ປີນີ້ລາວຈະປ່ອຍປາ 58 ລ້ານໂຕ ພ້ອມຫ້າມ ລ້າສັດນໍ້າ, ສັດປ່າ

   ພັກ ແລະລັດຖະບານຍາມໃດກໍ່ເຫັນຄວາມສໍາຄັນ ແລະຖືເອົາການອະນຸລັກ, ປົກປັກຮັກສາ, ພັດທະນາສັດນໍ້າ ແລະສັດປ່າເປັນວຽກສຳຄັນ ແລະມີຄວາມຈໍາເປັນສໍາລັບຊີວິດການເປັນຢູ່ຂອງປະຊາຊົນລາວໂດຍໄດ້ກຳນົດເອົາວັນທີ 13 ກໍລະກົດ ເປັນວັນປ່ອຍປາແຫ່ງຊາດ ແລະວັນອະນຸລັກສັດນໍ້າ ແລະສັດປ່າແຫ່ງຊາດຊຶ່ງໃນແຕ່ລະປີ ການຈັດຕັ້ງແຕ່ລະຂັ້ນນັບທັງສູນກາງ ແລະ ທ້ອງຖິ່ນຕະຫຼອດຮອດພໍ່ແມ່ປະຊາຊົນກໍjໄດ້ຈັດພິທີປ່ອຍປາລົງສູ່ແຫຼ່ງນໍ້າທຳມະຊາດ ແລະ ເຂດພື້ນທີ່ຂອງຕົນຢ່າງເປັນຂະບວນຟົດຟື້ນຕິດພັນກັບການຍົກສູງຄວາມຮັບຜິດຊອບຂອງສັງຄົມໃນການເອົາໃຈໃສ່ຄຸ້ມຄອງ, ປົກປັກຮັກສາ, ພັດທະນາ ແລະນໍາໃຊ້ແບບຍືນຍົງ.

   ສະເພາະປີ 2020 ຜ່ານມາສາມາດປ່ອຍປາໄດ້ທັງໝົດ 55,02 ລ້ານໂຕ ແລະໃນປີ 2021 ຂະແໜງການກະສິກໍາ ແລະປ່າໄມ້ກໍ່ໄດ້ວາງແຜນສູ້ຊົນໃນການປ່ອຍ ປາໃຫ້ໄດ້ທັງໝົດ 58 ລ້ານໂຕ ເພື່ອບັນລຸຕົວເລກດັ່ງກ່າວຕິດພັນກັບການສົ່ງເສີມການລ້ຽງ, ຄຸ້ມຄອງ, ປົກປັກຮັກສາ, ພັດທະນາ ແລະນໍາໃຊ້ສັດນໍ້າ ແລະສັດປ່າໃຫ້ ມີການຂະຫຍາຍຕົວຕາມທິດສີຂຽວ ແລະ ຍືນຍົງລັດຖະມົນຕີກະຊວງກະສິກຳ ແລະ ປ່າໄມ້ອອກແຈ້ງການໂດຍໃຫ້ກົມລ້ຽງສັດ ແລະ ການປະມົງ ແລະ ກົມປ່າໄມ້ເປັນເຈົ້າການສົມທົບກັບພະແນກກະສິກຳ ແລະປ່າໄມ້ແຂວງ, ນະຄອນຫຼວງວຽງຈັນ ແລະພາກສ່ວນ ກ່ຽວຂ້ອງສືບຕໍ່ດໍາເນີນການໂຄ ສະນາເຜີຍແຜ່ກົດໝາຍ ແລະນິຕິກຳກ່ຽວຂ້ອງໃຫ້ແກ່ພະນັກງານລັດຖະກອນ, ນັກຮຽນ, ນັກສຶກສາ, ພໍ່ຄ້າຊາວຂາຍຕະຫຼອດຮອດປະຊາຊົນບັນດາເຜົ່າໄດ້ຮັບຮູ້ ແລະເຂົ້າໃຈເຖິງເນື້ອໃນຕົ້ນຕໍຂອງກົດໝາຍວ່າດ້ວຍສັດນໍ້າ ແລະສັດປ່າແລະກົດໝາຍວ່າດ້ວຍການປະມົງໂດຍສະເພາະອັນໃດແດ່ກົດໝາຍອະນຸຍາດໃຫ້ເຮັດ, ອັນໃດກົດໝາຍຫ້າມ (ຂໍ້ຫ້າມຕ່າງໆ) ແລະ ຖ້າລະເມີດຈະໄດ້ຮັບໂທດຄືແນວໃດທັງນີ້ກໍ່ເພື່ອໃຫ້ເປົ້າໝາຍຮັບຮູ້ໄດ້ເຖິງນະໂຍບາຍຂອງລັດ ແລະ ເຫັນເຖິງຄວາມສຳຄັນຂອງປາ ແລະ ສັດນໍ້າແນໃສ່ປຸກລະດົມໃຫ້ທຸກພາກສ່ວນເຂົ້າຮ່ວມ ແລະປະກອບສ່ວນເຂົ້າໃນການອະນຸລັກ, ປົກປັກຮັກສາ ແລະພັດທະນາສັດນໍ້າ ແລະສັດປ່າຕາມກົດໝາຍກຳນົດ; ໃຫ້ພະແນກກະສິກຳ ແລະປ່າໄມ້ແຂວງ, ນະຄອນຫຼວງວຽງຈັນເປັນເຈົ້າການປະສານສົມທົບກັບຂະແໜງການ, ອົງການປົກຄອງທ້ອງຖິ່ນຈັດຕັ້ງພິທີປ່ອຍປາລົງແຫຼ່ງນໍ້າຕ່າງໆຕິດພັນກັບການຈັດຕັ້ງການຄຸ້ມຄອງ ແລະປົກປັກຮັກສາເພື່ອໃຫ້ມີການ ສືບຕໍ່ຂະຫຍາຍພັນເພີ່ມຂຶ້ນ ແລະເພີ່ມຄວາມອຸດົມສົມບູນຂອງປາ ແລະສັດນໍ້າພ້ອມທັງປຸກລະດົມຂົນຂວາຍປະຊາຊົນໃຫ້ຕື່ນຕົວສະໝັກໃຈເປັນແບບຢ່າງໃນການມອບອາວຸດລ້າສັດ ແລະ ເຄື່ອງມືຫາປາແບບດັບສູນໃຫ້ແກ່ອົງການປົກຄອງທ້ອງຖິ່ນຄຸ້ມຄອງຕາມລະບຽບການ; ໃຫ້ກົມລ້ຽງສັດ ແລະ ການປະມົງ, ກົມສົ່ງເສີມເຕັກນິກ ແລະ ປຸງແຕ່ງກະສິກໍາ ແລະ ພະແນກກະສິກໍາ ແລະ ປ່າໄມ້ແຂວງ, ນະຄອນຫຼວງວຽງຈັນຊີ້ນໍາສູນ, ສະຖານີຜະລິດແນວພັນປາຂອງພາກລັດແລະເອກະຊົນໃນການກະກຽມ ຜະລິດ ແລະສະໜອງລູກປາໃນວັນປ່ອຍປາແຫ່ງຊາດໃຫ້ພຽງພໍ ໂດຍເນັ້ນໃສ່ການປ່ອຍປາພັນພື້ນເມືອງ ແລະຫ້າມປ່ອຍປາພັນຕ່າງປະເທດເຊັ່ນ: ປານິນ, ປາໄນ ແລະ ປາດຸກພັນລົງໃສ່ແຫຼ່ງນໍ້າທໍາມະຊາດຊຶ່ງເປັນການທຳລາຍແຫຼ່ງທີ່ຢູ່ອາໄສ ຫຼື ການວາງໄຂ່ຂອງປາພື້ນເມືອງ ລາວ; ໃຫ້ກົມລ້ຽງສັດແລະການປະມົງ ແລະພະແນກກະສິກໍາ ແລະປ່າ ໄມ້ແຂວງ, ນະຄອນຫຼວງວຽງຈັນ ເປັນເຈົ້າການຊຸກຍູ້ຊາວກະສິກອນ ແລະຜູ້ປະກອບການສືບຕໍ່ຂະຫຍາຍການລ້ຽງປາທຸກຮູບແບບເຊັ່ນ: ການລ້ຽງປາໃນໜອງ, ລ້ຽງປາແບບປະສົມປະສານ, ລ້ຽງປາໃນນາເຂົ້າ, ລ້ຽງປາໃສ່ກະຊັງໃຫ້ເປັນຂະບວນ, ພ້ອມທັງເອົາໃຈໃສ່ແນະນໍາທາງດ້ານເຕັກນິກການລ້ຽງ (ການໃຫ້ອາຫານ, ບົວລະບັດຮັກສາ, ປ້ອງກັນພະຍາດ ແລະເກັບກູ້ການຜະລິດ) ໃຫ້ຖືກຕ້ອງຕາມເຕັກນິກວິຊາການຕິດພັນກັບການເພີ່ມຄວາມເຂັ້ມງວດໃນການປະຕິບັດມາດຕະການເກືອດຫ້າມການນໍາໃຊ້ສານເຄມີ ແລະເຄື່ອງມືຫາປາແບບດັບສູນ; ຢ່າງໃດກໍຕາມໃນແຈ້ງການສະບັບດຽວກັນຍັງໄດ້ຫ້າມບຸກຄົນ, ຄອບຄົວ ແລະການຈັດຕັ້ງມີການກະທໍາດັ່ງນີ້:

  1. 1 ຈັບ, ຊື້-ຂາຍ, ສັດນໍ້າ ແລະລ້າສັດປ່າປະເພດຫວງຫ້າມ (ບັນຊີ I) ແລະປະເພດຄຸ້ມຄອງ (ບັນຊີ II) ໃນທຸກລະດູການຢ່າງເດັດຂາດ.
  2. 2. ນໍາເອົາສັດນໍ້າ, ສັດປ່າປະເພດຫວງຫ້າມທີ່ຍັງມີຊີວິດ, ຊາກ, ຊິ້ນສ່ວນ ແລະອະໄວຍະວະຕ່າງໆຂອງສັດອອກຈາກຖິ່ນທີ່ຢູ່ອາໄສ ຫຼືແຫຼ່ງກໍາເນີດມາໄວ້ໃນຄອບຄອງໂດຍບໍ່ໄດ້ຮັບອະນຸຍາດ.
  3. 3. ລ່າສັດນໍ້າ, ສັດປ່າປະເພດທົ່ວໄປ (ບັນຊີ III) ໃນສະຖານທີ່ຫວງຫ້າມ, ເຂດອະນຸລັກພັນສັດ, ເຂດວັງສະຫງວນໂດຍສະເພາະຊ່ວງລະດູປາວາງໄຂ່ ຫຼືເຂົ້າພັນສາ.
  4. 4. ບຸກລຸກທໍາລາຍເຂດອະນຸລັກພັນສັດ, ວັງສະຫງວນ, ຖິ່ນທີ່ຢູ່ອາໄສ ແລະແຫຼ່ງອາຫານຂອງສັດນໍ້າ ແລະສັດປ່າໂດຍທາງກົງແລະທາງອ້ອມເຊັ່ນ: ດ້ວຍການບຸກເບີກ, ຕັ້ງຖິ່ນຖານໃໝ່, ຖາກຖາງປ່າໄມ້, ຈູດປ່າ, ຕັດໄມ້, ນໍາໃຊ້ຢາປາບສັດຕູພືດ ແລະຢາຂ້າຫຍ້າເກີນກໍານົດ ແລະການກະທໍາອື່ນໆທີ່ບໍ່ຖືກຕ້ອງຕາມລະບຽບກົດໝາຍ.
  5. 5. ຈັບຈອງ, ຍ້າຍ, ປ່ຽນແປງ ຫຼືທໍາລາຍເຄື່ອງໝາຍເຂດແດນວັງສະຫງວນ, ເຂດອະນຸລັກພັນສັດ ແລະຖິ່ນທີ່ຢູ່ອາໄສ.
  6. 6. ຫາປາໃນຊ່ວງລະດູວາງໄຂ່ ຫຼືຊ່ວງເຂົ້າພັນສາຢູ່ຕາມເຂດທີ່ປາຂຶ້ນວາງໄຂ່ເປັນຕົ້ນແມ່ນເຂດວັງສະຫງວນຕ່າງໆ.
  7. 7. ຕັນທາງເດີນຂອງປາຂຶ້ນວາງໄຂ່ຕາມຫ້ວຍ ແລະ ສາຍນໍ້າດ້ວຍວິທີການເຮັດຕ້ອນ, ເຮັດລີ່, ໃສ່ລອບ ຫຼືໂຕ່ງ, ມອງຕາຖີ່, ນໍາໃຊ້ລະເບີດ, ທາດເບື່ອ, ສານເຄມີ, ໃຊ້ ໄຟຟ້າຊ໊ອດ ແລະເຄື່ອງມືຫາປາທີ່ມີລັກສະນະດັບສູນ.
  8. 8. ມີພຶດຕິກໍາອື່ນທີ່ເປັນການລະເມີດລະບຽບກົດໝາຍກ່ຽວກັບສັດນໍ້າ ແລະ ສັດປ່າ ແລະ ກົດໝາຍວ່າດ້ວຍການປະມົງ.

  ກໍລະນີພົບເຫັນຜູ້ລະເມີດຂໍ້ຫ້າມດັ່ງກ່າວໃຫ້ສົມທົບກັບພາກສ່ວນກ່ຽວຂ້ອງດໍາເນີນມາດຕະການກ່າວເຕືອນ, ສຶກສາອົບຮົມ, ປັບໃໝ ແລະດໍາເນີນຄະດີຢ່າງເຂັ້ມງວດຕາມແຕ່ລະກໍລະນີເບົາ ຫຼື ໜັກທີ່ໄດ້ກໍານົດໄວ້ໃນກົດໝາຍວ່າດ້ວຍສັດນໍ້າ ແລະ ສັດປ່າ ເລກທີ 7/ສພຊ, ລົງວັນທີ 24 ທັນວາ 2007 ແລະ ກົດໝາຍວ່າດ້ວຍການປະມົງ ເລກ ທີ 3/ສພຊ, ລົງວັນທີ 9 ກໍລະກົດ 2009.

แชร์