ຈັບໂຈນກໍ່ເຫດເກືອບ 30 ຄັ້ງ ລັກລົດ 23 ຄັນ

 ໃນວັນ 21 ມິຖຸນາ 2021ນີ້, ເຈົ້າໜ້າທີ່ ປກສ ນະຄອນໄກສອນ ພົມວິຫານ ໄດ້ນໍາເອົາລົດຈັກເວັບ 100 ຈໍານວນ 8 ຄັນ ທີ່ເກັບກູ້ໄດ້ຈາກຄະດີລັກຊັບພົນລະເມືອງ ມອບໃຫ້ເຈົ້າຂອງເດີມຊຶ່ງກ່າວມອບໂດຍທ່ານ ພັຕ ພອນໄຊ ກຸນນຸວົງ ຮອງຫົວໜ້າພະແນກຕຳຫຼວດກອງບັນຊາການ ປກສ ນະຄອນຜູ້ຊີ້ນຳວຽກງານສືບສວນ-ສອບສວນ.

   ທ່ານ ພັຕ ພອນໄຊ ກຸນນຸວົງ ໄດ້ໃຫ້ຮູ້ວ່າ: ໃນໄລຍະຜ່ານມາ, ໄດ້ມີເຫດການຄົນຮ້າຍໄດ້ເຄື່ອນໄຫວກໍ່ເຫດປຸ້ນຊັບ, ຊີງຊັບ ແລະລັກຊັບພົນລະເມືອງ (ລັກລົດຈັກ) ຢູ່ພາຍໃນນະຄອນໄກສອນ ພົມວິຫານ ເຮັດໃຫ້ເກີດຜົນເສຍຫາຍຕໍ່ຊັບສິນຂອງປະຊາຊົນຕໍ່ກັບສະພາບການດັ່ງກ່າວ, ເຈົ້າໜ້າທີ່ ປກສ ນະຄອນກໍ່ໄດ້ລົງເກັບຂໍ້ມູນຫຼັກຖານໃນສະຖານເປົ້າໝາຍທີ່ເກີດເຫດ, ຈົນມາວັນທີ 18 ພຶດສະພາ 2021 ໃນເວລາ 17 ໂມງ ເຈົ້າໜ້າທີ່ ປກສ ນະຄອນ ຈຶ່ງໄດ້ກັກ ຕົວທ້າວ ພອນສະຫວັນ ຫຼື ອ້າຍ ອາຍຸ 35 ປີ ອາຊີບວ່າງງານບ້ານໄຊຍະພູມ, ນະຄອນໄກສອນພົມວິຫານ ແຂວງສະຫວັນນະເຂດ.

   ຜ່ານການສືບສວນ-ສອບສວນ, ທ້າວ ພອນສະຫວັນ ສາລະພາບວ່າ: ໄດ້ເຄື່ອນໄຫວກໍ່ເຫດກະທຳຜິດຢູ່ພາຍໃນນະຄອນໄກສອນ ພົມວິຫານ ມີທັງໜົດຈຳນວນ 29 ເຫດການຄື: ປຸ້ນຊັບ 1 ຄັ້ງ, ຊິງຊັບ 3 ຄັ້ງ, ສໍ້ໂກງຊັບ 1 ແລະລັກຊັບພົນລະເມືອງ 24 ຄັ້ງ ໃນນັ້ນໄດ້ລັກລົດຈັກ 23 ຄັ້ງເຊີ່ງຜູ້ກ່ຽວໄດ້ໃຊ້ມີດຈີ້ນາບຂູ່ປຸ້ນເອົາຊັບສິນຂອງສິນຂອງຜູ້ເສຍຫາຍຢູ່ຫ້ອງເຊົ່າຫຼັກ 8, ບ້ານອຸດົມວິໄລ ນະຄອນໄກ ສອນພົມວິຫານ, ໄດ້ຊີງຊັບດຶງກະເປົ໋າ ສອງແມ່ລູກ ຈົນເຮັດໃຫ້ລົດລົ້ມຢູ່ໜ້າ ພັດທະຄານຮຸ່ງທິບບ້ານທ່າເມືອງ, ໂດຍໄດ້ຮ່ວມກັບທ້າວ ວິຊຸນ ຫຼືຕຸກ ຊີງຊັບໄດ້ດຶງເອົາກະເປົ໋າຢູ່ຮ້ານອາຫານໂຊກໄຊ ບ້ານໂພນສະຫວ່າງໃຕ້ ແລະດຶງເອົາເປົ໋າຢູ່ຮ້ານເຊີ້ບ້ານໂນນສະ ຫວາດ ນະຄອນໄກສອນ ພົມວິຫານ, ໄດ້ສໍ້ໂກງຊັບໂດຍໃຊ້ຮູບການຕົວຢືມເອົາລົດຈັກ 1 ຄັນ ແລ້ວເອົາໄປຂາຍເລີຍ, ໄດ້ເຂົ້າໄປລັກໂນດບຸກຂອງຄູບາຢູ່ກຸດຕິພາຍໃນວັດ ໃຫຍ່ໄຊຍະພູມ 1 ຄັ້ງ, ຊຶ່ງຜູ້ກ່ຽວແມ່ນໄດ້ເຄື່ອນໄຫວໂດຍການເລາະຫາລັກລົດຈັກໄດ້ທັງໜົດ 23 ຄັ້ງ ແລະຜົນເສຍ ຫາຍລົດຈັກຈຳນວນ 23 ຄັນ ແລະຍັງໄດ້ຮ່ວມກັບເມຍຊື່ນາງກຸ້ງ ໄປລັກລົດ ຈັກຈຳນວນ 2 ຄັນອີກ.

   ມາຮອດວັນທີ 2 ມິຖຸນາ 2021, ຈຶ່ງເຈົ້າໜ້າທີ່ ປກສ ນະຄອນໄກສອນ ພົມວິຫານ ໄດ້ປະສານສົມທົບກັບທຸກພາກສວນໄລ່ນຳລົດຈັກທີ່ທ້າວ ພອນສະຫວັນ ຫຼື ອ້າຍ ໄດ້ນຳໄປຂາຍມີຈຳນວນ 19 ຄັນ, ໄດ້ເຄື່ອງຂອງກາງລົດ ແລະສາມາດເກັບກູ້ຄືນມາໄດ້ຈຳນວນ 8 ຄັນ ແລະທາງເຈົ້າໜ້າທີ່ ປກສ ນະຄອນ ຈຶ່ງໄດ້ກວດກາ ແລະໄດ້ມອບລົດຈັກຈຳນວນໜຶ່ງຄືນໃຫ້ເຈົ້າຂອງເດີມ, ສ່ວນຜູ້ກະທຳຜິດແມ່ນຈະໄດ້ດຳເນີນຄະດີຕາມລະບຽບກົດໝາຍ ແລະສ່ວນພາຫະນະທີ່ຍັງເຫຼືອແມ່ນຈະໄດ້ສືບຕໍ່ໄລ່ນຳເກັບກູ້ຄືນເພື່ອສົ່ງຄືນໃຫ້ເຈົ້າຊັບຕໍ່ໄປ.

   ໃນໂອກາດນີ້, ທ່ານ ພັຕ ພອນໄຊ ກຸນນຸວົງ ໄດ້ຮຽກຮ້ອງມາຍັງປະຊາຊົນ, ຊາວຄ້າຂາຍ, ນັກຮຽນ-ນັກສຶກສາ ແລະຜູ້ປະກອບການຕ່າງໆ ໃຫ້ມີສະຕິວັງຕົວໃນການຮັກສາຊັບສິນຂອງຕົນເປັນຕົ້ນແມ່ນລົດຈັກໃຫ້ຈອດໄວ້ບ່ອນທີ່ມີຄວາມປອດໄພພ້ອມທັງເປັນຫູເປັນຕາຊ່ວຍເຈົ້າໜ້າທີ່ຖ້າພົບເຫັນເຫດການບໍ່ດີໃຫ້ຮີບຮ້ອນລາຍງານຕໍ່ເຈົ້າໜ້າທີ່ເພື່ອແກ້ໄຂເຫດການໃຫ້ທັນເວລາ.

แชร์