ເຈົ້າເມືອງທ່າພະບາດ ຊຸກຍູ້ກຸ່ມຜະລິດກະສິກໍາເປັນສິນຄ້າ

  ໃນວັນທີ 16 ມິຖຸນາ 2021 ທ່ານ ສົມສົດ ແສງອາພອນ ເຈົ້າເມືອງທ່າພະບາດພ້ອມດ້ວຍຄະນະໄດ້ລົງຢ້ຽມຢາມການຈັດຕັ້ງປະຕິບັດໂຄງການຜະລິດກະສິກໍາເປັນສິນຄ້າຢູ່ບ້ານທວາຍໃຫຍ່ເມືອງທ່າພະບາດ ແຂວງບໍລິຄຳໄຊ.

ເມືອງທ່າພະບາດເປັນເມືອງໜຶ່ງທີ່ນອນຢູ່ໃນໂຄງການຜະລິດກະສິກໍາເປັນສິນຄ້າປະຈໍາ ແຂວງບໍລິຄໍາໄຊ, ປະກອບມີ 9 ບ້ານ ແລະບ້ານທວາຍໃຫຍ່ກໍ່ເປັນບ້ານໜຶ່ງຂອງເມືອງທ່າພະບາດທີ່ໄດ້ຮັບທຶນຈາກໂຄງການຜະລິດກະສິກໍາເປັນສິນຄ້າ.

   ມາຮອດປະຈຸບັນບ້ານທວາຍໃຫຍ່ໄດ້ມີຂະບວນການຈັດຕັ້ງກຸ່ມຜະລິດເຂົ້າເປັນສິນຄ້າ 1 ກຸ່ມ ມີ 50 ຄອບຄົວເຂົ້າຮ່ວມເນື້ອທີ່ທໍາການຜະລິດ 54,51 ເຮັກຕາ ແລະກຸ່ມຜະລິດແນວພັນເຂົ້າ 2 ກຸ່ມ, ກຸ່ມບ້ານທວາຍໃຫຍ່ 1 ມີ 20 ຄອບຄົວເນື້ອທີ່ທໍາການຜະລິດ 22,50 ເຮັກຕາ ແລະກຸ່ມບ້ານທວາຍໃຫຍ່ 2 ມີ 21 ຄອບຄົວ ເນື້ອ ທີ່ທໍາການຜະລິດ 16,28 ເຮັກຕາ ຊຶ່ງໃນການຈັດຕັ້ງກຸ່ມທາງໂຄງການຜະລິດກະສິກໍາເປັນສິນຄ້າໄດ້ຕອບສະໜອງທຶນໃຫ້ກຸ່ມ ຈຳນວນເງິນ 16.000 ໂດລາ, ໂຄງ ການໄດ້ມອບວັດຖຸອຸປະກອນເພື່ອໃຫ້ໄດ້ມີຄຸ້ມຄອງ ແລະນໍາໃຊ້ເຂົ້າໃນການຜະລິດປະກອບມີລົດໄຖນາໃຫຍ່ L5018 ຈໍານວນ 1 ຄັນ ມູນຄ່າ 242,25 ລ້ານກີບ, ລົດກ່ຽວເຂົ້າເດີນຕາມ k50 ຈໍານວນ 2 ຄັນມູນຄ່າ 80,16 ລ້ານກີບ, ລົດດໍານາຄູໂບຕ້າລຸ້ນ  SPW-48 C ຈໍານວນ 2 ຄັນມູນຄ່າ 50,1 ລ້ານກີບຕໍ່ຄັນເປັນເງິນ 100 ລ້ານກວ່າກີບ ແລະແຕະຕົກກ້າຈໍານວນ 3.200 ແຕະ.

 ໂອກາດດັ່ງກ່າວທ່ານເຈົ້າເມືອງໄດ້ໂອ້ລົມຢ້ຽມຢາມຄອບຄົວ ທ່ານ ພົມມາ ທີ່ນໍາໃຊ້ເທັກນິກວິທະຍາສາດເຂົ້າໃນຜະລິດກະສິກໍາແບບປະສົມປະສານໂດຍມີການຂະຫຍາຍພັນໄມ້ໃຫ້ໝາກ, ໄມ້ປະດັບ, ເພາະພັນປາ, ເພາະພັນກົບທີ່ສາມາດຈຳໜ່າຍ ແລະສວນຢາງພາລາ 600 ຕົ້ນ, ນອກນີ້ຍັງໄດ້ມີຂະຫຍາຍພັນໄມ້ໃຫ້ໝາກ, ໄມ້ປະດັບຊຶ່ງປີນີ້ລາຍໄດ້ຈາກການຂາຍເບ້ຍໄມ້ທີ່ສ້າງລາຍຮັບເຂົ້າສູ່ຄອບຄົວ 7 ລ້ານກີບ, ທ່ານ ພົມມາ ຍັງໃຫ້ຮູ້ອີກວ່າ: ໃນການຜະລິດກະສິກຳແບບປະສົມປະສານນີ້ສາມາດສ້າງລາຍໄດ້ໃຫ້ຄອບຄົວສາມາດເຮັດໃຫ້ຄອບຄົວມີຄວາມຢູ່ດີ, ກິນດີ ແລະສາມາດນຳພາຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ.

แชร์