ຮອງຫົວໜ້າກົມລ້ຽງສັດ ແນະນຳປິ່ນປົວງົວ-ຄວາຍ

    ໃນວັນທີ 24 ມິຖຸນາ 2021 ທ່ານ ສີແສງ ຂຸນສີ ຮອງຫົວໜ້າກົມລ້ຽງສັດການປະມົງກະຊວງກະສິກຳ ແລະປ່າໄມ້ພ້ອມທີມງານໄດ້ລົງມາໃຫ້ຄຳແນະນຳ ແລະໃຫ້ຄວາມຮູ້ກ່ຽວກັບວິທີການເບິ່ງແຍງຮັກສາຕໍ່ກັບການລະບາດຂອງພະຍາດຜີວໜັງອັກເສບປະເພດສັດໃຫຍ່ງົວຄວາຍທີ່ເດີ່ນກອງເຂົ້າໃຫຍ່ບ້ານສົມສະຫວັນ ເມືອງພຽງແຂວງໄຊຍະບູລີໂດຍການເຂົ້າຮ່ວມຂອງ ທ່ານ ເສີດ ແສງສຸລິນ ເຈົ້າເມືອງໆພຽງພ້ອມດ້ວຍພາກສ່ວນກ່ຽວຂ້ອງຂອງແຂວງຂອງເມືອງ ແລະບັນດາປະຊາຊົນຜູລ້ຽງສັດໃຫຍ່ທີ່ມີສັດລ້ຽງເກີດພະຍາດພາຍໃນບ້ານສົມສະຫວັນເຂົ້າຮ່ວມຮັບຟັງ.

   ການລົງມາໃນເທື່ອນີ້ຂອງ ທ່ານ ສີແສງ ຂຸນສີ ໄດ້ໃຫ້ຄຳແນະນຳ ແລະໃຫ້ຄວາມຮູ້ກ່ຽວກັບວິທີການປ້ອງກັນ ແລະເບິ່ງແຍງຮັກສາຕໍ່ກັບພະຍາດຜີວໜັງອັກເສບສັດໃຫຍ່ປະເພດງົວ-ຄວາຍ ໃຫ້ກັບບັນດາພະນັກງານວິຊາການກໍ່ຄືພະນັກງານທີ່ກ່ຽວຂ້ອງຂອງເມືອງ ແລະປະຊາຊົນຜູ້ລ້ຽງສັດທີ່ຖືກຜົນກະທົບຕໍ່ການລະບາດຂອງພະ ຍາດດັ່ງກາວເປັນຕົ້ນແມ່ນວິທີການປິ່ນປົວຫຼັງເກີດພະຍາດ, ການຕິດຕາມອາການສັດລ້ຽງຂອງຕົນ, ການລາຍງານກໍລະນີສົງໄສຕໍ່ພາກສ່ວນກ່ຽວຂ້ອງ ແລະລັກສະນະຂອງພະຍາດຜີວໜັງອັກເສບປະເພດງົວ, ຄວາຍ, ຜົນກະທົບຕໍ່ສັດລ້ຽງ ແລະສາເຫດຂອງການຕິດເຊື້ອພະຍາດດັ່ງກາວເພື່ອໃຫ້ບັນດາຜູ້ເຂົ້າຮ່ວມໄດ້ຮັບຮູ້ເຂົ້າໃຈ ແລະມີວິທີການຮັບມື ແລະປ້ອງກັນເບິ່ງແຍງຮັກສາຢ່າງຖືກວິທີ ແລະນຳໄປເຜີຍແຜ່ໂຄສະນາໃຫ້ກັບກຸ່ມຜູ້ລ້ຽງສັດກໍຄືປະຊາຊົນພາຍໃນເມືອງໄດ້ຮັບຮູ້ ແລະນຳໄປໃຊ້ເຂົ້າໃນການປ້ອງກັນ ແລະຮັກສາການລະບາດພະຍາດດັ່ງກ່າວບໍ່ໃຫ້ມີຜົນກະທົບເປັນວົງກວ້າງ ແລະມີຜົນເສຍຫາຍທີ່ຮ້າຍແຮງຕໍ່ກັບສັດລ້ຽງຂອງປະຊາຊົນພ້ອມກັນປ້ອງກັນການລະບາດຂອງພະຍາດດັ່ງກ່າວນີ້ໃຫ້ໄດ້ຮັບຜົນດີ.

ຂ່າວ: ແສງສຸດາ ກິ່ງສະຫວັດ

• 28/06/2021