ປາກຊັນ ມອບຜູ້ຖືກຫາກັບຄືນປະເທດ

    ວັນທີ 29 ມິຖຸນາ 2021 ນີ້ ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ດ່ານສາກົນປາກຊັນ ແຂວງບໍລິຄໍາໄຊ ສປປ ລາວ, ໄດ້ມອບຜູ້ຖືກຫາເຊື້ອຊາດ ແລະ ສັນຊາດໄທ, ຈໍານວນ 1 ຄົນ, ກັບຄືນປະເທດ, ຕາງໜ້າເຈົ້າໜ້າທີ່ຝ່າຍລາວກ່າວມອບໂດຍ ທ່ານ ຮ້ອຍເອກ ຄໍາພັນ ພົມມົນຕີ, ຮອງຫົວໜ້າດ່ານຕໍາຫຼວດກວດຄົນເຂົ້າ-ອອກເມືອງ, ດ່ານສາກົນປາກຊັນ, ຕາງໜ້າເຈົ້າໜ້າທີ່ຝ່າຍໄທກ່າວຮັບໂດຍ ທ່ານ ພັນຕໍາຫຼວດໂທ ທະນະພົນ ໂພທິດາ, ສາລະວັດຕໍາຫຼວດກວດຄົນເຂົ້າ-ອອກເມືອງດ່ານສາກົນບຶງການລາຊະອານາຈັກໄທ, ມີເຈົ້າໜ້າທີ່ຂອງທັງສອງຝ່າຍເຂົ້າຮ່ວມເປັນສັກຂີພິຍານ.

  ເຈົ້າໜ້າທີ່ຕໍາຫຼວດກວດຄົນເຂົ້າອອກເມືອງດ່ານສາກົນປາກຊັນໄດ້ໃຫ້ຮູ້ວ່າ: ຜູ້ຖືກຫາຄື: ທ້າວ ຈະລັດວິສາ ສັກມາຕາ ອາຍຸ 45 ປີ, ອາຊີບຄ້າ-ຂາຍ,ເຊື້ອຊາດ ແລະສັນຊາດໄທ, ຢູ່ບ້ານປາກຄາດ, ເມືອງປາກຄາດ ແຂວງບຶງການ, ລາຊະອານາຈັກໄທ, ຜູ້ກ່ຽວໄດ້ເຂົ້າມາລາວໃນວັນທີ 23 ພຶດສະພາ 2021 ໂດຍໄດ້ຈ້າງຄົນໄທທີ່ໄຫຼມອງຢູ່ເຂດບ້ານປາກຄາດ ເມືອງປາກຄາດ ເເຂວງບຶງການ ປະເທດໄທ ໃຫ້ຂັບເຮືອຈັກຫາງຍາວໄປສົ່ງຢູ່ຝັ່ງລາວໂດຍໃຊ້ຮູບການໄຫຼມອງແບບແອບແຝງຈາກບ້ານຕ້ອນໃຫ່ຍເມືອງລັດຕະນະວາປີ ແຂວງໜອງຄາຍ ຫາບ້ານຫົງທອງ ເມືອງທ່າພະບາດ ແຂວງບໍລິຄໍາໄຊ ແລ້ວກໍ່ໄດ້ຂຶ້ນຢູ່ຈຸດທ່າວັດແຄມຂອງ (ຝັ່ງລາວ) ຕົກມາຮອດວັນທີ 2 ມິຖຸນາ 2021 ເຈົ້າໜ້າທີ່ ປກສ ເມືອງທ່າພະບາດ ໄດ້ລົງກວດກາພົບເຫັນຜູ້ກ່ຽວຢູ່ເຮືອນນາງ ສົມຫຍີງ ບ້ານຫົງທອງ ເມືອງທ່າພະບາດ ແຂວງບໍລິຄໍາໄຊຈາກນັ້ນກໍ່ນໍາຕົວຜູ້ກ່ຽວໄປໃຫ້ຂໍ້ມູນແລ້ວນໍາສົ່ງຕົວໃຫ້ເຈົ້າໜ້າທີ່ຕໍາຫຼວດຄຸ້ມຄອງຄົນຕ່າງປະເທດ ປກສ ແຂວງ, ທ້າວ ຈະລັດວິສາສັກ ມາຕາ ມີເຈດຕະນາລັກລອບເຂົ້າເມືອງຊຶ່ງຜິດຕໍ່ກົດໝາຍສະ ບັບເລກທີ 59/ສພຊ ລົງວັນທີ 26 ທັນວາ 2014 ວ່າດ້ວຍການເຂົ້າ-ອອກເມືອງ ແລະການຄຸ້ມຄອງຄົນຕ່າງປະເທດໃນ ໝວດທີ 9 ຂໍ້ທີ 1, ຜູ້ກ່ຽວມີເຈດຕະນາລັກສ້າງຄອບຄົວກັບພົນລະເມືອງລາວຊຶ່ງຜິດຕໍ່ດໍາລັດເລກທີ 198/ນຍ ລົງວັນທີ 19 ທັນວາ 1994 ວ່າດ້ວຍການແຕ່ງດອງລະຫວ່າງພົນລະເມືອງລາວກັບຄົນຕ່າງປະເທດ ແລະມີເຈດຕະນາ ລະເມີດຕໍ່ຄໍາ ສັ່ງເລກທີ 15/ນຍ ວ່າດ້ວຍການປ້ອງກັນສະກັດກັ້ນ ແລະຕ້ານການແຜ່ລະບາດຂອງພະຍາດໂຄວິດ-19, ໂດຍຜູ້ກ່ຽວໄດ້ຮັບການສືບສວນ-ສອບສວນ ແລະ ດໍາເນີນຄະດີຕາມລະບຽບກົດໝາຍຂອງ ສປປ ລາວ ເປັນທີ່ຮຽບຮ້ອຍແລ້ວ, ຈຶ່ງໄດ້ມອບສົ່ງຜູ້ກ່ຽວໃຫ້ກັບເຈົ້າໜ້າທີ່ຝ່າຍໄທນໍາໄປສຶກສາອົບຮົມບໍ່ໃຫ້ກະທໍາຜິດຕື່ມອີກ.

แชร์