ຄລທ ຄຳມ່ວນຫາລືລົງທຶນໃນແຂວງ

  ວັນທີ 30 ມິຖຸນາ 2021 ຄະນະກຳມະການສົ່ງເສີມ ແລະຄຸ້ມຄອງການລົງທຶນ (ຄລທ) ແຂວງຄຳມ່ວນໄດ້ຈັດກອງປະຊຸມເພື່ອຄົ້ນຄວ້າປຶກສາຫາລືໂຄງການລົງທຶນເອກະຊົນພາຍໃນ-ຕ່າງປະເທດ ແລະບັນຫາຕ່າງໆໃນການລົງທຶນໂດຍການເປັນປະທານຂອງທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນທັງເປັນປະທານ ຄລທ ຂັ້ນແຂວງ, ມີບັນດາທ່ານໃນຄະນະ ຄລທ ຂັ້ນແຂວງ ແລະບັນດາເມືອງອ້ອມຂ້າງເຂົ້າຮ່ວມ.

   ທ່ານ ເດດສັກດາ ມະນີຄຳ ຫົວໜ້າພະແນກແຜນການ ແລະການລົງທຶນແຂວງຫົວໜ້າກອງເລຂາ ຄລທ ແຂວງໄດ້ລາຍງານກ່ຽວກັບໜັງສືສະເໜີເຈດຈຳນົງຂອງບັນດາບໍລິສັດ (ໂຄງການສະເໜີ ໃໝ່) ສຳລັບການຂໍສຳປະທານເນື້ອທີ່ ດິນ ເພື່ອດຳເນີນການສຶກສາສຳຫຼວດ ແລະ ພັດທະນາໂຄງການໃນດ້ານຕ່າງໆຢູ່ພາຍໃນແຂວງຄຳມ່ວນ ລວມເຖິງບັນດາວຽກງານທີ່ໄດ້ຈັດຕັ້ງປະຕິບັດສຳເລັດໂດຍສະເພາະແມ່ນຂັ້ນຕອນ, ລະບຽບການຕ່າງໆໃນການຂໍອະນຸຍາດການສຳປະທານ, ການອອກໃບອະນຸຍາດລົງທຶນ ແລະບັນດາຂໍ້ຄົງຄ້າງທີ່ຈະຕ້ອງໄດ້ສືບຕໍ່ຈັດຕັ້ງປະຕິບັດໂດຍສະເພາະແມ່ນໂຄງການສະເໜີລົງທຶນໃໝ່ໃນຂະແໜງການທ່ອງທ່ຽວຈຳນວນ 2 ຫົວຂໍ້ຄື: ຄຳຮ້ອງຂໍລົງທຶນສຳລັບການສຳປະທານເນື້ອທີ່ເພື່ອສຶກສາ ແລະພັດທະນາໂຄງການແຫຼ່ງທ່ອງທ່ຽວຈຸດຊົມວິວຊານສີດາຢູ່ເມືອງນາກາຍ ແລະໜັງສືສະເໜີເຈດຈຳນົງສະເໜີຂໍສຳປະທານການບໍລິການທ່ອງທ່ຽວພາຍເຮືອລອດຖໍ້າທີ່ຖໍ້ານໍ້າ ຫຼອດເຊບັ້ງໄຟ ເມືອງບົວລະພາ.

   ໂອກາດດຽວກັນບັນດາທ່ານໃນຄະນະ ຄລທ ແຂວງກໍ່ໄດ້ປຶກສາຫາລື ແລະປະກອບຄຳຄິດເຫັນຕາມຫົວຂໍ້ຕ່າງໆທີ່ໄດ້ຍົກຂຶ້ນໃນກອງປະຊຸມໂດຍສະເພາະແມ່ນບັນຫາຄວາມຫຍຸ້ງຍາກ ແລະສິ່ງທ້າທາຍຕໍ່ການພັດທະນາໂຄງການ.

   ທັງນີ້ກໍ່ເພື່ອແນໃສ່ເຮັດໃຫ້ການຈັດຕັ້ງປະຕິບັດຂອງບັນດາໂຄງການລົງທຶນພາກເອກະຊົນທັງພາຍໃນ ແລະຕ່າງປະເທດຢູ່ໃນແຂວງຄຳມ່ວນໄດ້ຮັບການຈັດຕັ້ງປະຕິບັດຢ່າງມີຄວາມສະດວກ,ຖືກຕ້ອງ,ສອດຄ່ອງກັບລະບຽບກົດໝາຍເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງຄຳມ່ວນໃຫ້ບັນລຸຕາມຄາດໝາຍທີ່ວາງໄວ້.

แชร์