ສ. ເກົາຫຼີ ຊ່ວຍເຂົ້າສານແກ່ລາວ 1.320 ໂຕນ

    ວັນທີ 23 ມິຖຸນາ 2021 ທີ່ນະຄອນຫຼວງວຽງຈັນ, ລັດຖະບານແຫ່ງສາທາລະນະລັດ ເກົາຫຼີ ໄດ້ນຳເອົາເຂົ້າສານຈ້າວ ຈຳນວນ 1.320 ໂຕນ ມູນຄ່າປະມານ 1,26 ລ້ານໂດລາສະຫະລັດ ມອບໃຫ້ແກ່ລັດຖະບານລາວເພື່ອຊ່ວຍເຫຼືອຊຸມຊົນຜູ້ທີ່ໄດ້ຮັບຜົນກະທົບຈາກໄພພິບັດທໍາມະຊາດທີ່ເກີດຂຶ້ນ ໃນ ສປປ ລາວ, ໂດຍຜ່ານອົງການອາຫານໂລກ.

   ທັງນີ້, ກໍ່ເພື່ອສ້າງຄວາມເຂັ້ມແຂງໃຫ້ແກ່ຄະນະບໍລິຫານໄພພິບັດໃນລະດັບຊາດ ແລະທ້ອງຖິ່ນໃນວຽກງານແຈກຢາຍອາຫານສຸກເສີນ, ຊຶ່ງລວມທັງການກໍານົດເປົ້າ ໝາຍບັນດາຜູ້ທີ່ຈະໄດ້ຮັບຜົນປະໂຫຍດ, ລະບົບການແຈກຢາຍອາຫານລວມທັງລະບົບການຕິດຕາມນຳອີກ. 

    ທ່ານ ຢານ ເດລບາເຣີ ຜູ້ຕາງໜ້າອົງການອາຫານໂລກ ປະຈໍາ ລາວ ໄດ້ກ່າວວ່າ: ເຂົ້າຈໍານວນໜຶ່ງຈະໄດ້ນໍາໃຊ້ເປັນເຂົ້າສໍາຮອງລວມໃນຂັ້ນສູນກາງໃນກໍລະນີທີ່ເກີດ ມີໄພພິບັດທີ່ບໍ່ທັນໄດ້ຄາດຄິດ, ເຂົ້າສໍາຮອງເຫຼົ່ານີ້ຈະຖືກນໍາໃຊ້ໂດຍອົງການອາຫານໂລກເພື່ອຮັບປະກັນວ່າບັນດາເຂົ້າເຫຼົ່ານີ້ຈະເປັນປະໂຫຍດໃຫ້ແກ່ປະຊາຊົນຜູ້ທີ່ຕ້ອງ ການຄວາມຊ່ວຍເຫຼືອຫຼາຍທີ່ສຸດ ແລະສໍາລັບສ່ວນທີ່ເຫຼືອຂອງເຂົ້າຈຳນວນໜຶ່ງແມ່ນຈະຖືກນໍາໃຊ້ເຂົ້າໃນກິດຈະກໍາຄວາມໝັ້ນຄົງທາງດ້ານສະບຽງອາຫານອື່ນໆຂອງອົງການອາຫານໂລກເປັນຕົ້ນເປັນເຂົ້າສໍາຮອງໃຫ້ແກ່ຊຸມຊົນໃນພື້ນທີ່ທີ່ໄດ້ຮັບຜົນກະທົບຈາກໄພພິບັດທາງທໍາມະຊາດ ເປັນປະຈໍາ. ບັນດາເຂົ້າສໍາຮອງເຫຼົ່ານີ້, ຈະເຮັດໜ້າທີ່ເປັນເຂົ້າສໍາຮອງຢູ່ໃນສາງເວລາສຸກເສີນ ແລະເກັບຮັກສາໄວ້ສໍາລັບເວລາທີ່ຂາດແຄນອາຫານໃນໄລຍະເວລາທີ່ຍັງບໍ່ມີຜົນຜະລິດ ແລະ ເຮັດໃຫ້ຊຸມຊົນສາມາດຊ່ວຍໂຕເອງໄດ້ຈາກຄວາມຕ້ອງການເບື້ອງຕົ້ນ, ຊຶ່ງປະຊາຊົນສາມາດທົດແທນຄືນຈໍານວນທີ່ຢືມຕາມດອກເບ້ຍທີ່ໄດ້ຕົກລົງໄວ້ຫຼັງຈາກທີ່ພວກເຂົາໄດ້ຜົນເກັບກ່ຽວ.

   ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມໄດ້ໃຫ້ຮູ້ວ່າ: ໃນປີ 2018 ລັດຖະບານ ສ. ເກົາຫຼີ ກໍ່ໄດ້ໃຫ້ການຊ່ວຍ ເຫຼືອເຂົ້າກິນຜ່ານຄັງແຮເຂົ້າອາຊຽນບວກສາມ ຈໍານວນ 1.000 ໂຕນ ແລະປີ 2021 ຍັງຈະສືບຕໍ່ໃຫ້ການຊ່ວຍເຫຼືອຜ່ານຄັງແຮເຂົ້າອາຊຽນຕື່ມອີກຈໍານວນ 700 ໂຕນ. ເຊັ່ນດຽວໃນຄັ້ງນີ້, ໄດ້ໃຫ້ການຊ່ວຍເຫລືອເຂົ້າກິນ ຈຳນວນ 1.320 ໂຕນ, ຊຶ່ງຄິດເປັນມູນຄ່າປະມານຫຼາຍລ້ານໂດລາສະຫະລັດ ໂດຍຜ່ານກິດຈະກຳການຊ່ວຍ ເຫຼືອສົງເຄາະ ແລະຟື້ນຟູໂຄງລ່າງການຜະລິດຕິດພັນກັບການຄໍ້າປະກັນດ້ານສະບຽງອາຫານ, ໂດຍຈະມີຜູ້ໄດ້ຮັບຜົນປະໂຫຍດປະມານ 55.000 ຄົນ.

ທ່ານ ມູຮົງ ອິມ ເອກອັກຄະລັດ ຖະທູດແຫ່ງ ສ. ເກົາຫຼີ ກ່າວວ່າ: ການຊ່ວຍເຫລືອດັ່ງກ່າວ, ແມ່ນເປັນປະໂຫຍດຫຼາຍເພື່ອສ້າງຄັງເຂົ້າສໍາຮອງໃຫ້ມີຄວາມກຽມພ້ອມ ແລະເຂົ້າເຖິງໄດ້, ກັບໄພນໍ້າຖ້ວມທີ່ກໍາລັງເກີດຂຶ້ນທີ່ພວກເຮົາໄດ້ເຫັນນໍາກັນອີກ. ພວກເຮົາຂໍຂອບໃຈນໍາບັນດາເຈົ້າໜ້າທີ່ເພື່ອຮັບປະກັນວ່າເຂົ້າຈາກການຊ່ວຍເຫຼືອແມ່ນໄດ້ໄປເຖິງບັນດາຜູ້ທີ່ມີຄວາມຕ້ອງການຫຼາຍທີ່ສຸດ.

ຂ່າວ: ສານ ຮສສ

แชร์