ປະທານ ສນຊ ພົບປະ ປະທານສະພາທີ່ປືກສາການເມືອງທົ່ວປະເທດຈີນ

     ກອງປະຊຸມພົບປະສອງຝ່າຍແບບທາງໄກໂດຍຜ່ານວິດີໂອຄອນເຟີເຣນ ລະຫວ່າງປະທານສູນກາງແນວລາວສ້າງຊາດ ແລະປະທານສະພາທີ່ປຶກສາການເມືອງທົ່ວປະເທດຈີນ ໄດ້ຈັດຂຶ້ນໃນວັນທີ 29 ມິຖຸນາ 2021 ນີ້ທີ່ສູນກາງແນວລາວສ້າງຊາດ (ສນຊ),ຕາງໜ້າຄະນະປະຈໍາສູນກາງແນວລາວສ້າງຊາດ (ສນຊ) ໂດຍທ່ານ ປອ ສິນລະວົງ ຄຸດໄພທູນ ກໍາມະ ການກົມການເມືອງສູນກາງພັກ, ປະທານ ສູນກາງແນວລາວສ້າງຊາດ ແລະ ຕາງໜ້າສະພາທີ່ປຶກສາການເມືອງທົ່ວປະເທດຈີນໂດຍທ່ານ ຫວັງ ຢາງ ຄະນະປະຈໍາກົມການເມືອງສູນກາງພັກຄອມມູນິດຈີນ, ປະທານສະພາທີ່ປຶກສາການເມືອງທົ່ວປະເທດຈີນພ້ອມດ້ວຍຜູ້ແທນຂອງທັງສອງຝ່າຍເຂົ້າຮ່ວມ.

    ໂອກາດນີ້ທັງສອງຝ່າຍໄດ້ແຈ້ງສະພາບພາຍໃນປະເທດໃຫ້ກັນ ແລະກັນຮັບຊາບ ແລະຕີລາຄາສູງຕໍ່ການພົວພັນຮ່ວມມືລະຫວ່າງສອງພັກສອງລັດໂດຍສະເພາະສູນກາງແນວລາວສ້າງຊາດ ແລະສະພາທີ່ປຶກສາການເມືອງທົ່ວປະເທດຈີນໃນໄລຍະຜ່ານມາ ຊຶ່ງໄດ້ການປະກອບສ່ວນເສີມຂະຫຍາຍສາຍພົວພັນທີ່ເປັນຮູບປະທໍາຫຼາຍດ້ານເປັນຕົ້ນ: ການສ້າງສູນຝຶກອົບຮົມ, ການຊ່ວຍເຫຼືອພາຫະນະ, ຄອມພິວເຕີ ແລະອື່ນໆ. ທັງສອງຝ່າຍກໍໄດ້ມີຄຳເຫັນແລກປ່ຽນບົດຮຽນເຊິ່ງກັນ ແລະກັນເປັນຕົ້ນແມ່ນ: ໝາກຜົນການນໍາພາຂອງພັກທັງສອງປະເທດເຊິ່ງໃນຕອນເຊົ້າທີ່ຜ່ານມາທ່ານ ຫວັງ ຢາງ ໄດ້ເຂົ້າຮ່ວມພິທີມອບຫຼຽນໄຊໃຫ້ແກ່ສະມາຊິກພັກຄອມມູນິດຈີນອາວຸໂສ ແລະ ສປ ຈີນ ຈະໄດ້ຈັດພິທີສະເຫຼີມສະຫຼອງວັນສ້າງຕັ້ງພັກກອມມູນິດຈີນຄົບຮອບ 100 ປີໃນວັນທີ 1 ກໍລະກົດນີ້. ສໍາລັບພັກປະຊາຊົນປະຕິວັດລາວແມ່ນໄດ້ສໍາເລັດກອງປະຊຸມໃຫຍ່ ຄັ້ງທີ XI ຂອງພັກຕົ້ນປີ 2021 ນີ້. ໃນຂົງເຂດວຽກງານສອງອົງການພວກເຮົາແມ່ນໄດ້ປຶກສາຫາລືການເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ, ວຽກງານການປຸກລະດົມ-ຂົນຂວາຍ, ການແລກປ່ຽນຂໍ້ມູນຂ່າວສານກ່ຽວກັບການປະກອບສ່ວນຂອງອົງການແນວໂຮມຕໍ່ພາລະກິດການແກ້ໄຂຄວາມທຸກຍາກດ້ານເສດຖະກິດ-ການເງິນ, ການຮ່ວມມືແກ້ໄຂບັນຫາຢາເສບຕິດ,ການຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19, ການພັດທະນາສູນຝຶກອົບຮົມ ສນຊ ແລະວຽກງານການສ້າງມູນນິທິລາວ-ຈີນ. ພ້ອມກັນນັ້ນ ທ່ານ ຫວັງ ຢາງ ຍັງໄດ້ເຊື້ອເຊີນທ່ານປະທານ ສນຊ ໄປຢ້ຽມຢາມ ສປ ຈີນ ໃນໂອກາດ ທີ່ເໝາະສົມ.

   ສູນກາງແນວລາວສ້າງຊາດ ແລະສະພາທີ່ປຶກສາການເມືອງທົ່ວປະເທດຈີນຈະສືບຕໍ່ຮັກສາບົດບັນທຶກຮ່ວມມືກັນລະຫວ່າງສອງຝ່າຍ ໃນໄລຍະແຕ່ປີ 2019-2024 ເປັນຕົ້ນແມ່ນບັນດາໂຄງການທີ່ໄດ້ລົງນາມມາກ່ອນໃຫ້ໄດ້ຮັບໝາກຜົນ ແລະຈະພ້ອມກັນເສີມຂະຫຍາຍແຜນຍຸດທະສາດແບບຮອບດ້ານ,ໝັ້ນຄົງ, ຍາວນານລະຫວ່າງ ສອງພັກ-ສອງລັດ ກໍຄືປະຊາຊົນສອງຊາດ ລາວ-ຈີນ ໃຫ້ນັບມື້ໄດ້ຮັບການເພີ່ມພູນຄູນສ້າງດ້ວຍຄຸນນະພາບໃໝ່ຢ່າງບໍ່ຢຸດຢັ້ງ.

ຂ່າວ: ສນຊ

แชร์