ສຳມະນາສ້າງໂອກາດໃຫ້ແກ່ທຸລະກິດ ແລະ ການສົ່ງອອກໃນລາວ

  ໃນວັນທີ 6 ມີນາ 2019 ທີ່ນະຄອນຫຼວງວຽງຈັນ ໄດ້ຈັດງານສຳມະນາກຳນົດທິດທາງທຸ ລະກິດສ້າງໂອກາດໃຫ້ແກ່ທຸລະກິດ ແລະການສົ່ງອອກ ໂດຍການຫັນ ທຸລະກິດເຂົ້າສູ່ມາດຕະຖານ ແລະ ການຢັ້ງຢືນ ໂດຍການເຂົ້າຮ່ວມ ຂອງ ທ່ານ ນາງ ນິພາພອນ ນາມ ປັນຍາ ຫົວໜ້າໂຄງການສົ່ງເສີມການຄ້າຊີວະນາໆພັນໃນພາກພື້ນ ອາຊີ ປະຈໍາ ສປປ ລາວ, ມີບັນດາ ຕາງໜ້າຈາກສະພາການຄ້າຂັ້ນ ສູນກາງ ແລະທ້ອງຖິ່ນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ນາງ ນິພາພອນ ນາມປັນຍາ ກ່າວວ່າ: ງານສຳມະນາຄັ້ງນີ້ເພື່ອອະນຸລັກຊີວະນາໆພັນໂດຍຜ່ານການສົ່ງເສີມການຄ້າແບບຢືນຍົງດ້ວຍຮູບການສ້າງຂີດຄວາມສາມາດໃຫ້ແກ່ຜູ້ສົ່ງອອກ/ຜູ້ຜະລິດ ແລະປັບປຸງຊີວິດການເປັນຢູ່ (ສ້າງ ລາຍຮັບ ແລະວຽກເຮັດງານທຳ) ໃຫ້ແກ່ຊາວກະສິກອນຢູ່ຕາມຊົນນະບົດ, ເພື່ອສຶກ ສາ ແລະທຳຄວາມເຂົ້າໃຈສະພາບລວມ ແລະປະເພດຫົວໜ່ວຍທຸລະກິດທີ່ພົວພັນກັບຊີວະນາໆພັນ ແລະທຸລະກິດທີ່ຕິດພັນກັບການອະນຸລັກສິ່ງແວດລ້ອມຢູ່ ສປປ ລາວ ແລະເພື່ອສ້າງ ແລະ ຂະຫຍາຍໂອກາດໃຫ້ແກ່ຫົວໜ່ວຍ ທຸລະກິດຢູ່ລາວໃນການປັບປຸງ ທຸລະກິດ ແລະການເຂົ້າເຖິງການບໍລິການທີ່ມີຄຸນນະພາບແລະມາດຕະຖານສຳລັບຕະຫຼາດທີ່ມີກຳລັງຊື້ສູງໃນອະນາຄົດ

  ໂຄງການ Biotrade ເປັນໂຄງການພາກພື້ນ, ໄລຍະໂຄງການ 4 ປີ, ໄດ້ຮັບທຶນສະໜັບສະໜູນຈາກລັດຖະບານສະວິດເຊີແລນໂດຍຜ່ານກອງເລຂາເສດ ຖະກິດ ຫຼື (SECO) ແລະໂຄງການໄດ້ຈັດ ຕັ້ງປະຕິບັດ ຢູ່ 3 ປະເທດຄື: ມຽນ ມາ, ສສ ຫວຽດນາມ ແລະ ສປປ ລາວ, ໂຄງການນີ້ຈະເນັ້ນໃສ່ການນຳໃຊ້ກົນລະຍຸດທາງດ້ານການຕະຫຼາດເພື່ອມາຊ່ວຍອຳນວຍຄວາມສະດວກໃຫ້ແກ່ຮູບແບບການຄ້າຊີວະນາໆພັນພ້ອມທັງສ້າງຄວາມຢືນຍົງໃຫ້ ແກ່ອົງກອນ ແລະອຳນວຍຄວາມສະດວກໃຫ້ແກ່ພາກສ່ວນການ ບໍລິການທີ່ໃຫ້ການສະໜັບສະໜູນຫົວໜ່ວຍທຸລະກິດ. 

ຂ່າວ: ນສພ ເສດຖະກິດ-ສັງຄົມ

• 07/03/2019