ວັງວຽງ ເສຍຫາຍນໍ້າຖ້ວມ 15 ຕື້ກວ່າກີບ

   ອີງຕາມການລົງເກັບກຳຂໍ້ມູນຈາກຂະແໜງການທີ່ກ່ຽວຂ້ອງຂອງ ເມືອງວັງວຽງ ພາຍຫຼັງທີ່ໄດ້ຮັບຜົນເສຍຫາຍຈາກໄພນໍ້າຖ້ວມລະຫວ່າງວັນທີ 13-14 ມິຖຸນາ 2021 ມີ 618 ຄອບຄົວໄດ້ຮັບຜົນກະທົບໂດຍສະເພາະທີ່ຢູ່ອາໄສເຮືອນເຄື່ອງຂອງປູກຝັງ ແລະສັດລ້ຽງຂອງປະຊາຊົນໂດຍສະເລ່ຍການ ເສຍຫາຍ 15 ຕື້ກວ່າກີບ.

   ທ່ານ ກວຽນ ທອງເທບທິດາ ຮອງເຈົ້ງເມືອງໆວັງວຽງ ແຂວງວຽງຈັນ ລາຍງານຕໍ່ນັກຂ່າວພວກເຮົາຮູ້ວ່າ: ນັບແຕ່ວັນທີ 13 ມິຖຸນາ 2021 ເນື່ອງຈາກສະພາບອາກາດໃນຊ່ວງລະດູຝົນ ແລະຜົນກະທົບຈາກພາຍຸທີ່ພັດຜ່ານເຂົ້າສູ່ ສປປ ລາວ ເຮັດໃຫ້ເກືອບທົ່ວທຸກພາກສ່ວນຂອງປະເທດໄດ້ຮັບຜົນກະທົບຊຶ່ງ ເມືອງວັງວຽງ ກໍ່ເປັນພື້ນທີ່ໜຶ່ງທີ່ໄດ້ຮັບຜົນກະທົບຈາກພາຍຸດັ່ງກ່າວນີ້ພໍສົມຄວນເນື່ອງຈາກໄດ້ມີຝົນຕົກໜັກຫຼາຍວັນຕໍ່ເນື່ອງຫຼາຍວັນອັນໄດ້ເຮັດໃຫ້ແມ່ນໍ້າຊອງ ແລະແມ່ນໍ້າຫຼາຍສາຍໄດ້ມີປະລິມານນໍ້າເພີ່ມຂຶ້ນຢ່າງໄວວາ ແລະນໍ້າໄຫຼເຂົ້າຖ້ວມບ້ານເຮືອນ ແລະພື້ນທີ່ທຳການຜະລິດຂອງປະຊາຊົນໂດຍສະເພາະແມ່ນບ້ານເຮືອນທີ່ຢູ່ລຽບຕາມແຄມນໍ້າຊອງ ແມ່ນໄດ້ຮັບຜົນກະທົບໜັກພໍສົມຄວນ, ຄະນະນຳຂອງເມືອງວັງວຽງ ໄດ້ເອົາໃຈໃສ່ລົງຕິດຕາມ ແລະໃຫ້ການຊ່ວຍເຫຼືອແກ່ປະຊາຊົນຜູ້ທີ່ໄດ້ຮັບຜົນກະທົບໃນຄັ້ງນີ້ຢ່າງຮີບດ່ວນ ໂດຍສົບທົບກັບກອງກຳລັງ ປກຊ ແລະອົງການປົກຄອງບ້ານ; ຜ່ານການລົງຕິດຕາມສາມາດສັງລວມຜົນເສຍຫາຍເບື້ອງຕົ້ນນໍ້າຖ້ວມໃນຄັ້ງນີ້ເຮັດໃຫ້ເສັ້ນທາງຫຼາຍເສັ້ນບໍ່ສາມາດສັນຈອນໄດ້ເປັນເວລາຫຼາຍຊົ່ວໂມງເປັນຕົ້ນແມ່ນ ທາງເລກທີ 13 ເໜືອ ເຂດບ້ານຫີນຂັນໝາກ, ເສັ້ນທາງລຽບນໍ້າຊອງເຂດບ້ານຫ້ວຍແຍ້ ແລະບ່ອນອື່ນໆ, ເສັ້ນທາງພາຍໃນບ້ານຂັນໝາກ ແລະບ້ານວັງຊອງຍັງມີນໍ້າຖ້ວມມີພຽງບາງຈຸດສາມາດນຳໃຊ້ໄດ້, ມີເສັ້ນທາງຫຼາຍຈຸດທີ່ຖືກນໍ້າຖ້ວມເຊາະເຈື່ອນເຮັດໃຫ້ເສັ້ນທາງໄດ້ຮັບຄວາມເສຍຫາຍຫຼາຍສົມຄວນ.

 ພື້ນທີ່ທຳການຜະລິດຢູ່ແຕ່ລະບ້ານກໍ່ໄດ້ຖືກນໍ້າຖ້ວມຫຼາຍສົມຄວນຫາກຝົນຍັງສືບຕໍ່ຕົກ ຫຼືນໍ້າຖ້ວມແກ່ຍາວເປັນເວລາຫຼາຍມື້ອາດເຮັດໃຫ້ຕົ້ນເຂົ້າເສຍຫາຍໜັກ,ໜອງລ້ຽງປາຂອງປະຊາຊົນຈຳນວນໜຶ່ງກໍ່ໄດ້ຮັບຜົນກະທົບນໍ້າທີ່ຖ້ວມເຮັດໃຫ້ປາອອກຈາກໜອງຜູ້ລ້ຽງປາແມ່ນໄດ້ຮັບຜົນກະທົບພໍສົມຄວນ; ນອກຈາກນັ້ນພື້ນທີ່ປູກພືດພັກທີ່ຢູ່ລຽບແຄມນໍ້າກໍ່ໄດ້ຮັບຜົນເສຍຫາຍໜັກເຊັ່ນກັນ.

   ສຳລັບສຳການເສຍຫານນໍ້າຖ້ວມຄັ້ງນີ້ 1 ຂົງເຂດໂຍທາ ແລະຂົນສົ່ງມີຂົວເປ່ເພຈຳນວນ 4 ແຫ່ງ, ເສັ້ນທາງ 8 ເສັ້ນອາຄານເສຍຫາຍ 7 ຫຼັງ, ກຳແພງເຈື່ອນ 2 ແຫ່ງ,ນໍ້າສ້າງ 200 ໜ່ວຍ ແລະລົດພາຫະນະຈຳນວນໜຶ່ງ, ກຳສິກຳເນື້ອທີ່ທົ່ງນາ 44 ເຮັກຕາ, ຟາມລ້ຽງສັດ 1 ແຫ່ງສັດລ້ຽງ 12.835 ໂຕ,ສັດປີກ 12.228 ໂຕ, ຝາຍເປເພຈຳນວນ 4 ແຫ່ງ ນອກນີ້ຍັງມີໂຮມແຮມ ແລະຮ້ານອາຫານເສຍຫາຍ 33 ແຫ່ງ ຊຶ່ງສະເລ່ຍມູນຄ່າເສຍຫາຍທັງໝົດ 15,683.110.068 ຕື້ກີບ.

  ແນວໃດກໍ່ຕາມປະຈຸບັນຂະແໜງການທີ່ກ່ຽວຂ້ອງໄດ້ສືບຕໍ່ລົງເກັບກຳຂໍ້ມູນຄວາມເສຍຫາຍ, ເລັ່ງໃຫ້ການຊ່ວຍເຫຼືອເບື້ອງຕົ້ນ ແລະຍັງຈະໄດ້ເອົາໃຈໃສ່ກ່ຽວກັບການທຳຄວາມສະອາດບ້ານເຮືອນສີດຟົ່ນຢາຂ້າເຊື້ອພະຍາດເພື່ອປ້ອງກັນພະຍາດທີ່ອາດຈະເກີດຂຶ້ນ.

แชร์