ປະທານ ສພຊ ໃຫ້ສຳພາດ ກ່ຽວກັບຫໍສະພາແຫ່ງຊາດລາວໃໝ່

   ສະຫາຍ ປອ ໄຊສົມພອນ ພົມວິຫານ, ໃນນາມຕາງໜ້າພັກ, ລັດຖະບານ, ສະພາແຫ່ງຊາດ ແລະປະຊາຊົນລາວບັນດາເຜົ່າ, ສະຫາຍມີຄວາມຮູ້ສຶກເປັນກຽດຢ່າງສູງ ແລະມີຄວາມພາກພູມໃຈເປັນຢ່າງຍິ່ງທີ່ໄດ້ມີໂອກາດຕອບຄໍາສຳພາດກ່ຽວກັບໂຄງການປຸກສ້າງຫໍສະພາແຫ່ງຊາດຫຼັງໃໝ່, ຊຶ່ງສະຫາຍກ່າວວ່າ: ລາວຫວຽດນາມເປັນສອງປະເທດອ້າຍນ້ອງທີ່ມີສາຍພູ ແລະແມ່ນໍ້າຕິດຈອດກັນແຕ່ເໜືອຮອດໃຕ້, ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ແລະ ຫວຽດນາມລາວໂດຍປະທານ ໂຮ່ຈິມິນ ຜູ້ນໍາທີ່ຍິ່ງໃຫຍ່ ແລະ ປະທານໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກຮ່ວມກັນກໍ່ຕັ້ງຂຶ້ນ, ຖະນຸຖະໜອມ ແລະ ໄດ້ຮັບການເພີ່ມພູນຄູນສ້າງຈາກບັນດາຮຸ່ນຄົນຕ່າງໆ, ສອງປະເທດໄດ້ພ້ອມກັນສືບທອດມາເປັນເວລາຫຼາຍທົດສະວັດທັງຢູ່ໃນໄລຍະຕໍ່ສູ້ກູ້ຊາດເພື່ອຍາດເອົາເອກະລາດແຫ່ງຊາດໃນເມື່ອກ່ອນກໍ່ຄືໃນໄລຍະປົກປັກຮັກສາ ແລະພັດທະນາປະ ເທດຊາດໃນປະຈຸບັນ. ພວກຂ້າພະເຈົ້າມີຄວາມຊາບຊຶ້ງທີ່ເຫັນວ່າຕະຫຼອດໄລຍະຫຼາຍສິບປີຜ່ານມາ, ພັກ, ລັດຖະບານ ແລະປະຊາຊົນຫວຽດນາມຍາມໃດກໍ່ມີຄວາມເປັນຫ່ວງເປັນໄຍ, ໃຫ້ການສະໜັບສະໜູນ, ຊ່ວຍເຫຼືອອັນໃຫຍ່ຫຼວງ, ລໍ້າຄ່າ, ທັນການ ແລະມີປະສິດທິຜົນໃຫ້ແກ່ພັກ, ລັດ ແລະປະຊາຊົນລາວພວກຂ້າພະເຈົ້າ, ອັນພິເສດລັດຖະບານຫວຽດນາມກໍ່ຄືປະຊາຊົນຫວຽດນາມໄດ້ໃຫ້ການຊ່ວນເຫຼືອທຶນຮອນອັນຍິ່ງໃຫຍ່ເພື່ອປຸກສ້າງຫໍສະພາແຫ່ງຊາດຫຼັງໃໝ່ດ້ວຍ ມູນຄ່າ 111,75 ລ້ານໂດລາສະຫະລັດ ໂດຍມອບໝາຍໃຫ້ແມ່ທັບນ້ອຍເປັນຜູ້ກໍ່ສ້າງນັບແຕ່ແຕ່ ເດືອນກໍລະກົດ 2018 ເປັນຕົ້ນມາ,ໂຄງການນີ້ແມ່ນຂອງຂວັນອັນລໍ້າຄ່າທີ່ສຸດຂອງພັກ, ລັດ ແລະປະຊາຊົນຫວຽດນາມ ໃຫ້ແກ່ພັກ, ລັດ ແລະປະຊາຊົນລາວ, ເປັນໂຄງການທີ່ມີຄວາມໝາຍສໍາຄັນ, ເປັນສັນຍາລັກ ແລະຕົວແບບແຫ່ງຄວາມສາມັກຄີພິເສດທີ່ມີຊີວິດຊີວາລະຫວ່າງລາວຫວຽດນາມບົນຈິດໃຈ “ເຂົ້າເມັດຫັກຜັກເສັ້ນໜຶ່ງກໍ່ປັນກັນ”. ການກໍ່ສ້າງໂຄງການອັນມີຄວາມໝາຍສໍາຄັນນີ້ໄດ້ດໍາເນີນໄປໃນສະພາບ ການທີ່ທັງສອງປະເທດປະສົບກັບການແຜ່ລະບາດຂອງເຊື້ອພະຍາດໂຄວິດ-19 ກໍ່ຕາມແຕ່ດ້ວຍຄວາມເອົາໃຈໃສ່ຂອງທັງສອງຝ່າຍຈຶ່ງເຮັດໃຫ້ຫໍສະພາແຫ່ງນີ້ເຖິງແມ່ນ ວ່າບໍ່ທັນສຳເລັດຢ່າງສົມບູນແບບ ແຕ່ກໍ່ສາມາດນຳໃຊ້ເຂົ້າໃນການຈັດຕັ້ງກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ໃນເດືອນມີນາຜ່ານມາຢ່າງມີຜົນສໍາເລັດເປັນຢ່າງດີ, ນີ້ກໍ່ເປັນໜຶ່ງໃນຕົວແບບທີ່ຫາຍາກໃນການພົວພັນພິເສດລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມອ້າຍນ້ອງພວກເຮົາ. ຜົນສໍາເລັດຂອງການກໍ່ສ້າງຫໍສະພາແຫ່ງຊາດລາວຫຼັງໃໝ່ແຫ່ງນີ້ໄດ້ມາຍ້ອນຄວາມຮັບຜິດຊອບ ແລະຄວາມຕັດສິນໃຈສູງຂອງຄະນະຮັບຜິດຊອບໂຄງການທຸກຂັ້ນຕະຫຼອດຮອດພະນັກງານ, ຊ່ຽວຊານ, ກໍາມະກອນທຸກຄົນທີ່ໄດ້ສຸມທຸກເຫື່ອແຮງ, ສະຕິປັນຍາ ແລະສີມືອັນປານີດຂອງຕົນໃນການປະຕິບັດໜ້າທີ່ການເມືອງອັນມີກຽດສະຫງ່າ,ໃນການດໍາເນີນໂຄງການກໍສ້າງຫໍສະພາແຫ່ງຊາດລາວທັງເວັນ ແລະຄືນຢ່າງຕັ້ງໜ້າ ແລະບໍ່ຮູ້ອິດຮູ້ເມື່ອຍ. ສະຫາຍໄດ້ຂໍຕີລາຄາສູງທີ່ສຸດຕໍ່ການປະຕິບັດໜ້າທີ່ດັ່ງກ່າວ,ພິເສດແມ່ນກ່ຽວກັບສີມືແຮງງານຂອງຊ່າງ ແລະແຮງງານໃນພາກສະໜາມວ່າມີສີມືທີ່ດີເລີດ, ສາມາດກໍ່ສ້າງຖືກຕ້ອງຕາມການອອກແບບທີ່ເປັນເອກະ ລັກ ແລະລັກສະນະພິເສດຂອງວັດທະນະທຳລາວ. ສາມາດເວົ້າໄດ້ວ່າຫໍສະພາແຫ່ງຊາດລາວຫຼັງໃໝ່ແຫ່ງນີ້ຈະເປັນສະຖານທີ່ເຮັດວຽກທີ່ມີເງື່ອນໄຂອຳນວຍຄວາມສະ ດວກທັນສະໄໝທີ່ສຸດໃຫ້ແກ່ສະມາຊິກສະພາແຫ່ງຊາດ ແລະພະນັກງານທັງໝົດຂອງສະພາແຫ່ງຊາດລາວໃນການປະຕິບັດໜ້າທີ່ການເມືອງຂອງຕົນເປັນຕົ້ນແມ່ນການດໍາເນີນກອງປະຊຸມສະໄໝສາມັນຂອງສະພາແຫ່ງຊາດ, ການຕ້ອນຮັບແຂກພາຍໃນ ແລະ ຕ່າງປະເທດ. ນອກຈາກນີ້, ຫໍສະພາແຫ່ງຊາດແຫ່ງນີ້ຍັງຈະເປັນສະ ຖານທີ່ທັດສະນະສຶກສາໃຫ້ປະຊາຊົນ,ໂດຍສະເພາະແກ່ຮຸ່ນຄົນໜຸ່ມຂອງລາວເພື່ອຮຽນຮູ້ກ່ຽວກັບລະບອບການເມືອງ,ລະບົບການຈັດຕັ້ງ ແລະການເຄື່ອນໄຫວຂອງອົງ ການນິຕິບັນຍັດທີ່ເປັນຕົວແທນແຫ່ງສິດ ແລະຜົນປະໂຫຍດຂອງຕົນ ແລະທັງເປັນບ່ອນຮຽນຮູ້ກ່ຽວກັບມູນເຊື້ອຄວາມສາມັກຄີພິເສດລາວຫວຽດນາມອີກດ້ວຍ.

แชร์