ສ.ເກົາຫຼີ ຊ່ວຍອຸປະກອນແພດລາວສູ້ໂຄວິດ

   ພິທີມອບເຄື່ອງຊ່ວຍເຫຼືອຕ້ານການລະບາດຂອງພະຍາດໂຄວິດ-19 ປະກອບມີນໍ້າເຄມີກວດຫາເຊື້ອ ແລະອຸປະກອນການແພດມູນຄ່າ 1 ແສນກວ່າໂດລາສະຫະລັດ ຈາກລັດຖະບານ ສ. ເກົາຫຼີ ແກ່ລັດຖະບານ ສປປ ລາວ ໄດ້ຈັດຂຶ້ນໃນວັນທີ 5 ກໍລະກົດ 2021 ທີ່ກະຊວງສາທາລະນະສຸກເຂົ້າຮ່ວມມີ ທ່ານ ບຸນແຝງ ພູມມະໄລສິດລັດຖະມົນຕີກະຊວງສາທາລະນະສຸກ ແລະຄະນະຝ່າຍ ສ.ເກົາຫຼີ ມີທ່ານ ມູຮົງ ອິມ ເອກອັກຄະລັດຊະທູດ ສ. ເກົາຫຼີ ປະຈໍາສປປ ລາວ ແລະຄະນະ.

    ທ່ານ ເອກອັກຄະລັດຊະທູດ ສ. ເກົາຫຼີ ກ່າວວ່າ: ກ່ອນໜ້ານີ້, ລັດຖະບານ ສ.ເກົາຫຼີ ໄດ້ໃຫ້ການຊ່ວຍເຫຼືອຕູ້ເກັບຕົວຢ່າງກໍລະນີສົງໄສ ແລະວັດຖຸອຸປະກອນການ ແພດຈໍານວນໜຶ່ງແກ່ ສປປ ລາວ ເພື່ອນໍາໃຊ້ເຂົ້າໃນການຕອບໂຕ້ພະຍາດໂຄວິດ-19 ໄປແລ້ວ, ພາຍຫຼັງມີການແຜ່ລະບາດຮອບທີ 2 ຢູ່ ສປປ ລາວ ນັບແຕ່ເດືອນເມສາຂອງບີນີ້ເປັນຕົ້ນມາລັດຖະບານ ເກົາຫຼີ ກໍ່ໄດ້ເພີ່ມການຊ່ວຍເຫຼືອແກ່ ສປປ ລາວ ອີກໂດຍໄດ້ຊ່ວຍເຫຼືອອຸປະກອນການແພດສໍາລັບກວດຫາເຊື້ອໃຫ້ກ່ອນ, ເນື່ອງຈາກວ່າການກວດຫາເຊື້ອສໍາລັບກໍລະນິສົງໄສເປັນບັນຫາທີ່ສໍາຄັນອັບດັບໜຶ່ງໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຊຶ່ງ ສ.ເກົາຫຼີ ໄດ້ມີບົດຮຽນຜ່ານມາແລ້ວ.

   ໂຊກດີທີ່ໃນປະຈຸບັນຍັງມີການບໍລິການຖ້ຽວບິນໄປມາລະຫວ່າງ ສປປ ລາວ ແລະ ສ.ເກົາຫຼີ ເດືອນລະ 2-3 ຖ້ຽວ ຈຶ່ງສາມາດຂົນສົ່ງບັນດາອຸປະກອນກວດຫາເຊື້ອໂຄວິດ-19 ແລະເຄື່ອງເກັບຕົວຢ່າງ ຈໍານວນ 58 ພັນຊຸດ ຄັ້ງນີ້ມາເຖິງ ສປປ ລາວ ໄດ້ຢ່າງໄວວາ.

   ພາຍໃຕ້ບົດຮຽນການຕອບໂຕ້ພະຍາດໂຄວິດ-19 ທີ່ໄດ້ຮັບຜົນສໍາເລັດຢູ່ໃນ ສ.ເກົາຫຼີ ບວກໃສ່ກັບການເພີ່ມທະວີສັກວັກແຊງປ້ອງກັນໂຄວິດ-19 ເປັນວົງກວ້າງແກ່ປະຊາຊົນຢູ່ສອງປະເທດ, ຂ້າພະເຈົ້າຫວັງວ່າໃນອະນາຄົດບໍ່ດົນໃນຕໍ່ໜ້ານີ້ປະຊາຊົນສອງຊາດລາວ-ເກົາຫຼີ ຈະສາມາດກັບຄືນມາຢ້ຽມຢາມເຊິ່ງກັນ ແລະກັນໄດ້ຄືກັບເມື່ອກ່ອນຊຶ່ງຈະປະກອບສ່ວນເຂົ້າໃນການສ້າງຄວາມຈະເລີນຮຸ່ງເຮືອງແກ່ສອງປະເທດ.

   ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກກ່າວວ່າ: ຂ້າພະເຈົ້າສະແດງຄວາມຍິນດີຕາງໜ້າໃຫ້ລັດຖະບານ ແຫ່ງ ສປປ ລາວກໍ່ຄືຂະແໜງສາທາລະນະສຸກ ແລະຂໍສະແດງຄວາມຂອບໃຈທ່ານ ມູຮົງອິມ ເອກອັກຄະລັດຊະທູດ ສ.ເກົາຫຼີ ປະຈໍາ ສປປ ລາວ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້, ຂ້າພະເຈົ້າຕີລາຄາການຊ່ວຍ ເຫຼືອຂອງ ສ. ເກົາຫຼີ ໃນໄລຍະຜ່ານມາ ກ່ໍຄືໃນຄັ້ງນີ້ ແມ່ນຕອບສະໜອງຄວາມ ຮຽກຮ້ອງຕ້ອງການທີ່ມີຄວາມຈໍາເປັນໃນການນໍາໃຊ້ອຸປະກອນ ແລະນໍ້າຢາກວດຫາເຊື້ອພະຍາດໂຄວິດ-19 ຢູ່ລາວ, ການຕິດເຊື້ອຢູ່ພາຍໃນປະເທດມີທ່າອ່ຽງຫຼຸດລົງ ແລະສາມາດຄວບຄຸມໄດ້ແຕ່ການຕິດເຊື້ອນໍາເຂົ້າຍັງມີລັກສະນະເພີ່ມຂຶ້ນໃນແຕ່ລະວັນ, ສະນັ້ນພວກເຮົາຈໍາເປັນຕ້ອງກຽມພ້ອມທັງນໍ້າຢາເຄມີ ແລະອຸປະກອນການແພດສໍາລັບກວດວິເຄາະຫາເຊື້ອການຊ່ວຍເຫຼືອຂອງ ສ.ເກົາຫຼີ ໃນຄັ້ງນີ້ແມ່ນມີຄຸນຄ່າສູງສໍາລັບ ສປປ ລາວ.

ຂ່າວ: ເຂີຍຫຼ້າ  

แชร์