ຕັດຫຍິບລາວຕ້ອງການແຮງງານ ກວ່າ 10 ພັນຄົນ

 ໂດຍ: ບຸນຕຽງ ຈັນທະວົງ 

   ປະຈຸບັນຂະແໜງອຸດສາຫະກໍາຕັດຫຍິບຂອງລາວມີຄວາມຕ້ອງການແຮງງານປະມານ 10.000 ຫາ 15.000 ຄົນ ໂດຍເປີດຮັບທັງຜູ້ທີ່ມີປະສົບການ ແລະບໍ່ທັນມີປະສົບການໃນດ້ານການຕັດຫຍິບມາກ່ອນ.

    ທ່ານ ໄຊບັນດິດ ຣາຊະພົນ, ປະທານສະມາຄົມອຸດສາຫະກຳຕັດຫຍິບລາວໃຫ້ສໍາພາດວ່າ: ຈຳນວນແຮງງານທີ່ຕ້ອງການທັງໝົດນີ້ຈະປະກອບເຂົ້າໃນໂຮງງານຕັດຫຍິບຢູ່ເຂດເສດຖະກິດພິເສດຫຼາຍກວ່າໝູ່ເພາະເປັນໂຮງງານຂະໜາດໃຫຍ່ທີ່ມີຄວາມຕ້ອງການແຮງງານເປັນຈໍານວນຫຼາຍ, ນອກຈາກນີ້ຈະປະກອບເຂົ້າໃນໂຮງງານຕັດຫຍິບຕ່າງໆ ໃນນະຄອນຫຼວງວຽງຈັນຕາມຄວາມຕ້ອງການຕົວຈິງໂດຍເປີດຮັບທັງຜູ້ມີປະສົບການ ແລະ ບໍ່ມີປະສົບການໃນການຕັດຫຍິບມາກ່ອນເພາະມີຫຼາຍຕໍາແໜ່ງງານ.

   ແຕ່ທັງນີ້ມີເງື່ອນໄຂວ່າທຸກຄົນຕ້ອງໄດ້ຜ່ານການກວດກາສຸຂະພາບໂດຍສະເພາະກວດຫາເຊື້ອພະຍາດໂຄວິດ-19 ແລະຕ້ອງສັກວັກແຊງປ້ອງກັນພະຍາດດັ່ງກ່າວຄົບກ່ອນ.

    ຜູ້ທີ່ມີຄວາມສົນໃຈສະໝັກງານສາມາດຕິດຕໍ່ຫາຫ້ອງການແຮງງານ ແລະສະຫວັດດີການເມືອງ ຫຼືພະແນກແຮງງານ ແລະສະຫວັດດີການສັງຄົມແຂວງທີ່ຕົນອາໄສຢູ່ເພື່ອເປັນໃຈກາງປະສານງານຕ່າງໆກັບພາກສ່ວນກ່ຽວຂ້ອງຢູ່ນະຄອນຫຼວງວຽງຈັນ ຫຼື ສາມາດຕິດຕໍ່ຫາສະມາຄົມອຸດສາຫະກຳຕັດຫຍິບລາວໄດ້ໂດຍກົງ.

   ທ່ານ ໄຊບັນດິດ ຣາຊະພົນ ໃຫ້ຮູ້ຕື່ມວ່າ: ສະມາຄົມອຸດສາຫະກຳຕັດຫຍິບລາວຈະຮ່ວມກັບຂະແໜງການທີ່ກ່ຽວຂ້ອງຂອງນະຄອນຫຼວງວຽງຈັນ ເພື່ອຈັດບ່ອນພັກເຊົາໃຫ້ບັນດາແຮງງານຈາກຕ່າງແຂວງທີ່ເດີນທາງເຂົ້າມາສະໝັກງານຢູ່ຈຸດໃດໜຶ່ງ.

  ຫຼັງຈາກນັ້ນຈະໃຫ້ຜູ້ປະກອບການໂຮງງານຕັດຫຍິບໄປສໍາພາດເອົາແຮງງານດ້ວຍຕົນເອງຕາມຄວາມຕ້ອງການຕົວຈິງໃນແຕ່ລະຕໍາແໜ່ງງານທີ່ຕ້ອງການ,ທັງນີ້ເພື່ອແນໃສ່ເຮັດໃຫ້ບັນດາຜູ້ປະກອບການຕັດຫຍິບສາມາດດໍາເນີນກິດຈະການໄດ້ຕໍ່ໄປພາຍໃຕ້ມາດຕະການປ້ອງກັນພະຍາດໂຄວິດ-19 ໃນໂຮງງານຂອງຕົນຕາມທີ່ລັດຖະ ບານວາງອອກຢ່າງເຂັ້ມງວດ.

แชร์