ລາວຕັ້ງເປົ້າຜະລິດເຂົ້ານາປີ 3 ລ້ານກວ່າໂຕນ

   ຕະຫຼອດໄລຍະຜ່ານມາກະຊວງກະສິກໍາກໍ່ຄືພາກສ່ວນທີ່ກ່ຽວຂ້ອງໄດ້ເອົາໃຈໃສ່ການປູກພືດ-ຜັກຊະນິດຕ່າງໆ ຊຶ່ງໃນປີ 2021-2022 ລາວຄາດໝາຍສູ້ຊົນການຜະລິດເຂົ້ານາປີໃນທົ່ວປະເທດໃຫ້ໄດ້ 7,06 ແສນເຮັກຕາ, ຜົນຜະລິດໃຫ້ໄດ້ 2,94 ລ້ານໂຕນ ແລະ ເຂົ້າໄຮ່ ( ປູກຕາມສວນ, ຕາມວ່າງໄມ້ໃຫ້ໝາກ) ປະມານ 88,73 ພັນເຮັກຕາ, ຜົນຜະລິດ 1,8 ແສນໂຕນ. 

    ຮອດປະຈຸບັນຂະບວນການຜະລິດດັ່ງກ່າວໂດຍສະເພາະເຂົ້າໄຮ່ແມ່ນໄດ້ລົງມືປູກ (ສັກ, ຫວ່ານ) ສຳເລັດເປັນສ່ວນໃຫຍ່ແລ້ວ, ສ່ວນເຂົ້ານາປີແມ່ນຢູ່ໃນຊ່ວງກະກຽມປັດໄຈການຜະລິດ, ກຽມດິນ ແລະ ຕົກກ້າ, ສຳລັບຊາວກະສິກອນທີ່ມີເງື່ອນໄຂເຮັດນາຫວ່ານກໍ່ໄດ້ລົງມືຫວ່ານສ່ວນໃດໜຶ່ງ (ບັນດາຕົວເລກຕົວຈິງແມ່ນກຳລັງເກັບກຳ ແລະວິເຄາະຕົວຈິງ).

  ສ່ວນການປູກພືດຜັກຊະນິດຕ່າງໆມາຮອດປະຈຸບັນຊາວກະສິກອນບັນລຸແຜນໄດ້ 1,59 ແສນເຮັກຕາ ເທົ່າກັບ 105 % ຂອງແຜນການຄາດຄະເນຜົນຜະລິດປະ ມານ 1,26 ແສນໂຕນ. ໃນນັ້ນ, ມີບັນດາພືດທີ່ສຳຄັນທີ່ເປັນສະບຽງໄດ້ແກ່: (1) ສາລີຫວານປູກໄດ້ 13,2 ພັນເຮັກຕາ, ຜົນຜະລິດປະມານ 86,1 ພັນໂຕນ; (2) ພືດຜັກຕ່າງໆປູກໄດ້ 91,02 ພັນເຮັກຕາ, ຜົນຜະລິດປະມານ 7,7 ແສນໂຕນ; (3) ເຜືອກມັນຕ່າງໆ ປູກໄດ້5,6 ພັນເຮັກຕາ, ຜົນຜະລິດ 74,2 ພັນໂຕນ; ແລະ (4) ໝາກໄມ້ຕ່າງໆປູກໄດ້ 20,03 ພັນເຮັກຕາ, ຜົນຜະລິດປະມານ 2,34 ແສນໂຕນ.

   ສໍາລັບເຂົ້ານາແຊງໃນປີ 2021 ແມ່ນສາມາດປູກໄດ້ໃນເນື້ອທີ່ 87,06 ພັນເຮັກຕາ ເທົ່າກັບ 95% ຂອງແຜນ ການປະຈຸບັນເກັບກ່ຽວມ້ຽນມັດຜົນຜະລິດສຳເລັດແລ້ວຜົນຜະລິດທົ່ວປະເທດໄດ້ປະມານ 3,92 ລ້ານໂຕນ (ຕົວເລກຫຼຸດລົງຈາກເດືອນພຶດສະພາ (96%) ຍ້ອນບາງແຂວງສະຫຼຸບຂາດຕົວແລ້ວຕົວຈິງ).

ສາເຫດທີ່ພາໃຫ້ປະຕິບັດໄດ້ແມ່ນຍ້ອນລະບົບຊົນລະປະທານສາມາດຕອບສະໜອງນໍ້າໄດ້, ລາຄາເຂົ້າຢູ່ໃນລະດັບປົກກະຕິ,ຊາວກະສິກອນມີຄວາມຕື່ນຕົວ ແລະບໍ່ສາມາດປະຕິບັດຕາມແຜນໄດ້ຍ້ອນປະຊາຊົນຫັນໄປປູກພືດອື່ນທີ່ເຫັນວ່າໃຊ້ນໍ້າໜ້ອຍ ແລະ ນໍາໃຊ້ຕົ້ນທຶນການຜະລິດທີ່ຕໍ່າກວ່າເປັນຕົ້ນແມ່ນ: ພືດຕະກຸນຖົ່ວ, ໝາກໂມ, ມັນດ້າງ ແລະໝາກອຶ.

แชร์