ເຜີຍແຜ່ປຶ້ມຄູ່ມືສື່ມວນຊົນກັບສິດທິເດັກ

    ສະມາຄົມນັກຂ່າວແຫ່ງ ສປປ ລາວ ຮ່ວມກັບກົມສື່ມວນຊົນກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ ແລະອົງການຢູນີເຊັຟປະຈໍາລາວຈັດກອງປະຊຸມເຜີຍແຜ່ເນື້ອໃນປຶ້ມຄູ່ມືສື່ມວນຊົນກັບສິດທິເດັກໃຫ້ສື່ມວນຊົນອ້ອມຂ້າງກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ ແລະຂະແໜງການກ່ຽວຂ້ອງຂຶ້ນໃນຕອນ ເຊົ້າວັນທີ 6 ກໍລະກົດ 2021 ຢູ່ຫໍວັດທະນະທໍາແຫ່ງຊາດ, ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ສະຫວັນຄອນ ຣາຊມຸນຕີຣ ປະທານສະຄົມ ນັກຂ່າວແຫ່ງ ສປປ ລາວ, ມີຜູ້ຕາງໜ້າອົງການຢູນີເຊັຟປະຈໍາລາວ, ຫົວໜ້າກົມ, ຮອງກົມ, ນັກຂ່າວສື່ມວນຊົນມາຈາກສໍານັກຂ່າວຕ່າງໆອ້ອມຂ້າງກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

   ກອງປະຊຸມຜູ້ເຂົ້າຮ່ວມໄດ້ພ້ອມກັນຄົ້ນຄວ້າຄືນກ່ຽວກັບຄວາມເປັນມາຂອງການສ້າງປຶ້ມຄູ່ມື ສື່ມວນຊົນກັບສິດທິເດັກ, ນິຕິກໍາພາຍໃນທີ່ກ່ຽວຂ້ອງກັບປຶ້ມ, ຄໍາແນະນໍາການລາຍງານຂ່າວກ່ຽວກັບເດັກ, ເດັກກັບການຖືກຈໍາແນກ, ເດັກກັບຄອບຄົວທີ່ມີບັນຫາ, ການໃຊ້ເເຮງງານເດັກ, ເດັກທີ່ກ່ຽວຂ້ອງກັບການປະທະກັນດ້ວຍກໍາລັງອາວຸດ, ສຸກຂະພາບຂອງເດັກ ແລະວຽກງານອື່ນໆຊຶ່ງຈະດໍາເນີນເປັນເວລາ 2 ວັນ ລະຫວ່າງວັນທີ 6 ຫາ 7 ກໍລະກົດນີ້.

   ໂອກາດນີ້ ທ່ານ ສະຫວັນຄອນ ຣາຊມຸນຕີຣ ມີຄໍາເຫັນວ່າ: ການຈັດກອງປະຊຸມຄັ້ງນີ້ເພື່ອໃຫ້ຄະນະບັນນາທິການ, ນັກຂ່າວສື່ມວນຊົນລາວລາຍງານຂ່າວກ່ຽວກັບສິດທິເດັກດ້ວຍຄວາມຮັບຜິດຊອບ, ມີຄວາມຖືກຕ້ອງ, ສອດຄ່ອງກັບສົນທິສັນຍາວ່າດ້ວຍສິດທິເດັກ, ກົດໝາຍລະບຽບການ, ຫຼັກການໃນການປົກປ້ອງ, ສົ່ງເສີມສິດທິເດັກພ້ອມທັງຊຸກຍູ້ໃຫ້ເດັກມີບົດບາດໃນສື່ມວນຊົນ ແລະອື່ນໆ.

   ທ່ານ ສະຫວັນຄອນ ຣາຊມຸນຕີຣ ໃຫ້ຮູ້ຕື່ມວ່າ: ນັບແຕ່ປີ 1991 ລັດຖະບານລາວໄດ້ໃຫ້ສັດຕະຍາບັນຕໍ່ສົນທິສັນຍາວ່າດ້ວຍສິດທິເດັກທຸກຂະແໜງການ, ທຸກການຈັດຕັ້ງຢູ່ສູນກາງ ແລະທ້ອງຖິ່ນລ້ວນແຕ່ຫັນເອົາເນື້ອໃນຈິດໃຈຂອງສົນທິສັນຍາວ່າດ້ວຍສິດທິເດັກເປັນນະໂຍບາຍ, ກົດໝາຍ ແລະລະບຽບການຕ່າງໆເຮັດໃຫ້ເດັກລາວໄດ້ປະຕິບັດສິດພື້ນຖານຂອງຕົນຢ່າງຮອບດ້ານໂດຍສະເພາະສິດໃນການຢູ່ລອດ, ສິດໃນການພັດທະນາ ແລະການມີສ່ວນຮ່ວມອື່ນໆໃນນີ້ສະເພາະປຶ້ມສື່ມວນຊົນກັບສິດທິເດັກໄດ້ສັງລວມເອົາບັນຫາສໍາຄັນຕ່າງໆ ທີ່ສອດຄ່ອງກັບສົນທິສັນຍາວ່າດ້ວຍສິດທິເດັກ ແລະ ນິຕິກໍາກ່ຽວຂ້ອງມາຈັດຕັ້ງຜັນຂະຫຍາຍເປັນຄໍາເເນະນໍາການລາຍງານ ເພື່ອໃຫ້ສື່ມວນຊົນລາວທີ່ເຮັດໜ້າທີ່ລາຍງານຂ່າວກ່ຽວກັບເດັກຕ້ອງຄໍານຶງເຖິງສິດທິເດັກຕະຫຼອດເວລາ ແລະອື່ນໆ.

ສະໜັບສະໜູນໂດຍ: HONDA

แชร์