ເລີ່ມສ້າງອາຄານກອງບັນຊາການທະຫານອາກາດ

     ບໍ່ດົນຜ່ານມານີ້ໄດ້ມີພິທີວາງສີລາລືກກໍ່ສ້າງອາຄານ, ສໍານັກງານກອງບັນຊາການທະຫານອາກາດໂດຍການເຂົ້າຮ່ວມເປັນປະທານຂອງທ່ານ ພົນຕີ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ, ມີທ່ານ ພົນຈັດຕະວາ ຄໍາເຫຼັກ ແສງພະຈັນ ຜູ້ບັນຊາການທະຫານອາກາດ, ທ່ານ ພັນເອກ ພິເສດ ຫຼີປິ້ງ ທີ່ປຶກສາທູດຝ່າຍປ້ອງກັນຊາດ ສປ ຈີນ ປະຈໍາລາວ, ທ່ານ ນາງ ສຸ້ຍ ຈີ້ໝີງ ຄະນະບໍລິຫານກຸ່ມບໍລິສັດຟຣອນທີເອີຜູ້ຮັບເໝົາກໍ່ສ້າງພ້ອມດ້ວຍພະນັກງານທີ່ກ້ຽວຂ້ອງທັງສອງ ຝ່າຍເຂົ້າຮ່ວມ.

   ໃນພິທີ ທ່ານ ພົນຈັດຕະວາ ຄໍາເຫຼັກ ແສງພະຈັນ ຜູ້ບັນຊາການທະຫານອາກາດໄດ້ກ່າວວ່າ: ໂຄງການກໍ່ສ້າງອາຄານກອງບັນຊາການທະຫານອາກາດຄັ້ງນີ້ເປັນຈຸດເລີ່ມຕົ້ນ ແລະ ເປັນສັນຍານທີ່ດີຕໍ່ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວເຮົາກໍ່ຄືກອງບັນຊາການທະຫານອາກາດໃນການເປັນເຈົ້າປ້ອງກັນນ່ານຟ້າຕາມແນວທາງນະໂຍບາຍທີ່ພັກ ແລະລັດຖະບານໄດ້ກໍານົດໄວ້ນັ້ນຄື: ຫັນກອງທັບເຂົ້າສູ່ແບບແຜນທັນສະໄໝສາມາດຮັບໃຊ້ການບິນ ແລະບິນສູ້ຮົບປົກປັກຮັກສານ່ານຟ້າຂອງ ສປປ ລາວ; ການກໍ່ສ້າງອາຄານ, ສໍານັກງານກອງບັນຊາການທະຫານອາກາດໃນຄັ້ງນີ້ແມ່ນການຊ່ວຍເຫຼືອຮ່ວມມືລະຫວ່າງ ສປປ ລາວ- ສປ ຈີນ, ສໍາລັບກອງບັນຊາການທະຫານອາກາດກອງທັບປະຊາຊົນລາວ ແລະບໍລິສັດຟຣອນທີອີ ແຫ່ງ ສປ ຈີນ ຜ່ານມາເຄີຍໄດ້ພົວພັນຮ່ວມມືນໍາກັນມາແລ້ວ ແລະ ໄດ້ລົງນາມເຊັນບົດບັນທຶກສັນຍາຮ່ວມກັນໃນໂຄງການກໍ່ສ້າງ, ສໍານັກງານກອງບັນຊາການທະຫານອາກາດ, ມີຄວາມເຂົ້າໃຈເຊິ່ງກັນ ແລະກັນ, ໄວ້ເນື້ອເຊື່ອໃຈກັນ ແລະພ້ອມກັນຜ່ານຜ່າຄວາມຫຍຸ້ງຍາກ. ສະນັ້ນ, ພິທີວາງສີລາລືກໂຄງການກໍ່ສ້າງອາຄານ, ສໍານັກງານກອງບັນຊາການທະຫານອາກາດແມ່ນປະຕິບັດຕາມສັນຍາໄວ້ໃນວັນທີ 22 ທັນວາ 2020 ໃຫ້ປາກົດຜົນເປັນຈິງ.

    ທ່ານ ນາງ ສຸ້ຍ ຈີ້ໝີງ ໄດ້ກ່າວວ່າ: ສປປ ລາວ ແລະ ສປ ຈີນ ເປັນຄູ່ຮ່ວມມືທາງດ້ານຍຸດທະສາດ, ເປັນເພື່ອນທີ່ສະໜິດສະໜົມໃນເສັ້ນທາງການສ້າງສັງຄົມນິຍົມ ນັບແຕ່ບໍລິສັດຟຣອນທີອີ ໄດ້ເຂົ້າມາດໍາເນີນທຸລະກິດຢູ່ ສປປ ລາວ ໃນ ປີ 2017 ບໍລິສັດຟຣອນທີເອີ ໄດ້ເອົາໃຈໃສ່ພົວພັນກັບບັນດາອົງການລັດຖະບານ ແລະພາກ ສ່ວນກ່ຽວຂ້ອງຂອງ ສປປ ລາວ, ໂດຍສະເພາະແມ່ນກະຊວງປ້ອງກັນປະເທດບົນພື້ນຖານການປົກປັກຮັກສາ ແລະເສີມຂະຫຍາຍມິດຕະພາບລາວ-ຈີນອັນເປັນມູນເຊື້ອ, ປະສານກັບກະຊວງປ້ອງກັນປະເທດກໍ່ຄືກອງບັນຊາການທະຫານອາກາດເພື່ອປະກອບສ່ວນເຂົ້າໃນວຽກງານການພັດທະນາຕ່າງຝ່າຍຕ່າງມີຜົນປະໂຫຍດ, ແລະ ສ້າງ ສາພັດທະນາສາຍພົວພັນຄູ່ຮ່ວມມືຮອບດ້ານບົນພື້ນຖານຄວາມໄວ້ເນື້ອເຊື່ອໃຈກັນ, ຊ່ວຍເຫຼືອກັນ ແລະ ມີຜົນປະໂຫຍດຮ່ວມກັນ, ສົ່ງເສີມການຈັດຕັ້ງປະຕິບັດພາລະໜ້າທີ່ທາງດ້ານສັງຄົມຂອງບໍລິສັດ ສປ ຈີນ ຢ່າງເປັນຈິງ, ປະກອບສ່ວນໃນການພັດທະນາສາຍພົວພັນຮ່ວມມືທີ່ດີ, ເພື່ອນມິດທີ່ດີ, ສະຫາຍທີ່ດີ ແລະຄູ່ຮ່ວມເຈລະຈາທີ່ດີຕໍ່ກັນ.

ໂດຍ: ບຸນຊ້ອຍ

แชร์