5 ເດືອນວຽງຈັນເກັບໄດ້ 53 ຕື້ກວ່າກີບ

  ການຈັດຕັ້ງປະຕິບັດແຜນງົບປະມານແຫ່ງລັດກໍ່ຄືມະຕິຂອງສະພາປະຊາຊົນແຂວງວຽງຈັນຮັບຮອງ, ຊຶ່ງນັບແຕ່ເດືອນມັງກອນຫາເດືອນພຶດສະພາ 2021 ພະແນກການເງິນແຂວງວຽງຈັນ, ສາມາດປະຕິບັດລາຍຮັບໄດ້ທັງໝົດ 53,38 ຕື້ກີບ ຫຼືເທົ່າກັບ 24,69% ຂອງແຜນການປີ.

   ທ່ານ ຄຳເຫຼັກ ທອງສະຫວັນ ຫົວໜ້າພະແນກການເງິນແຂວງວຽງຈັນເປີດເຜີຍຫວ່າງບໍ່ດົນມານີ້ວ່າ: ໃນລາຍຮັບເກັບໄດ້ທັງໝົດນັ້ນເປັນພູດສູນກາງ 648 ລ້ານກີບເທົ່າກັບ 15,01% ແລະພູດທ້ອງຖິ່ນປະຕິບັດໄດ້ 52,54 ຕື້ກີບເທົ່າກັບ 24, 89%.

   ທັງນີ້ໝົດປີ 2021 ຄາດຄະເນຈະເກັບໄດ້ 147,27 ຕື້ກີບ ເທົ່າກັບ 68,12% ຂອງແຜນການ (ແຜນການປີ 216,19 ຕື້ກີບ). ໃນນັ້ນ, ພູດສູນກາງຈະເກັບໄດ້ 1 ຕື້ກີບ ເທົ່າກັບ 23,15% ຂອງແຜນການ (ແຜນການ 4,32 ຕື້ກີບ) ແລະພູດທ້ອງຖິ່ນຈະເກັບໄດ້ 146,27 ຕື້ກີບ ເທົ່າກັບ 69,04% ຂອງແຜນການ (ແຜນການ 211,87 ຕື້ກີບ).

   ດ້ານລາຍຈ່າຍໄດ້ເອົາໃຈໃສ່ອະນຸມັດລາຍຈ່າຍເງິນເດືອນຮອດປະຈຸບັນສຳເລັດການເບີກຈ່າຍເງິນເດືອນພຶດສະພາສ່ວນການເບີກຈ່າຍເງິນຮ່ວງບໍລິຫານ ແລະດັດສົມ ກໍ່ໄດ້ແກ້ໄຂໃຫ້ບາງຂະແໜງການທີ່ຈຳເປັນເພື່ອແກ້ໄຂວຽກງານ.

   ສ່ວນເງິນລົງທຶນບ້ວງເລື່ອນ ຈ່າຍປະຕິບັດໄດ້ 79,94% (ແຜນເລື່ອນຈ່າຍ 24,83 ຕື້ກີບ) ແລະ ຈະປະຕິບັດໃຫ້ສຳເລັດໃນ 6 ເດືອນ ຕົ້ນປີ; ສຳລັບບ້ວງລົງທຶນປົກກະຕິປີ 2021 ຍັງບໍ່ທັນໄດ້ຈັດຕັ້ງປະຕິບັດເນື່ອງຈາກບໍ່ທັນໄດ້ຮັບແຈ້ງແຜນຂອງກະຊວງແຜນການ ແລະການລົງທຶນ, ໂດຍລວມແລ້ວການຈັດຕັ້ງປະຕິບັດແຜນງົບປະມານແຂວງວຽງຈັນແມ່ນໄດ້ເອົາໃຈໃສ່ປະຕິບັດຕາມຄຳແນະນຳ ແລະລະບຽບການເປັນຕົ້ນ: ແມ່ນມາດຕະການສະກັດກັ້ນການແຜ່ລະບາດຂອງພະຍາດໂຄວິດ-19.

    ແຕ່ທັງນີ້ເຫັນວ່າມີສິ່ງທ້າທາຍຫຼາຍປະການທີ່ມີຜົນກະທົບເປັນຕົ້ນ: ຂົງເຂດບໍລິການ, ທ່ອງທ່ຽວ, ການຜະລິດຂອງໂຮງຈັກ, ໂຮງງານແມ່ນໂຈະການຜະລິດ ແລະຍັງບໍ່ທັນໄດ້ຮັບການຜ່ອນຜັນໃຫ້ດຳເນີນການເທື່ອ.

  ນອກຈາກນີ້, ຍັງມີຫຼາຍບັນຫາເປັນຜົນກະທົບຕໍ່ລາຍຮັບຂອງແຂວງແຕ່ເຖິງຢ່າງໃດກໍ່ຕາມແຂວງວຽງຈັນຍັງຮັກສາໄດ້ສະຖຽນລະພາບທາງດ້ານເສດຖະກິດ-ສັງຄົມ, ໂດຍສະເພາະແມ່ນໄດ້ຮັບການດູນດ່ຽງຈາກສູນກາງໄດ້ຕາມແຜນການງວດ.

แชร์