ສປງ ກຽມພ້ອມ ປົກປ້ອງຜູ້ຝາກເງິນ

  ສໍານັກງານປົກປ້ອງເງິນຝາກ (ສປງ) ເມື່ອກ່ອນເອີ້ນວ່າ: “ກອງທຶນປົກປ້ອງຜູ້ຝາກເງິນ” ແມ່ນການຈັດຕັ້ງການເງິນຂອງລັດມີຖານະທຽບເທົ່າກົມ, ເປັນນິຕິບຸກຄົນ ທີ່ເຄື່ອນໄຫວໂດຍບໍ່ສະແຫວງຫາຜົນກໍາໄລ, ມີຄວາມເປັນເອກະລາດທາງດ້ານການເງິນ ແລະຢູ່ພາຍໃຕ້ການຄຸ້ມຄອງຂອງທະນາຄານແຫ່ງ ສປປ ລາວ (ທຫລ). ສປງ ມີພາລະບົດບາດໃນການຄຸ້ມຄອງ ແລະຕິດຕາມກວດກາການເຄື່ອນໄຫວວຽກງານປົກປ້ອງເງິນຝາກເພື່ອຮັບປະກັນການປົກປ້ອງສິດ ແລະຜົນປະໂຫຍດຂອງຜູ້ຝາກເງິນແນໃສ່ສ້າງຄວາມເຊື່ອໝັ້ນໃຫ້ແກ່ສັງຄົມຕໍ່ລະບົບສະຖາບັນການເງິນປະກອບສ່ວນເຂົ້າໃນການຮັກສາສະຖຽນລະພາບ ແລະ ພັດທະນາລະບົບສະຖາບັນການເງິນຂອງ ສປປ ລາວ.

 ພ້ອມນັ້ນ, ສປງ ຍັງປົກປ້ອງສິດຜົນປະໂຫຍດອັນຊອບທໍາຂອງຜູ້ຝາກເງິນທີ່ຝາກໄວ້ນຳສະຖາບັນການເງິນກໍ່ຄືທະນາຄານທຸລະກິດ ແລະສະຖາບັນການເງິນຈຸລະພາກທີ່ຮັບເງິນຝາກທີ່ເປັນສະມາຊິກຂອງ ສປງ ຕາມການກໍານົດໄວ້ໃນດໍາລັດວ່າດ້ວຍການປົກປ້ອງເງິນຝາກ ເລກທີ 329/ລບ ລົງວັນ ທີ 25 ຕຸລາ 2017. ນອກຈາກນີ້, ມີໜ້າທີ່ຄົ້ນຄວ້າຮັບເອົາທະນາຄານທຸລະກິດ ແລະສະຖາບັນການເງິນຈຸລະພາກທີ່ຮັບເງິນຝາກເຂົ້າເປັນສະມາຊິກຕາມລະບຽບການ; ຄິດໄລ່, ເກັບເບ້ຍປະກັນເງິນຝາກຈາກສະມາຊິກ ແລະ ຄຸ້ມຄອງຮັກສາຄັງປົກປ້ອງໃຫ້ມີເຕີບໃຫຍ່ເຂັ້ມແຂງເພື່ອຮັບປະກັນການຈ່າຍເງິນປົກປ້ອງໃຫ້ແກ່ຜູ້ຝາກເງິນທີ່ຝາກໄວ້ນຳສະມາຊິກໃດໜຶ່ງທີ່ຢູ່ໃນສະພາວະລົ້ມລະລາຍຕາມວົງເງິນປົກປ້ອງທີ່ໄດ້ກຳນົດໄວ້ໃນລະບຽບການ.

  ທ່ານ ນາງ ແສງດາວວີ ວົງຄຳຊາວ ຄະນະພັກທະນາຄານແຫ່ງ ສປປ ລາວ, ຫົວໜ້າ ສປງ ໄດ້ແຈ້ງໃຫ້ຮູ້ວ່າ: ໃນປີ 2020 ຜ່ານມາ, ສປງ ໄດ້ຈັດຕັ້ງປະຕິບັດໜ້າທີ່ການເມືອງຂອງຕົນໂດຍຖືເອົາວຽກງານສຶກສາອົບຮົມການເມືອງແນວຄິດເປັນສໍາຄັນໃນການຊີ້ນໍານໍາພາການເຄື່ອນໄຫວວຽກງານແຕ່ລະດ້ານໂດຍໄດ້ເຜີຍແຜ່ເຊື່ອມຊຶມເອກະສານສໍາຄັນຕ່າງໆທີ່ຂັ້ນເທິງ ແລະ ສປງ ຈັດຂຶ້ນເນື່ອງໃນໂອກາດວັນສໍາຄັນຂອງຊາດ, ຂອງພັກ ແລະຂອງ ທຫລ.ພ້ອມນີ້,ຍັງຄົ້ນຄວ້າສ້າງແຜນຍຸດທະສາດ ແລະສ້າງບັນດານິຕິກໍາຕ່າງໆທີ່ຕິດພັນກັບວຽກງານປົກປ້ອງເງິນຝາກໄດ້ 4 ສະບັບ. ສຳເລັດການສ້າງລະບົບບໍລິຫານດ້ານ IT ພາຍນອກ. ນອກນັ້ນ,ຍັງໂຄສະນາຜ່ານສື່ສິ່ງພິມຕ່າງໆ ແລະເຜີຍແຜ່ນິຕິກໍາໃຫ້ບັນດາທະນາຄານທຸລະກິດທີ່ ເປັນສະມາຊິກຂອງສປງມີຜູ້ເຂົ້າຮ່ວມ 82 ຄົນ; ຈັດຕັ້ງພິທີເຜີຍແຜ່ດໍາລັດວ່າດ້ວຍການປົກປ້ອງເງິນ ຝາກຢູ່ 3 ເມືອງ, ສະຖາບັນການສຶກສາມີຜູ້ເຂົ້າຮ່ວມທັງໝົດ 533 ເທື່ອຄົນ; ສໍາເລັດການຄົ້ນຄວ້າ ແລະພັດທະນາເວັບໄຊ ແລະໄດ້ນໍາໃຊ້ໃນເດືອນທັນວາ 2020.

    ສະເພາະ 3 ເດືອນຕົ້ນປີ 20 21, ສປງ ມີສະມາຊິກທັງໝົດ 43 ແຫ່ງ ປະກອບດ້ວຍທະນາຄານທຸລະກິດລັດ 3 ແຫ່ງ, ທະນາຄານທຸລະກິດລັດຮ່ວມທຶນ 3 ແຫ່ງ, ທະນາຄານທຸລະກິດເອກະຊົນ 7 ແຫ່ງ, ທະນາຄານທຸລະກິດທີ່ເປັນທະນາຄານລູກຂອງຕ່າງປະເທດ 8 ແຫ່ງ, ສາຂາທະນາຄານທຸລະກິດຕ່າງປະເທດ 21 ແຫ່ງ ແລະ ສະຖາບັນການເງິນຈຸລະພາກທີ່ຮັບເງິນ ຝາກ 1 ແຫ່ງ (ສກຈຮ ປະຕູຄໍາ) ຊຶ່ງສາມາດເຂົ້າເບິ່ງໄດ້ທີ່ເວັບໄຊ www.dpo.gov. la. ແລະ ບັນດາສະມາຊິກ ສປງ ແມ່ນໄດ້ປະກອບສ່ວນຢ່າງຕັ້ງໜ້າໃນການມອບເບ້ຍປະກັນເງິນຝາກຕາມອັດຕາທີ່ໄດ້ກໍານົດໄວ້ໃນຂໍ້ຕົກລົງວ່າດ້ວຍອັດຕາເບ້ຍປະກັນເງິນຝາກເລກທີ 1196/ທຫລ ລົງວັນທີ 31 ທັນວາ 2019 ມາຮອດປະຈຸບັນປະຕິບັດໄດ້ເກີນແຜນການ 32, 40% (ແຜນການຂອງປີ 2020) ສາມາດເຮັດໃຫ້ຄັງປົກປ້ອງເງິນ ຝາກມີການເພີ່ມຂຶ້ນຢ່າງຕໍ່ເນື່ອງ.

   ວຽກງານພົວພັນຮ່ວມມືກັບບັນດາປະເທດຄູ່ຮ່ວມມືໃນກອບສອງຝ່າຍໂດຍໄດ້ຍາດແຍ່ງການຊ່ວຍເຫຼືອດ້ານວິຊາການໃນນີ້ໄດ້ມີການຈັດສໍາມະນາ ແລະຝຶກອົບຮົມທາງ ໄກໃນນີ້ໄດ້ສຳເລັດການຈັດກອງປະຊຸມສຳມະນາໃຫ້ພະນັກງານ ສປງ ພ້ອມທັງເປີດກອງປະຊຸມພົບປະສອງຝ່າຍ (ແບບທາງໄກ) ລະຫວ່າງ ສປງ ແລະປະກັນໄພເງິນ ຝາກຫວຽດນາມ. ເຂົ້າຮ່ວມກອງປະຊຸມກັບກຸ່ມທະນາຄານໂລກ 4 ຄັ້ງພາຍໃຕ້ຫົວຂໍ້: ການບໍລິຫານຄວາມສ່ຽງ ແລະ ແຜນການສຸກເສີນ, ວຽກງານຈັດຊື້-ຈັດຈ້າງ ແລະລະບົບຕິດຕາມການປ່ຽນແປງການຈັດຊື້-ຈັດຈ້າງ, ການຮັກສາຄວາມຢືດຢຸ່ນຂອງລະບົບການເງິນຕໍ່ເຫດການທີ່ບໍ່ຄາດຄິດຄືພະຍາດໂຄວິດ-19: ການຕອບໂຕ້ຍຸດ ທະສາດການປະກັນໄພເງິນຝາກ ແລະທາງເລືອກໃນການວາງນະໂຍບາຍ.

   ນອກຈາກນີ້, ສປງ ຍັງໄດ້ປະກອບສ່ວນຊ່ວຍເຫຼືອຊຸກຍູ້ສັງຄົມ ຈໍານວນ 4 ຄັ້ງ ລວມມູນຄ່າ 55, 03 ລ້ານກີບໃນນີ້ປະກອບສ່ວນຊຸກຍູ້ວຽກງານການຕ້ານ ແລະສະ ກັດກັ້ນການແຜ່ລະບາດຂອງພະຍາດຈຸລະໂລກ COVID-19, ຊ່ວຍເຫຼືອສະມາຊິກກຳມະບານທີ່ປະສົບອັກຄີໄພ (ໄຟໄໝ້ເຮືອນ), ຊ່ວຍເຫຼືອຜູ້ປະສົບໄພນໍ້າຖ້ວມຢູ່ພາກກາງແລະພາກໃຕ້ຂອງ ສປປ ລາວ.

ຂ່າວ: ຣັດສະໝີ ດວງສັດຈະ

แชร์