ລາວຮ່ວມປະຊຸມລັດຖະມົນຕີພະລັງງານອາຊຽນ-ຍີ່ປຸ່ນ

   ກອງປະຊຸມສະໄໝພິເສດລະດັບລັດຖະມົນຕີພະລັງງານອາຊຽນຢີ່ປຸ່ນ (AMEM-METI) ໄດ້ຈັດຂຶ້ນຢ່າງເປັນທາງການໃນວັນທີ 21 ມິຖຸນາ 2021 ຜ່ານວິດີໂອທາງໄກ, ຄະນະຜູ້ແທນ ສປປ ລາວ ນຳພາໂດຍ ທ່ານ ປອ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ພ້ອມຄະນະຈາກບັນດາກົມ ແລະ ຂະ ແໜງການກ່ຽວຂ້ອງເຂົ້າຮ່ວມ.

    ກອງປະຊຸມສະໄໝພິເສດຂັ້ນລັດຖະມົນຕີພະລັງງານອາຊຽນ-ຍີ່ປຸ່ນ (AMEM-METI) ຄັ້ງນີ້, ຈັດຂຶ້ນພາຍໃຕ້ຫົວຂໍ້ “Enhancing Partnership in Realising Energy Transitions in ASEAN”. ການເຂົ້າຮ່ວມກອງປະຊຸມດັ່ງກ່າວແມ່ນມີຈຸດປະສົງເພື່ອເປັນການຮ່ວມມືລະຫວ່າງອາຊຽນ ແລະຍີ່ປຸ່ນໃນການຫັນປ່ຽນພະລັງງານສູ່ກາກບອນຕໍ່າ, ການເຕີບໂຕສີຂຽວ ແລະເປັນການຈັບມືຮ່ວມກັນເພື່ອແນ່ໃສ່ຢາງຮີບດ່ວນຟື້ນຟູສະພາບເສດຖະກິດຫຼັງການລະບາດຂອງພະຍາດ COVID-19 ແລະແກ້ໄຂຜົນກະທົບຕໍ່ສິ່ງແວດລ້ອມ.

    ພ້ອມກັນນີ້, ກອງປະຊຸມຍັງໄດ້ມີການຮັບຮອງເອົາຖະແຫຼງການຮ່ວມ “Joint Statement of the Special Meeting of the ASEAN Mini sters on Energy and Minister of Economy, Trade and Industry of Japan” ເພື່ອເປັນກອບພື້ນຖານລວມໃຫ້ແກ່ການຮ່ວມມືໃນການຫັນປ່ຽນພະລັງງານໃນພາກພື້ນອາຊີກໍ່ຄືອາຊຽນໂດຍແນໃສ່ການຈັດຕັ້ງປະຕິບັດໃຫ້ສອດຄ່ອງກັບນະໂຍບາຍທີ່ເປັນອັນສະເພາະຂອງແຕ່ລະປະເທດ ແລະແຜນປະຕິບັດ ງານອາຊຽນ (APAEC) 2016-2025 ໄລຍະທີ 2: 2021-2025 ພາຍໃຕ້ຫົວ ຂໍ້”Accelerating Energy Transi tion and Strengthening Energy Resilience through Greater Innovation and Cooperation” ຕື່ມອີກ.

ຂ່າວ: ຄຳແສງ ແກ້ວປະເສີດ 

แชร์