ໂຮງໝໍກະເສມລາດ ເປີດສິງຫານີ້

    ວັນທີ 29 ມິຖຸນາຜ່ານມາທາງຄະນະໂຮງໝໍກະເສມລາດປະຊຸມເຂັ້ມບໍລິຫານກັບທີມວິສະວະກອນຫຼັງຈາກທົດສອບລະບົບເຄື່ອງມືແພດລະບົບ IT ແລະທຸກລະບົບອື່ນໆພາຍໃນອາຄານໂຮງໝໍກະເສມລາດແລ້ວໃຫ້ແກ້ໄຂວຽກທີ່ເກີດຂຶ້ນຕ້ອງໃຫ້ແລ້ວ100% ກ່ອນໂຮງໝໍເປີດໃຫ້ບໍລິການຄົນໄຂ້ໃນເດືອນສິງຫາ 2021 ທີ່ຈະມາເຖິງນີ້ກຽມພ້ອມຮັບໃຊ້ພໍແມ່ພີ່ນ້ອງພາຍໃນລາວແລະປະເທດໃກ້ຄຽງ.

 ກະເສມລາດໂຮງໝໍທາງເລືອກຂອງປະຊາຊົນລາວທີ່ມັກໄປໃຊ້ບໍລິການຢູ່ໄທຕອນນີ້ກຳລັງສ້າງສຳເລັດໄດ້ກະກຽມບຸກຄະລາກອນເປັນທີ່ຮຽບຮ້ອຍຫຼ້າສຸດໄດ້ທົດລອງເຄື່ອງ ມືອຸປະກອນລະບົບເຄື່ອງມືແພດລະບົບ IT ແລະທຸກລະບົບອື່ນໆພາຍໃນອາຄານໂຮງໝໍກະເສມລາດເພື່ອສຸມໃສ່ແກ້ໄຂວຽກບາງຈຸດທີ່ຍັງບໍ່ທັນລະອຽດກ່ອນເປີດບໍລິການຢ່າງເປັນທາງການ.

   ທ່ານ ນາງ ວາລີ ເວດສະພົງ ຜູ້ຮ່ວມທຶນຝ່າຍລາວໄດ້ໃຫ້ຮູ້ວ່າ: ໂຮງໝໍກະເສມລາດ ອິນເຕີເນຊັ້ນແນວວຽງຈັນ ຊຶ່ງເລີ່ມລົງມືກໍ່ສ້າງມາແຕ່ເດືອນພຶດສະພາ 2018 ແຕ່ດ້ວຍການລະບາດຂອງພະຍາດໂຄວິດ-19 ມາແຕ່ປີ 2020 ເຮັດໃຫ້ໜ້າວຽກ ຫຼາຍຢ່າງບໍ່ເປັນໄປຕາມແຜນຈິ່ງສົ່ງຜົນໃຫ້ກຳນົດການເປີດນຳໃຊ້ບໍລິການຖືກເລື່ອນໄປຫຼາຍຄັ້ງແຕ່ເທື່ອນີ້ຜູ້ຖືຮຸ້ນຝ່າຍລາວຢືນຢັນບໍ່ເລື່ອນອີກແລ້ວ.

  ການກໍ່ສ້າງແບ່ງອອກເປັນ 2 ໄລຍະມີອາຄານທັງໝົດ4 ຫຼັງມີ 38 ຫ້ອງກວດ, ເບື້ອງຕົ້ນຄາດວ່າຈະນຳໃຊ້ແພດໝໍຈາກຕ່າງປະເທດມາປິ່ນປົວຖ່າຍຖອດປະສົບການໃຫ້ແພດໝໍລາວກ່ອນ.

    ໂຮງໝໍກະເສມລາດ ອິນເຕີເນຊັ້ນແນວ ວຽງຈັນ ຕັ້ງຢູ່ບ້ານດອນນົກຂຸ້ມ ເມືອງສີສັດຕະນາກ ນະຄອນຫຼວງວຽງຈັນ, ຊຶ່ງການກໍ່ສ້າງແມ່ນຮັບຮອງມາດຕະຖານຄຸນນະພາບສະຖານພະຍາບານລະດັບສາກົນ ຫຼື JCI ແລະຈາກສະຖາບັນສະຖາປະນິກອາເມລິກາ (AIA), ເຊິ່ງການລົງທຶນໄລຍະທຳອິດໂດຍສຸມໃສ່ການກໍ່ສ້າງ ແລະ ການໃຫ້ບໍລິການທາງດ້ານການປິ່ນປົວນັບຕັ້ງແຕ່ການກວດບົ່ງມະຕິ ແລະການປິ່ນປົວແບບຄົບວົງຈອນດ້ວຍເຄື່ອງມືທີ່ທັນສະໄໝ, ມີແພດໝໍທີ່ຊ່ຽວຊານ ແລະ ມີປະສົບ ການສູງໃນແຕ່ລະດ້ານເພື່ອໃຫ້ມີການບໍລິການທີ່ດີທີ່ສຸດ.

ຂ່າວ: ບຸນນິກ

แชร์