ເຊັນສັນຍາຮ່ວມມືປິ່ນປົວມີລູກຍາກ

    ພິທີເຊັນສັນຍາການຮ່ວມມືດັ່ງກ່າວຈັດຂຶ້ນວັນທີ 25 ມິຖຸນາ 2021 ໂຮງແຮມດອນຈັນພາເລດ ນະຄອນຫຼວງວຽງຈັນ ລົງນາມໂດຍ ທ່ານ ດຣ ສີວັນໄຊ ຈັນທະວົງສັກ ຄະນະອຳນວຍການໂຮງໝໍແມ່ ແລະເດັກເກີດໃໝ່ ແລະທ່ານ ຢາງ ຊົງເມ ປະທານກຸ່ມບໍລິສັດອີໂປຊື (ກວາງໂຈ) ຈຳກັດ ແລະໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານ ປອ. ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກພ້ອມດ້ວຍບັນດາຫົວໜ້າ, ຮອງຫົວໜ້າຫ້ອງການ, ຫົວໜ້າກອໍານວຍການໂຮງໝໍ, ມະຫາວິທະຍາໄລ ວິທະຍາສາດສຸຂະພາບ, ສະມາຄົມປະສູດພະຍາດຍິງ, ຄູ່ຮ່ວມພັດທະນາ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

   ການຮ່ວມມືຄັ້ງນີ້ກໍເພື່ອເປັນການຊ່ວຍເຫຼືອປັບປຸງວຽກງານການປິ່ນປົວດ້ວຍເຕັກນິກການແພດທັນສະໄໝຕາມນະໂຍບາຍຂອງລັດຖະບານໃນໂຮງໝໍຂັ້ນຕ່າງໆ ໃນຂອບເຂດທົ່ວປະເທດ, ໂດຍສະເພາະໂຮງໝໍແມ່ ແລະເດັກເກີດໃໝ່ໃຫ້ມີຄວາມພ້ອມທາງດ້ານພື້ນຖານໂຄງລ່າງໃຫ້ເປັນລະບົບຄົບຊຸດ, ເຄື່ອງຈັກ-ອຸປະກອນ, ເຕັກນິກ-ເຕັກໂນໂລຊີຕະຫຼອດຮອດການຮຽນ, ການສອນ, ການຖອດຖອນບົດຮຽນ ແລະປະສົບການ, ການບຳລຸງ-ກໍ່ສ້າງພະນັກງານຂອງໂຮງໝໍທາງດ້ານວິຊາການແພດການປິ່ນປົວມີລູກຍາກດ້ວຍເຕັກນິກ-ວິຊາການທີ່ທັນສະໄໝໃຫ້ນັບມື້ພັດທະນາຂຶ້ນ.

    ດັ່ງນັ້ນ ໂຮງໝໍແມ່ ແລະເດັກເກີດໃໝ່ ແລະກຸ່ມບໍລິສັດ ອີໂປຊື (ກວາງໂຈ) ຈຳກັດ ຈຶ່ງໄດ້ມີການຮ່ວມມືດ້ານເຕັກນິກການປິ່ນປົວມີລູກຍາກໃນໂຮງໝໍແມ່ ແລະເດັກເກີດໃໝ່ກໍ່ຄືຮ່ວມກັບກະຊວງສາທາລະນະສຸກ ສປປ ລາວ ເພື່ອຄວາມເຂັ້ມແຂງດ້ານການໃຫ້ບໍລິການສຸຂະພາບແມ່ທີ່ມີລູກຍາກ.

แชร์