ທນບ ໜ່ວຍສັງທອງ ເດັ່ນວຽກ ອກສກ

   ໃນອາທິດຜ່ານມານີ້, ທີ່ຫ້ອງການທະນາຄານນະໂຍບາຍ (ທນບ) ໜ່ວຍບໍລິການເມືອງສັງທອງ ນະຄອນຫຼວງວຽງຈັນ ທີ່ຂຶ້ນກັບ ທນບ ສໍານັກງານໃຫຍ່ໄດ້ຮັບການ ຍ້ອງຍໍຜົນງານພົ້ນເດັ່ນໃນການສະໜອງສິນເຊື່ອຜ່ານອົງການຈັດຕັ້ງການເມືອງ-ສັງຄົມ ແລະກອງທຶນຂັ້ນບ້ານ (ອກສກ) ຊຶ່ງເປັນໜ່ວຍທໍາອິດຂອງ ທນບ ທົ່ວປະ ເທດທີ່ໄດ້ຍ້ອງຍໍໃນວຽກງານດັ່ງກ່າວໂດຍການໃຫ້ກຽດມອບຂອງ ທ່ານ ວຸດທິ ເລື່ອນວິໄລວົງ ກໍາມະການພັກທະນາຄານແຫ່ງ ສປປ ລາວ, ເລຂາຄະນະພັກຮາກຖານຜູ້ອໍາ ນວຍການໃຫຍ່ ທນບ ໂດຍການກ່າວຮັບຂອງ ທ່ານ ປັນຍາສະໄຫວ ຣັດຖະເສນາ ເລຂາໜ່ວຍພັກ-ຫົວໜ້າ ທນບ ໜ່ວຍບໍລິການເມືອງສັງທອງ ໂດຍຊ້ອງໜ້າພະ ນັກງານ ທນບ ສໍານັກງານໃຫຍ່ ແລະພະນັກງານໜ່ວຍບໍລິການເມືອງສັງທອງ.

 ໃນໂອກາດດັ່ງກ່າວ, ທ່ານຫົວໜ້າ ທນບ ໜ່ວຍບໍລິການເມືອງສັງທອງ ໄດ້ລາຍງານການເຄື່ອນໄຫວວຽກງານ 6 ເດືອນຕົ້ນປີ 2021 ໂດຍຍົກໃຫ້ເຫັນບາງວຽກງານທີ່ພົ້ນເດັ່ນໃນການສະໜອງສິນເຊື່ອຜ່ານ ອກສກ ທີ່ເຮັດທົດລອງໄດ້ 14 ບ້ານ ແລະນັບແຕ່ທ້າຍປີ 2019 ຈົນເຖິງປະຈຸບັນມີຍອດສິນເຊື່ອທັງໝົດ 8 ຕື້ກວ່າກີບ; ໃນໄລຍະ 5 ເດືອນກວ່າ ຜິດດ່ຽງລາຍຮັບ-ລາຍຈ່າຍ ມີຜົນເປັນບວກຫຼາຍຂຶ້ນສາມາດເກັບໜີ້ໄດ້ທັງໝົດ 3,72 ຕື້ກີບ ເທົ່າກັບ 62% ຂອງແຜນການປີ 2021; ພ້ອມນີ້ຍັງໄດ້ສະເໜີແຜນວຽກຈຸດສຸມໃນ 6 ເດືອນທ້າຍປີ 2021 ໂດຍຈະສຸມໃສ່ປ່ອຍເງິນກູ້ເປົ້າໝາຍນາປີໃຫ້ທັນລະດູການຜະລິດ ແລະ ເປົ້າໝາຍອື່ນໆ ລວມວົງເງິນກູ້ທັງໝົດ 13,05 ຕື້ກີບ ທີ່ຂັ້ນເທິງໄດ້ອະນຸມັດແລ້ວ ແລະຈະສືບຕໍ່ຂະຫຍາຍບ້ານທົດລອງປ່ອຍສິນເຊື່ອຜ່ານ ອກສກ ໃນປີນີ້ໃຫ້ໄດ້ຕື່ມອີກ 8 ບ້ານ.

  ທ່ານ ບຸນເພັງ ຄໍາພິລາວົງ ຄະນະພັກ ທນບ, ຫົວໜ້າພະແນກຈັດຕັ້ງ ແລະພະນັກງານໄດ້ຜ່ານຂໍ້ຕົກ ລົງເລກທີ 638/ທນບ ລົງວັນທີ 13 ພຶດສະພາ 2021 ວ່າດ້ວຍການມອບໃບຍ້ອງຍໍ ທນບ ໜ່ວຍບໍລິການເມືອງສັງທອງທີ່ມີຜົນງານດີເດັ່ນໃນວຽກງານການປ່ອຍສິນເຊື່ອຜ່ານ ອກສກ ຊຶ່ງເປັນໜ່ວຍບໍລິການແຫ່ງທໍາອິດທີ່ສາມາດຂະຫຍາຍບ້ານ ອກສກ ໄດ້ຫຼາຍ ແລະປະສົບຜົນສໍາເລັດໃນເບື້ອງຕົ້ນທົ່ວລະບົບ ທນບ ທີ່ໄດ້ຮັບໃບຍ້ອງຍໍດັ່ງກ່າວຈາກຂັ້ນເທິງ.

    ໃນຕອນທ້າຍ, ທ່ານຜູ້ອໍານວຍການໄດ້ໃຫ້ທິດຊີ້ນໍາໂດຍໃຫ້ສືບຕໍ່ເອົາໃຈໃສ່ວຽກງານສຶກສາອົບຮົມການເມືອງ ແນວຄິດໃຫ້ຖັນແຖວສະມາຊິກ ພັກ-ພະນັກງານໃຫ້ມີຄວາມສະຫງົບທາງດ້ານການເມືອງແນວຄິດ;ຮັກສາມູນເຊື້ອຄວາມສາມັກຄີພາຍໃນ ແລະອົງການປົກຄອງທ້ອງຖິ່ນກໍ່ຄືປະຊາຊົນໃຫ້ສູງກວ່າເກົ່າ;ເພີ່ມທະວີການພົວພັນປະສານສົມທົບກັບອໍານາດການປົກຄອງທ້ອງຖິ່ນແຕ່ລະຂັ້ນ ແລະຂະແໜງການອ້ອມຂ້າງເມືອງ; ເອົາໃຈໃສ່ວຽກງານປ້ອງກັນຄວາມປອດໄພ ແລະໂຄວິດ-19, ເພີ່ມຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ມີຜົນສໍາເລັດມີຄຸນນະພາບ; ສະກັດກັ້ນບັນຫາປະກົດການຫຍໍ້ທໍ້ໃນກົມກອງ; ເອົາໃຈໃສ່ວຽກງານເຜີຍແຜ່ໂຄສະນານະໂຍບາຍ, ລະບຽບ, ຄູ່ມື ແລະນິຕິກໍາສິນເຊື່ອໃຫ້ອໍານາດການປົກຄອງ, ຂະແໜງການ ແລະປະຊາຊົນໄດ້ມີຄວາມຮັບຮູ້ ແລະເຂົ້າໃຈຢ່າງຈະແຈ້ງໃນໜ້າທີ່ການເມືອງຂອງ ທນບ.

    ໃນໄລຍະດຽວກັນ; ພະນັກງານ ທນບ ໜ່ວຍບໍລິການເມືອງສັງທອງຍັງເຄື່ອນໄຫວເຮັດວຽກກັບອໍານາດການປົກຄອງບ້ານ ແລະປະຊາຊົນບ້ານຫີນລັບ ແລະບ້ານສະນອດຕາມລຳດັບໂດຍໄດ້ມີຜູ້ຂຶ້ນແຜນສິນເຊື່ອປີ 2021 ແລະໄດ້ເຜີຍແຜ່ນິຕິກໍາສິນເຊື່ອ 4 ເອກະສານຕິດພັນກັບສິນເຊື່ອ; ນອກນີ້ ຍັງໄດ້ມີການທາບທາມ ແລະຜ່ານຮ່າງສັນຍາມອບສິດດ້ານພື້ນຖານອໍານາດການປົກຄອງບ້ານ ແລະປະຊາຊົນກໍ່ໄດ້ເຫັນດີເປັນເອກະພາບເຮັດບ້ານທົດລອງ ອກສກ ແຫ່ງທີ 15 ແລະ 16 ຂອງ ທນບ ສັງທອງ.

ຂ່າວ: ຣັດສະໝີ ດວງສັດຈະ 

แชร์