ລາວຕິດໂຄວິດໃໝ່ 20 ຄົນ

    ຄະນະສະເພາະກິດເພື່ອປ້ອງກັນ ຄວບຄຸມ ແລະແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ປະຈຳວັນທີ 29 ມິຖຸນາ ປີ 2021 ໃຫ້ຮູ້ວ່າ: ມາຮອດປະຈຸບັນການລະບາດທົ່ວໂລກມີຜູ້ຕິດເຊື້ອສະສົມທັງໝົດ 182.55 ລ້ານຄົນ, ເສຍຊີວິດທັງໝົດ 3.9 ລ້ານຄົນ ແລະ ປິ່ນປົວຫາຍດີ 168.15 ລ້ານຄົນ ປະເທດທີ່ມີຜູ້ຕິດເຊື້ອ ແລະເສຍຊິວິດຫຼາຍກວ່າໝູ່ແມ່ນສະຫະລັດອາເມລິກາ, ອິນເດຍ ແລະບຣາຊິນ ແລະບັນດາປະເທດທີ່ມີຊາຍແດນຕິດກັບ ສປປ ລາວ.

   ຮອດປະຈຸບັນທົ່ວປະເທດຕົວເລກຜູ້ຕິດເຊື້ອສະສົມທັງໝົດ 2.121 ຄົນ, ໄດ້ກວດວິເຄາະທັງໝົດ 858 ຄົນ, ໃນນັ້ນກວດພົບຜູ້ຕິດເຊື້ອໃໝ່ທັງໝົດ 20 ຄົນ, ໃນ ນັ້ນແຂວງວຽງຈັນ 4 ຄົນ, (ຕິດໃນຊຸມຊົນ), ຈຳປາສັກ 6 ຄົນ, ສະຫວັນນະເຂດ 9 ຄົນ ແລະຄໍາມ່ວນ 1 ຄົນ (ນໍາເຂົ້າ), ກໍາລັງປິ່ນປົວທັງໝົດ 137 ຄົນ.

  ການລະບາດຂອງພະຍາດໂຄວິດ-19 ໃນຮອບໃໝ່ນີ້ຊຶ່ງມີສາເຫດມາຈາກສາຍພັນໃໝ່ສົ່ງຜົນສະທ້ອນໃຫ້ຫຼາຍປະເທດຕ້ອງກັບມາປະຕິບັດມາດຕະການລ໋ອກດາວຄືນມີການປິດເມືອງ, ປິດຮ້ານຄ້າ, ປິດສຳນັກງານຕ່າງໆ, ຈຳກັດການເດີນທາງ, ບາງກິດຈະການຖືກປິດລົງຊົ່ວຄາວເຮັດໃຫ້ແຮງງານຈາກຫຼາຍປະເທດຕ້ອງເດີນທາງກັບຄືນປະເທດຂອງຕົນຊຶ່ງມີຄວາມສ່ຽງສູງທີ່ແຮງງານດັ່ງກ່າວຈະນຳເອົາເຊື້ອເຂົ້າມາແຜ່ລະບາດໃນປະເທດຂອງຕົນ, ໃນນີ້ ສປປ ລາວເຮົາ ໄດ້ກວດພົບສາຍພັນເດວຕ້າເທື່ອທຳອິດຈາກແຮງງານລາວ 3 ຄົນ ທີ່ກັບມາຈາກປະເທດເພື່ອນບ້ານຊຶ່ງສາຍພັນດັ່ງກ່າວແມ່ນກຳລັງລະບາດໃນຫຼາຍປະເທດທົ່ວໂລກ, ສາມາດຕິດເຊື້ອໄດ້ງ່າຍ ແລະ ເສຍຊີວິດໄວກວ່າເກົ່າ; 

  ຕໍ່ກັບສະພາບການດັ່ງກ່າວ, ຈຶ່ງຂໍຮຽກຮ້ອງມາຍັງອຳນາດການປົກຄອງທ້ອງຖິ່ນທຸກຂັ້ນຈົ່ງເຂັ້ມງວດໃນການກວດກາ, ລາດຕະເວນຮັບປະກັນບໍ່ໃຫ້ມີຜູ້ລັກລອບເຂົ້າມາ ສປປ ລາວ ຕາມຊ່ອງທາງທຳມະຊາດ, ຖ້າຫາກທ່ານພົບເຫັນໃຫ້ຮີບຮ້ອນລາຍງານແກ່ເຈົ້າໜ້າທີ່ກ່ຽວຂ້ອງເພື່ອຈະໄດ້ນຳພວກກ່ຽວເຂົ້າໄປຈຳກັດບໍລິເວນ 14 ວັນ ຢູ່ສູນທີ່ຄະນະສະເພາະກິດກຳນົດໄວ້ພ້ອມທັງເກັບຕົວຢ່າງກວດຊອກຫາເຊື້ອ ແລະສາຍພັນ.

แชร์