ອາເມລິກາ ຊ່ວຍປັບປຸງຄວາມເປັນຢູ່ຄົນພິການ

   ໂດຍການສະໜັບສະໜູນທຶນຈາກ ປະເທດສະຫະລັດອາເມລິກາ, ອົງການ ເວີລດ໌ເອດຢູເຄຊັນ ປະຈຳ ສປປ ລາວ ແລະ ໂຄງການອົງຄະທຽມ ແລະ ເຄື່ອງຄໍ້າຊູ ຫຼືໂຄງການ COPE ໄດ້ລົງນາມຂໍ້ຕົກລົງໃນການໃຫ້ທຶນຊ່ວຍເຫຼືອລ້າໃນວັນທີ 28 ມິຖຸນາ 2020 ທີ່ນະຄອນຫຼວງວຽງຈັນ, ສປປ ລາວ.

   ສໍາລັບທຶນດັ່ງກ່າວແມ່ນຈະຊ່ວຍດໍາເນີນກິດຈະກໍາຕັ້ງແຕ່ເດືອນເມສາ 2021 ຮອດເດືອນກໍລະກົດ ປີ 2022 ໂດຍມີມູນຄ່າ ປະມານ 500.000 ໂດລາ, ຈາກ ການລົງນາມນີ້ຈະສະໜັບສະໜູນໃຫ້ COPE ເພື່ອຊ່ວຍເຫຼືອສູນການແພດຟື້ນຟູໜ້າທີ່ການ ຫຼື C MR, ກະຊວງສາທາລະນະສຸກໃນການສະໜອງອົງຄະທຽມ ແລະ ເຄື່ອງຄໍ້າຊູທີ່ມີລາຄາເໝາະສົມ ແລະມີຄຸນະພາບເພື່ອຕອບສະໜອງຄວາມຕ້ອງການສະເພາະຂອງເດັກທີ່ມີຄວາມພິການທາງສະໝອງ ແລະ ບຸກຄົນອື່ນໆ ທີ່ມີຄວາມບົກຜ່ອງດ້ານການເຄື່ອນໄຫວໃນທົ່ວປະເທດ.

   ລົງນາມໃນຂໍ້ຕົກລົງການຊ່ວຍເຫຼືອທຶນດັ່ງກ່າວໂດຍທ່ານ ນາງ ຊາຣ່າ ບູຣນາກີ, ຜູ້ອຳນວຍການ ອົງການ ເວີລດ໌ເອດຢູເຄຊັນ ປະຈຳ ສປປ ລາວ ແລະ ທ່ານ ນາງ ເມດຕາ ທິບພະວົງ, ຜູ້ຈັດການໂຄງການ COPE ໂດຍການເປັນພະຍານຂອງທ່ານ ປອ. ດຣ. ປີເຕີ ເຮມ໋ອນ, ເອກອັກຄະລັດຖະທູດສະຫະລັດອາເມລິກາປະຈຳລາວ ແລະທ່ານ ໄມໂຄ ຣອນນິ້ງ, ຜູ້ຕາງໜ້າອົງການພັດທະນາສາກົນປະເທດສະຫະລັດອາເມລິກາປະຈຳລາວ ຫຼື USAID.

   ທ່ານເອກອັກຄະລັດຖະທູດ ປິເຕີ ເຮ່ມ໋ອນ ກ່າວວ່າ: ສະຫະລັດອາເມລິກາມີຄວາມພາກພູມໃຈທີ່ຈະສືບຕໍ່ສະໜັບສະໜູນ ສປປ ລາວ ເພື່ອປັບປຸງຊີວິດການເປັນຢູ່ທີ່ດີຂອງປະຊາຊົນລາວ, ລວມທັງຄົນທີ່ມີຄວາມພິການ. ໃນປີນີ້,ສະຫະລັດອາເມລິກາ ແລະ ສປປ ລາວ ກຳລັງສະເຫຼີມສະຫຼອງຄົບຮອບ 5 ປີ ແຫ່ງການຮ່ວມມືແບບກວມລວມລາວ-ອາເມລິກາ, ແລະການຮ່ວມມືໃໝ່ນີ້ກັບ COPE ໄດ້ຢັ້ງຢືນເຖິງຄຳໝັ້ນສັນຍາຂອງພວກເຮົາ.

   ທຶນຊ່ວຍເຫຼືອແມ່ນໄດ້ຮັບການສະໜັບສະໜູນຈາກອົງການ US AID, ຈະຊ່ວຍໃຫ້ COPE ແລະ CMR ເພີ່ມການບໍລິການ ແລະການສະໜັບສະໜູນຄົນທີ່ມີຄວາມພິການ ແລະແກ້ໄຂຄວາມຕ້ອງການດ້ານການແພດຟື້ນຟູໜ້າທີ່ການຂອງປະຊາຊົນທີ່ນັບມື້ນັບເພີ່ມຂື້ນໃນ ສປປ ລາວ ທີ່ປະສົບກັບຄວາມຫຍຸ້ງຍາກໃນການເຄື່ອນ ໄຫວທີ່ເກີດຈາກພະຍາດ, ລະເບີດບໍ່ທັນແຕກທີ່ຕົກຄ້າ, ຫຼືອຸປະຕິເຫດຕ່າງໆ.

  ຂໍ້ຕົກລົງນີ້ຍັງຈະຊ່ວຍໃຫ້ COPE ສາມາດພັດທະນາຄວາມຮູ້ຄວາມສາມາດ ແລະທັກສະທາງດ້ານການແພດຟື້ນຟູໜ້າທີ່ການຂອງພະນັກງານ CMR ຕື່ມອີກ, ຍົກຕົວຢ່າງໃນການປິ່ນປົວເດັກນ້ອຍທີ່ມີອາການຕີນໂງ້ງມາແຕ່ກໍາເນີດ ແລະເສີມຂະຫຍາຍຄວາມອາດສາມາດໃນການວິນິໄສຕໍ່ກັບເດັກນ້ອຍທີ່ເປັນໂລກສະໝອງພິການ.

   ສະຫະລັດອາເມລິກາໄດ້ເຮັດວຽກຢ່າງໃກ້ຊິດກັບລັດຖະບານ ແລະພົນລະເມືອງຂອງ ສປປ ລາວ ໃນຫຼາຍໆໂຄງການເພື່ອເສີມສ້າງຄວາມເຂັ້ມແຂງທາງດ້ານສາທາ ລະນະສຸກໃນ ສປປ ລາວ. ໂຄງການເຫຼົ່ານີ້ແມ່ນລວມມີການລິເລີ່ມໄລຍະຍາວເພື່ອການປັບປຸງດ້ານໂພຊະນາການຜ່ານການໃຫ້ອາຫານໃນໂຮງຮຽນ, ແຜນງານຕ່າງໆເພື່ອແກ້ໄຂສຸຂະພາບຂອງແມ່ ແລະເດັກ, ການເອົາໃຈໃສ່ແກ້ໄຂ ແລະປ້ອງກັນພະຍາດຕິດຕໍ່ ແລະການລິເລີ່ມກິດຈະກໍາຕ່າງໆ ເພື່ອເຮັດໃຫ້ຊີວິດການເປັນຢູ່ຂອງຄົນທີ່ມີຄວາມພິການດີຂຶ້ນ.

แชร์