ບໍລິສັດ ທີ ປະລາສະຕິກ ມອບເຄື່ອງໃຫ້ກູ້ໄພ

   ໃນວັນທີ 30 ມິຖຸນາ 2021 ນີ້ທ່ານ ບຸນລັດ ທະນູສິນ ອຳນວຍການບໍລິສັດ T ປະລາສະຕິກ-ຄອນກຼີດ ຈຳກັດ ພ້ອມດ້ວຍຄອບຄົວໄດ້ນໍາເອົາເຄື່ອງຂອງຮັບໃຊ້ວຽກງານໄປຊ່ວຍເຫຼືອໜ່ວຍກູ້ຊີບ-ກູ້ໄພ ອົງການກາແດງລາວ ແຂວງຫຼວງພະບາງ ເພື່ອອໍານວຍຄວາມສະດວກສະບາຍໃນການເຄື່ອນໄຫວວຽກງານຂອງໜ່ວຍກູ້ໄພ.

 ສໍາລັບເຄື່ອງທີ່ທາງກຸ່ມບໍລິສັດໄດ້ນໍາມາຊ່ວຍເຫຼືອໜ່ວຍກູ້ຊີບ-ກູ້ໄພອົງການກາແດງລາວແຂວງຫຼວງພະບາງຄັ້ງນີ້ປະກອບມີ: ນໍ້າມັນກາຊວນໃສ່ລົດກູ້ໄພຈຳນວນ 100 ລິດຕໍ່ເດືອນ ເປັນໄລຍະເວລາ 1 ປີ, ຜ້າຂາວ 2 ກໍ້ ມູນຄ່າ 1.500.000ກີບ, ຜ້າປິດປາກ-ດັງ 20 ກັບ, ມູນຄ່າ 1 ລ້ານກີບ, ຊຸດກູ້ໄພ 20 ຊຸດ, ມູນຄ່າ 7 ລ້ານກີບ, ເຂົ້າສານ 1 ເປົາ ມູນຄ່າ 390.000 ກີບ.

   ທ່ານ ບຸນລັດ ທະນູສິນ ອຳນວຍການບໍລິສັດ T ປະລາສະຕິກ-ຄອນກຼີດ ຈຳກັດ ຍັງໃຫ້ຮູ້ຕື່ມອີກວ່າໃນຊ່ວງທີ່ແຂວງຫຼວງພະບາງເກີດມີຜູ້ຕິດເຊື້ອພະຍາດໂຄວິດ-19 ນອນປິ່ນປົວຢູ່ໂຮງໝໍແຂວງທາງບໍລິສັດກໍໄດ້ປະກອບສ່ວນຊ່ວຍເຫຼືອອຸປະກອນຮັບໃຊ້ໃຫ້ທາງໂຮງໝໍຈໍານວນໜຶ່ງພ້ອມດ້ວຍເງິນສົດ 15 ລ້ານກີບ. ສໍາລັບການປະກອບສ່ວນຂອງຄອບຄົວຄັ້ງນີ້ແມ່ນເປັນສ່ວນໜຶ່ງທີ່ຊ່ວຍໃຫ້ພະນັກງານຂອງໜ່ວຍກູ້ໄພແຂວງຫຼວງພະບາງສາມາດນໍາໃຊ້ເຂົ້າໃນການປະຕິບັດໜ້າທີ່ຕະຫຼອດ 24 ຊົ່ວໂມງ ເພື່ອຮັບສົ່ງຄົນເຈັບຈາກການເກີດອຸບັດຕິເຫດຕາມທ້ອງຖະໜົນ.

   ສະນັ້ນຈິ່ງຢາກເຊີນຊວນໃຫ້ໝູ່ຄູ່ ແລະທຸກພາກສ່ວນນໍາເອົາເຄື່ອງໄປປະກອບສ່ວນຊ່ວຍເຫຼືອໜ່ວຍກູ້ໄພຂອງແຂວງຫຼວງພະບາງຕື່ມອີກເພາະເຫັນໄດ້ວ່າວຽກງານນີ້ມີຄວາມໝາຍຄວາມສໍາຄັນ ແລະຈໍາເປັນຫຼາຍໃນການປະເຊີນໜ້າຊ່ວຍເຫຼືອຄົນເຈັບຈາກການເກີດອຸບັດຕິເຫດໂດຍບໍ່ຫວັງຜົນຕອບແທນ.

ຂ່າວ: ສີສຸວັນ

แชร์