ຈະປັບປຸງກົດໝາຍແກ້ໄຂຄຳຮ້ອງທຸກ

   (ສພຊ) ໃນຕອນເຊົ້າຂອງວັນທີ 30 ມິຖຸນາ 2021, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ສພຊ) ໄດ້ຈັດກອງປະຊຸມປຶກສາຫາລືກ່ຽວກັບທິດທາງໃນການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກພາຍໃຕ້ການເປັນປະທານຂອງທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດທັງເປັນປະທານກຳມາ ທິການກົດໝາຍເຂົ້າຮ່ວມມີທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ມີບັນດາທ່ານຮອງປະທານກຳມາທິການ,ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະພາກສ່ວນກ່ຽວຂ້ອງເຂົ້າຮ່ວມ.

   ກອງປະຊຸມໄດ້ເຜີຍແຜ່, ຜັນຂະຫຍາຍມະຕິຂອງຄະນະບໍລິຫານງານສູນກາງພັກປະຊາຊົນ ປະຕິວັດລາວ ວ່າດ້ວຍການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍສະບັບເລກ ທີ 037/ຄບສພ, ລົງວັນທີ 18 ມິຖຸນາ 2018 ແລະມະຕິກົມການເມືອງສູນກາງພັກວ່າດ້ວຍການຍົກສູງຄຸນນະພາບການດຳເນີນຄະດີຕາມຂະບວນການຍຸຕິທຳ ສະບັບເລກທີ 112/ກມສພ, ລົງວັນທີ 8 ມິຖຸນາ 2020;ພ້ອມສະເໜີທິດທາງ ແລະປະເດັນໃນການປຶກສາຫາລືແລກປ່ຽນການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກເປັນຕົ້ນຄົ້ນຄວ້າປັບປຸງເນື້ອໃນຂອງກົດໝາຍ ແລະນິຕິກໍາໃຕ້ກົດໝາຍທີ່ພົວພັນເຖິງພາລະບົດບາດ, ສິດ ແລະໜ້າທີ່ຂອງອົງການທີ່ກ່ຽວຂ້ອງໃນການພິຈາລະນາແກ້ໄຂຄໍາຮ້ອງທຸກເພື່ອຮັບປະກັນຄວາມຖືກຕ້ອງຕາມພາລະບົດບາດທີ່ໄດ້ກໍານົດໄວ້ໃນລັດຖະທໍາມະນູນ ແລະກົດໜາຍ.

  ກົດໝາຍວ່າດ້ວຍການແກ້ໄຂຄຳຮ້ອງທຸກໄດ້ຮັບການສ້າງຂຶ້ນໃນປີ 2005; ປັບປຸງຄັ້ງທີໜຶ່ງໃນປີ 2014; ຄັ້ງທີສອງ ໃນປີ 2016 ຊຶ່ງຜ່ານການຈັດຕັ້ງປະຕິບັດກົດ ໝາຍວ່າດ້ວຍການແກ້ໄຂຄຳຮ້ອງທຸກ ສະບັບປີ 2016 ມາເຖິງປະຈຸບັນກໍເປັນເວລາ 5 ປີ.

ຂ່າວ: ກົງທະນູຄຳ ພິພັດເສລີ

แชร์