ມອບ-ຮັບສິ່ງເສດເຫຼືອທະຫານອາເມລິກາເສຍຊີວິດປາງສົງຄາມຢູ່ລາວ

   ວັນທີ 22 ມິຖຸນາ 2021, ທີ່ສະໜາມບິນສາກົນວັດໄຕ, ນະຄອນຫຼວງວຽງຈັນ, ໄດ້ມີການຈັດພິທີມອບ-ຮັບສິ່ງເສດເຫຼືອຂອງທະຫານອາເມລິກາທີ່ເສຍຊີວິດໃນປາງສົງຄາມຢູ່ລາວ, ທີ່ໄດ້ຮັບຈາກການປະຕິບັດງານຮ່ວມຢູ່ພາກສະໜາມຂອງຄະນະວິຊາການລາວ-ອາເມລິກາ ໃນການສໍາຫຼວດ ແລະຂຸດຄົ້ນເພື່ອຊອກຫາຮ່ອງຮອຍ ແລະສິ່ງເສດເຫຼືອຂອງທະຫານອາເມລິກາທີ່ເສຍຊີວິດໃນປາງສົງຄາມຢູ່ລາວ ຄັ້ງທີ 4 ປະຈໍາສົກປີ 2020-2021 ຢູ່ ເຂດເມືອງບົວລະພາ, ແຂວງຄໍາມ່ວນ.

    ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນໍາວຽກງານສໍາຫຼວດ ແລະຂຸດຄົ້ນເພື່ອຊອກຫາຮ່ອງຮອຍ ແລະສີ່ງເສດເຫຼືອຂອງທະຫານອາເມລິກາທີ່ເສຍຊີວິດໃນປາງສົງຄາມຢູ່ລາວໄດ້ຕາງໜ້າໃຫ້ລັດຖະບານແຫ່ງ ສປປ ລາວ ເປັນກຽດເຂົ້າຮ່ວມ ແລະ ກ່າວມອບ ແລະ ທ່ານ Dr. Peter Haymond, ເອກອັກຄະລັດຖະທູດສະຫະລັດອາເມລິກາ ປະຈໍາ ສປປ ລາວ ໄດ້ຕາງໜ້າໃຫ້ແກ່ລັດຖະບານສະຫະລັດອາເມລິກາກ່າວຮັບ, ນອກນີ້ຍັງມີເຈົ້າໜ້າທີ່ ກ່ຽວຂ້ອງຈາກກະຊວງການຕ່າງປະເທດ, ກະຊວງປ້ອງກັນປະເທດ ແລະນະຄອນຫຼວງວຽງຈັນ, ມີບັນດາພະນັກງານວິຊາການທັງສອງຝ່າຍ ລາວ-ອາເມລິກາ ທີ່ເຮັດວຽກຕົວຈິງຢູ່ພາກສະໜາມຈໍານວນໜຶ່ງກໍ່ໄດ້ເຂົ້າຮ່ວມ.

   ໃນການປະຕິບັດງານຄັ້ງນີ້ຄະນະວິຊາການຮ່ວມໄດ້ຄົ້ນພົບສິ່ງເສດເຫຼືອຂອງທະຫານອາເມຣິກາຢູ່ເຂດບ້ານຫີນລັບ ແລະບ້ານໜອງມ້າ, ເມືອງບົວລະພາ, ແຂວງຄໍາມ່ວນ, ບົນຈິດໃຈແຫ່ງການປະຕິບັດນະໂຍບາຍມະນຸດສະທໍາອັນສະເໝີຕົ້ນສະເໝີປາຍຂອງລັດຖະບານແຫ່ງ ສປປ ລາວ, ຄະນະວິຊາການຮ່ວມ ລາວ-ອາເມລິກາ ໄດ້ຮ່ວມມືກັນດໍາເນີນການສໍາຫຼວດ ແລະຂຸດຄົ້ນເພື່ອຊອກຄົ້ນຫາຮ່ອງຮອຍ ແລະສິ່ງເສດເຫຼືອຂອງທະຫານອາເມລິກາທີ່ເສຍຊີວິດໃນປາງສົງຄາມຢູ່ລາວ, ແຕ່ເໜືອຕະຫຼອດໃຕ້, ໃນຂອບເຂດທົ່ວປະເທດ ແລະໃຊ້ເວລາຫຼາຍກວ່າ 30 ປີ ມາແລ້ວ, ຕະຫຼອດໄລຍະເວລາແຫ່ງການຮ່ວມມືນັ້ນ, ຄະນະວິຊາການສອງຝ່າຍໄດ້ຮັບການສະໜັບສະໜູນ ແລະຊ່ວຍເຫຼືອຈາກເຈົ້າໜ້າທີ່ທ້ອງຖິ່ນກໍ່ຄືພໍ່ແມ່ປະຊາຊົນໃນຂົງເຂດທີ່ມີການສໍາຫຼວດ ແລະຂຸດຄົ້ນຢ່າງຕັ້ງໜ້າຕາມເງື່ອນໄຂ ແລະຄວາມອາດສາມາດຕົວຈິງຂອງຕົນອັນເຮັດໃຫ້ການຮ່ວມມືສອງຝ່າຍດ້ານນີ້ໄດ້ຮັບຜົນສໍາເລັດເປັນທີ່ໜ້າເພິ່ງພໍໃຈ ແລະເປັນປັດໃຈໜຶ່ງທີ່ສໍາຄັນໃນການຊຸກຍູ້ ແລະສົ່ງເສີມການພົວພັນຮ່ວມມືໃນດ້ານຕ່າງໆລະຫວ່າງລາວ ແລະອາເມລິກາໃຫ້ນັບມື້ນັບດີຂຶ້ນ.

ຜ່ານການປະຕິບັດງານຮ່ວມສອງຝ່າຍລາວ-ອາເມລິກາ ໄລຍະຜ່ານມາສາມາດຄົ້ນພົບສິ່ງເສດເຫຼືອຂອງທະຫານອາເມລິກາທີ່ໄດ້ຢັ້ງຢືນ ແລະສົ່ງມອບໃຫ້ຝ່າຍອາເມລິກາ ຈຳນວນ 288 ຄົນ ໃນຈໍານວນຜູ້ຫາຍສາບສູນທັງໝົດ 573 ຄົນ ຫຼື ຫຼາຍກວ່າ 50% ແລະ ຍັງອີກ 285 ຄົນ ທີ່ຈໍາເປັນຈະຕ້ອງສືບຕໍ່ຂຸດຄົ້ນຫາ, ຊຶ່ງລັດຖະບານລາວຢືນຢັນຈະສືບຕໍ່ໃຫ້ການຮ່ວມມືກັບຝ່າຍອາເມລິກາບົນພື້ນຖານຄວາມອາດສາມາດ ແລະເງື່ອນໄຂຕົວຈິງຂອງຕົນ.

ຂ່າວ: ນະຄອນຫຼວງວຽງຈັນ 

แชร์