ກົມຄຸ້ມຄອງຊັບສິນຂອງລັດເປີດຊອງປະມູນຂາຍໄມ້

    ບ່າຍວັນທີ 18 ມິຖຸນາ 2021 ຜ່ານມາທີ່ກະຊວງການເງິນ, ກົມຄຸ້ມຄອງຊັບສິນຂອງລັດໄດ້ເປີດຊອງປະມູນຂາຍໄມ້ຂອງລັດປະເພດຕ່າງໆທີ່ເປັນຂອງກາງຄະດີທີ່ມອບໃຫ້ກົມຄຸ້ມຄອງຊັບສິນຂອງລັດ, ສະສາງອອກຕາມລະບຽບກົດໝາຍດ້ວຍຮູບການປະມູນແບບເປີດກວ້າງ, ໂດຍມີທ່ານ ທອງລິດ ກິ່ງແກ້ວອຸດົມ ຫົວໜ້າພະແນກຈັດຊື້-ຈັດຈ້າງດ້ວຍທຶນຂອງລັດກົມຄຸ້ມຄອງຊັບສິນຂອງລັດກະຊວງການເງິນເປັນປະທານ, ພ້ອມດ້ວຍຄະນະກຳມະການປະມູນ ແລະຜູ້ຮ່ວມປະມູນເຂົ້າຮ່ວມ.

    ສຳລັບການປະມູນຄັ້ງນີ້ໄດ້ເປີດຂາຍຊອງປະມູນນັບແຕ່ໃນວັນທີ 7-17 ມິຖຸນາ 2021 ໃນລາຄາຊອງປະມູນ 5 ແສນກີບຕໍ່ຊອງ, ຊຶ່ງໄດ້ກຳນົດລາຄາກາງມູນຄ່າ 618.719.144 ກີບ. ໃນນັ້ນ, ປະກອບມີໄມ້ປະເພດຕ່າງໆ (ໄມ້ລວມ) ຈຳນວນ 92,497 ແມັດກ້ອນ, ໄມ້ຂະຍຸງ (ຕິດເປັນກິໂລ) ຈຳນວນ 751,5 ກິໂລ.

   ການປະມູນໄດ້ດໍາເນີນໄປດ້ວຍຮູບການປະມູນແບບເປີດກວ້າງໃຫ້ບຸກຄົນ, ນິຕິບຸກຄົນ ແລະການຈັດຕັ້ງຕ່າງໆຢູ່ ສປປ ລາວ ມີສິດເຂົ້າຮ່ວມສະເໜີລາຄາປະມູນ, ຊຶ່ງການປະມູນແມ່ນໄດ້ປະມູນເປັນເງິນກີບ ແລະຂາຍແບບມອບເໝົາທັງໝົດ (ບໍ່ແຍກຂາຍ).

  ສ່ວນຜູ້ເຂົ້າຮ່ວມປະມູນມີທັງໝົດ 5 ທ່ານ, ສ່ວນຜູ້ຊະນະການປະມູນໂດຍແມ່ນທ່ານ ຟາມ ກວາງ ດິກ (Pham quang Dich) ເປັນຜູ້ຊະນະການປະມູນດ້ວຍລາຄາ 640 ລ້ານກີບ.

ຂ່າວ: ກະຊວງການເງິນ

แชร์