ສ່ວຍສາອາກອນ ຊະນະຄາມ ເຜີຍແຜ່ນິຕິກຳໃຫ້ຜູ້ປະກອບການ

  ວັນທີ 30 ມິຖຸນາ 2021 ສ່ວຍສາອາກອນປະຈຳເມືອງຊະນະຄາມ ແຂວງວຽງຈັນ ໄດ້ເປີດກອງປະຊຸມເຜີຍແຜ່ນິຕິກຳຕ່າງໆໃຫ້ຜູ້ປະກອບການຫົວໜ່ວຍທຸລະກິດການຊຶ້-ຂາຍນໍ້າມັນເຊື້ອໄຟຢູ່ພາຍໃນ ເມືອງຊະນະຄາມ ແຂວງວຽງຈັນ ໂດຍໃຫ້ກຽດຂຶ້ນເປັນປະທານຂອງ ທ່ານ ບຸນຊ່ວງ ວັນສີ ຮອງເຈົ້າເມືອງໆຊະນະຄາມຜູ້ຊີ້ນຳວຽກງານເສດຖະກິດແລະວັດທະນະທຳ-ສັງຄົມ, ທ່ານ ຄຳເພັດ ຈອມແກ້ວ ຫົວໜ້າສ່ວຍສາອາກອນປະຈຳເມືອງຊະນະຄາມ, ຫ້ອງການອຸດສາຫະກຳ ແລະການຄ້າ, ພະນັກງານສ່ວຍສາອາກອນ, ແລະບັນດາຜູ້ປະກອບການຫົວ ໜ່ວຍທຸລະກິດການຊື້-ຂາຍນໍ້າມັນເຊື້ອໄຟຢູ່ພາຍໃນເມືອງກໍເປັນກຽດເຂົ້າຮ່ວມຢ່າງພ້ອມພຽງ.

   ໃນກອງປະຊຸມ ທ່ານ ຄຳເພັດ ຈອມແກ້ວ ຫົວໜ້າສ່ວຍສາອາກອນປະຈຳເມືອງຊະນະຄາມໄດ້ຂຶ້ນຜ່ານເອກະສານຕ່າງໆທີ່ສຳຄັນໃຫ້ຜູ້ປະກອບການໄດ້ຮັບຟັງເຊັ່ນ: ເອກະສານໂຄງສ້າງລາຄານໍ້າມັນເຊື້ອໄຟ ສະບັບເລກທີ 0174/ ກຄພນ.ຄສລ, ລົງວັນທີ 9 ມີນາ 2021, ຊຶ່ງໄດ້ກໍານົດການເສຍພັນທະ, ໂດຍສະເພາະອາກອນ ຈາກເມື່ອກ່ອນ 10 ກີບ/ລິດ, ມາເປັນ 26 ກີບ/ຕໍ່ລິດ, ແຈ້ງການ ສະບັບເລກທີ 0175/ກຄພນ. ຄສລ, ລົງວັນທີ 9 ມີນາ 2021 ການປັບຂຶ້ນລາຄານໍ້າມັນຂາຍ ຍ່ອຍນໍ້າມັນເຊື້ອໄຟໃນຂອບເຂດເທສະບານ ແລະເມືອງ, ແຈ້ງ ການສະບັບເລກທີ 0176/ອຄ. ກຄພນ, ລົງວັນທີ 9 ມິນາ 2021 ການປັບລາຄາຂາຍຍ່ອຍນໍ້າມັນ ເຊື້ອໄຟໃນຂອບເຂດທົ່ວປະເທດ, ເອກະສານແຈ້ງການ ສະບັບເລກທີ 1626/ກງ, ລົງວັນທີ 30 ພຶດສະພາ 2019 ກ່ຽວກັບການຄຸ້ມຄອງສາງສິນຄ້ານໍ້າມັນເຊື້ອໄຟ ແລະອາຍແກ໋ດ.

  ຈຸດປະສົງໃນການເປີດກອງປະຊຸມໃນຄັ້ງນີ້ກໍ່ເພື່ອເປັນການເຜີຍແຜ່ແນະນໍານິຕິກໍາຕ່າງໆໃຫ້ແກ່ບັນດາຫົວໜ່ວຍທຸລະກິດ, ໂດຍສະເພາະຫົວໜ່ວຍທຸລະກິດທີ່ດໍາເນີນທຸລະກິດດ້ານການຊື້-ຂາຍນໍ້າມັນເຊື້ອໄຟ ( ປໍ້ານໍ້າມັນໃນທົ່ວເມືອງ) ໃຫ້ມີຄວາມຮັບຮູ້ ແລະເຂົ້າໃຈດ້ານພັນທະຕ່າງໆທີ່ຕິດພັນກັບການຊື້-ຂາຍນໍ້າມັນເຊື້ອໄຟ ແລະຫຼີກລ່ຽງການຊື້ຂາຍນໍ້າມັນເຊື້ອໄຟທີ່ບໍ່ຖືກຕ້ອງ.

   ໃນຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຈາກປະທານກອງປະຊຸມຊຶ່ງທ່ານໄດ້ເນັ້ນໜັກຕໍ່ກັບເນື້ອໃນເອກະສານເປັນຕົ້ນແມ່ນການຈັດເກັບລາຍຮັບຈາກການຈໍາໜ່າຍນໍ້າມັນເຊື້ອໄຟໃນທົ່ວເມືອງຊະນະຄາມໃຫ້ມີຄວາມເປັນເອກະພາບກັນພ້ອມກັນຈັດເກັບ ແລະມອບເຂົ້າງົບປະມານໃຫ້ທັນຕາມກໍານົດເວລາຕາມລະດັບຄາດ ໝາຍ.

แชร์