ຫາລືຫຼຸດຜ່ອນເຄື່ອງດື່ມມີທາດເຫຼົ້າ

 ກອງປະຊຸມປຶກສາຫາລືແລກປ່ຽນບົດຮຽນການມີສ່ວນຮ່ວມຂອງຫຼາຍພາກສ່ວນໃນການດໍາເນີນງານເພື່ອຕິດຕາມຄວາມຄືບໜ້າຂອງໂຄງການປ້ອງກັນ ແລະຫຼຸດຜ່ອນບັນຫາຜົນກະທົບທີ່ເນື່ອງມາຈາກເຄື່ອງດື່ມທີ່ມີທາດເຫຼົ້າໂດຍຊຸມຊົນ 6 ເດືອນ ຕົ້ນປີ 2021 ແລະ ວາງແຜນ 6 ເດືອນທ້າຍປີສະມາຄົມສົ່ງເສີມສຸຂະພາບຄອບຄົວແຂວງບໍ່ແກ້ວໄດ້ຈັດຂຶ້ນໃນວັນທີ 30 ມິຖຸນາ 2021ນີ້ ທີ່ຫ້ອງປະຊຸມແດນລາວໂດຍການເປັນປະທານຂອງທ່ານ ອານຸສິດ ສັກປະເສີດ ອໍານວຍການສະມາຄົມສົ່ງເສີມສຸຂະພາບຄອບຄົວ ສາຂາແຂວງບໍ່ແກ້ວ, ທ່ານ ດຣ ນາງ ສຸເພັນ ປັນຍາດາ ຮອງຫົວໜ້າພະແນກສາທາລະນະສຸກແຂວງ, ມີຫຼາຍພາກສ່ວນ, ພະແນກການ, ອົງການຈັດຕັ້ງມະຫາຊົນ, ພາກສ່ວນທີ່ກ່ຽວຂ້ອງອ້ອມຂ້າງແຂວງເຂົ້າຮ່ວມ.

   ທ່ານ ອານຸສິດ ສັກປະເສີດ ປະທານກອງປະຊຸມກ່າວວ່າ: ສະມາຄົມສົ່ງເສີມສຸຂະພາບຄອບຄົວແຂວງບໍ່ແກ້ວປະກອບມີ 5 ໂຄງການຄື: ໂຄງການປ້ອງກັນ ແລະຫຼຸດຜ່ອນບັນຫາຜົນກະທົບເນື່ອງມາຈາກເຄື່ອງດື່ມທີ່ມີທາດເຫຼົ້າ, ໂຄງການມີສ່ວນຮ່ວມຂອງອົງການຈັດຕັ້ງສັງຄົມເພື່ອປ້ອງກັນການຕິດຕໍ່ຂອງພະຍາດໂຄວິດ-19, ໂຄງ ການສົ່ງເສີມສິດທິແມ່ຍິງ ແລະເດັກເພື່ອຄຸນນະພາບຊີວິດທີ່ດີ, ໂຄງການສ້າງຄວາມເຂັ້ມແຂງໃຫ້ແກ່ໄວໜຸ່ມ ແລະກິດຈະກໍາການໂຄງສະນາ ແລະ ປ້ອງກັນບັນຫາການຄ້າມະນຸດ. ພ້ອມນັ້ນຍັງໄດ້ຍົກໃຫ້ເຫັນສະພາບການຈັດຕັ້ງປະຕິບັດວຽກງານ 6 ເດືອນຕົ້ນປີ 2021 ເປັນຕົ້ນແມ່ນວຽກງານຊຸມຊົນສະເລ່ຍ 16% ການຂັບເຄື່ອນກິດຈະກໍາໂດຍເຄືອຂ່າຍຄູ່ຮ່ວມງານພາກລັດ ສະເລ່ຍ 45,45%, ການຂັບເຄື່ອນກິດຈະການໂດຍເຄືອຂ່າຍຕູ່ຮ່ວມງານພາກໂຮງຮຽນ ສະເລ່ຍ 75% ແລະກິດຈະກໍາຂອງກຸ່ມໄວໜຸ່ມເສື້ອຂາວສະເລ່ຍ 66,66%.

     ກອງປະຊຸມຜູ້ເຂົ້າຮ່ວມໄດ້ຜັດປ່ຽນກັນປະກອບຄໍາເຫັນຊອກວິທີທາງແກ້ໄຂບັນຫາຂອງສັງຄົມເປັນຕົ້ນແມ່ນການດື່ມເຄື່ອງດື່ມທີ່ມີທາດເຫຼົ້າຂອງເດັກອາຍຸຕໍ່າກວ່າ 18 ປີ. ການໃຊ້ບໍລິການເດັກຮັບແຂກ, ການລະເມີດສິດທິເດັກ, ບົດບາດຍິງຊາຍ, ເດັກກ່ອນໄວຮຽນໂດຍລວມແລ້ວແມ່ນແນໃສ່ເຮັດໃຫ້ທົ່ວສັງຄົມມີຄວາມປອດໄພຈາກເຄື່ອງດື່ມທີ່ມີທາດເຫຼົ້າເພື່ອນັບມື້ຫຼຸດລົງເທື່ອລະກ້າວ, ເຮັດໃຫ້ເຂົາເຈົ້າມີສຸຂະພາບແຂງແຮງ, ຫຼຸດຜ່ອນບັນຫາຜົນກະທົບຈາກທາດເຫຼົ້າໂດຍສະເພາະແມ່ນການເກີດອຸປະຕິເຫດ, ການອາລະວາດຕີກັນ ແລະຫຼຸດຜ່ອນຄ່າໃຊ້ຈ່າຍໃນຄອບຄົວຕື່ມອີກ.

ຂ່າວ-ພາບ: ຄໍາພັນ ແກ້ວມະນີ

แชร์