ເຈົ້າຄອງ ນວ ຊຸກຍູ້ສ້າງເມືອງໃໝ່

    ວັນທີ 26 ມິຖຸນາ 2021 ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມຄະນະໄດ້ເຄື່ອນໄຫວຢ້ຽມຢາມ ແລະຊຸກຍູ້ການສ້າງຕັ້ງເມືອງໃໝ່ຊຶ່ງເປັນເມືອງທີ 10 ຂອງນະຄອນຫຼວງວຽງຈັນ ຢູ່ ມສ ພວງໄຊ ບ້ານນາໂງມໃໝ່ ເມືອງໄຊທານີຖືກຕ້ອນຮັບຈາກທ່ານ ພົນຈັດຕະວາ ສີພອນ ຈັນສົມວົງ ຫົວໜ້າກອງບັນຊາການທະຫານນະຄອນຫຼວງວຽງຈັນຜູ້ຊີ້ນໍາວຽກງານຄະນະຮັບຜິດຊອບຄົ້ນຄວ້າສ້າງຕັ້ເມືອງໃໝ່ມີຄະນະຮັບຜິດຊອບບັນດາພະແນກການ ແລະ ນາຍບ້ານທັງ 24 ບ້ານທີ່ກວມຂອບເຂດພື້ນທີ່ເມືອງໃໝ່ເຂົ້າຮ່ວມ.

   ທ່ານ ນາງ ລໍາດວນ ຈັນທະວົງ ຫົວໜ້າຄະນະຮັບຜິດຊອບສ້າງຕັ້ງເມືອງໃໝ່ລາຍງານໃຫ້ຮູ້ວ່າ: ປະຈຸບັນການສ້າງຕັ້ງເມືອງໃໝ່ໄດ້ສໍາເລັດການຖາງແລວ ແລະປັກຫຼັກໝາຍໄດ້ 33 ຫຼັກ ຕາມລວງຮອບຂອງດິນໄດ້ເກັບກໍາຕອນດິນຂອງປະຊາຊົນຢູ່ໃນຕອນດິນດັ່ງກ່າວມີທັງໝົດ 22 ຕອນ ໄດ້ສໍາຫຼວດຈຸດຕອນດິນ 11,28 ເຮັກຕາ ເພື່ອປຸກສ້າງຫ້ອງການປົກຄອງເມືອງໃໝ່ຊຶ່ງເປັນດິນລັດທັງໝົດພ້ອມນັ້ນການປຸກສ້າງຫ້ອງການຢູ່ເຂດຈຸດສຸມນາໂງມ-ນາຕານສໍາເລັດແລ້ວ 95%.

   ສໍາລັບຂອບເຂດການສ້າງຕັ້ງເມືອງໃໝ່ ກວມເອົາ 24 ບ້ານທີ່ຂຶ້ນກັບເມືອງໄຊທານີປະກອບມີ ບ້ານນາໂງມເກົ່າ ນາໂງມໃໝ່ ນາຄາຍ ນາຄັນທຸງ ໂພນແພງ ຫົວຂົວ ຫົວນາ ນາຕານ ຊໍາບອນ ທົ່ງມັ່ງ ກຸດສາມບາດ ຫາດກ້ຽງ ນາກຸງ ໂພນຄໍ້ ໂພນໄຮ່ຄໍາ ໂພນໂຮງ ຫາດພະອິນ ດວງບຸດດີ ນາແຖ ທ່າດິນແດງເໜືອ ທ່າດິນແດງໃຕ້ ເວີນແທ່ນ ທ່າຈໍາປາ ແລະບ້ານໄຮ່.

 ນອກຈາກນີ້ທ່ານເຈົ້າຄອງນະຄອນຫຼວງວຽງຈັນຍັງໄດ້ມອບເງິນຊຸກຍູ້ວຽກງານລວມໃຫ້ກັບອໍານາດການປົກຄອງບ້ານ 8 ບ້ານ ໂດຍບ້ານລະ 1 ລ້ານກີບ ລວມທັງໝົດ 8 ລ້ານກີບ.

ຂ່າວ: ຂັນທະວີ

แชร์