ, ມີບັນດາອາສາສະໝັກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

  ການຊ່ວຍເຫຼືອດັ່ງກ່າວເປັນການປະຕິບັດຕາມກອບການຮ່ວມມືລະຫວ່າງອົງການກາແດງລາວ ແລະສະພາກາຊາດໄທຊຶ່ງມີໄລຍະເວລາການຊ່ວຍເຫຼືອແຕ່ປີ 2019-2022 ທີ່ສອງຝ່າຍໄດ້ຮ່ວມລົງນາມເຊັນສັນຍາ, ທັງເປັນການກະກຽມຄວາມພ້ອມໃນການຮັບມືກັບໄພພິບັດ ແລະໃຫ້ການຊ່ວຍເຫຼືອປະຊາຊົນຜູ້ທຸກ ຍາກຂາດເຂີນ, ຜູ້ປະສົບໄພພິບັດຢູ່ ສປປ ລາວ, ໂດຍຜ່ານມາສະພາກາຊາດໄທ ໄດ້ໃຫ້ການຊ່ວຍເຫຼືອປະຊາຊົນຕໍ່ເນື່ອງຫຼວງຫຼາຍເປັນຕົ້ນແມ່ນ: ນໍ້າຖ້ວມປະ ຊາຊົນ ເມືອງສະໜາມໄຊ ເປັນວັດຖຸສິ່ງຂອງເກືອບ 10 ລ້ານບາດ.

 ການຊ່ວຍເຫຼືອຄັ້ງນີ້ປະກອບມີ: ເຮືອກູ້ໄພພ້ອມດ້ວຍເຄື່ອງຈັກ 3 ຊຸດ ມູນຄ່າ 42.120 ໂດລາ, ຄອມພິວເຕີ 55 ຊຸດ ມູນຄ່າ 16.000 ໂດລາ, ເຄື່ອງນຸ່ງຫົ່ມໃໝ່ຈຳນວນ 5.868 ຜືນ ແລະຢາຖູແຂ້ວ 21 ແກັດ ມູນຄ່າ 45.252 ໂດລາ, ລວມມູນ ຄ່າທັງໝົດ 1,03 ແສນໂດລາ.

ໂດຍ: ວົງມະນີ

แชร์