2 ບໍລິສັດ ຮັບອະນຸຍາດສຳຫຼວດແຮ່ທາດທີ່ໄຊສົມບູນ

   ພິທີເຊັນບົດບັນທຶກຄວາມເຂົ້າໃຈ MOU ເພື່ອຊອກຄົ້ນ, ສຳຫຼວດ ແລະສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ, ແຮ່ຄຳ ແລະແຮ່ຕິດພັນຢູ່ເຂດບ້ານວັງໄຮ, ບ້ານປາກຍອງ ແລະບ້ານຄອນຊະນະ, ເມືອງທ່າໂທມ ຂອງບໍລິສັດ CK (ຊີເຄ) ການຄ້າ ຂາອອກຂາເຂົ້າ ຈຳກັດຜູ້ດຽວ ແລະ ບົດບັນທຶກຄວາມເຂົ້າໃຈ MOU ເພື່ອຊອກຄົ້ນ, ສຳຫຼວດ ແລະສຶກສາຄວາມເປັນໄປໄດ້ທາງດ້ານເສດຖະກິດເຕັກນິກແຮ່ຄຳ, ແຮ່ທອງ, ແຮ່ເຫຼັກ ແລະແຮ່ຕິດພັນຢູ່ເມືອງລ້ອງແຈ້ງແຂວງໄຊສົມບູນຂອງບໍລິສັດ ໄທຢຸ້ຍ ( ລາວ ) ພັດທະນາບໍ່ແຮ່ຈຳກັດຜູ້ດຽວຊຶ່ງເປັນຄູ່ຮ່ວມມືກັບບໍລິສັດປ້ອງກັນຄວາມສະຫງົບລະຫວ່າງອົງການປົກຄອງແຂວງໄຊສົມບູນກັບສອງບໍລິສັດດັ່ງກ່າວໄດ້ ຈັດຂຶ້ນໃນວັນທີ 18 ມິຖຸນານີ້ທີ່ສະໂມສອນເມືອງອະນຸວົງ ແຂວງໄຊສົມບູນ ໂດຍການເຂົ້າຮ່ວມຂອງ ທ່ານ ພົຕ ຄຳລຽງ ອຸທໄກສອນ ເຈົ້າແຂວງໄຊສົມບູນ, ມີທ່ານ ພົຕ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ແລະພາກສ່ວນກ່ຽວຂ້ອງຂອງແຂວງ ແລະບໍລິສັດເຂົ້າຮ່ວມ.

ທ່ານ ສົມບູນ ສອນລິດທິເດດ ຫົວໜ້າຫ້ອງວ່າການແຂວງໄຊສົມບູນໄດ້ຜ່ານຂໍ້ຕົກລົງຂອງທ່ານເຈົ້າແຂວງວ່າດ້ວຍການອະນຸມັດໃຫ້ເຊັນບົດບັນທຶກຄວາມເຂົ້າໃຈ MOU ໃນຄັ້ງນີ້ຊຶ່ງໃນບົດບັນທຶກຄວາມເຂົ້າໃຈ MOU ຂອງທັງສອງບໍລິສັດແມ່ນປະກອມມີທັງໝົດ 20 ມາດຕາ, ໄລຍະເວລາຂອງບົດບັນທຶກແມ່ນ 24 ເດືອນ, ວຽກຂອງໂຄງການຕ້ອງໄດ້ປະຕິບັດຄື: ຊອກຄົ້ນ-ສຳຫຼວດແຮ່ທາດຕ່າງໆ ໃນພື້ນທີ່ໄດ້ຮັບອະນຸຍາດ, ສ້າງບົດວິພາກເສດຖະກິດ-ເຕັກນິກ ແລະບົດສຶກສາຜົນກະທົບຕໍ່ສິ່ງແວດ ລ້ອມສັງຄົມ ແລະທຳມະຊາດ.

   ໃນນີ້ບໍລິສັດ CK (ຊີເຄ) ການຄ້າຂາອອກ-ຂາເຂົ້າ ຈຳກັດຜູ້ດຽວຢູ່ເມືອງທ່າໂທມ ໃນເນື້ອທີ 108,88 ກິໂລຕາແມັດ, ບໍລິສັດຕ້ອງວາງເງິນຄໍ້າປະກັນໂຄງການ 1 ແສນໂດລາສະຫະລັດ, ປະກອບສ່ວນເງິນຊຸກຍູ້ແຂວງ 10 ພັນໂດລາສະຫະລັດ, ທຶນພັດທະນາສັງຄົມ 10 ພັນໂດລາສະຫະລັດ, ທຶນພັດທະນາທ້ອງຖິ່ນໃຫ້ເມືອງທ່າໂທມ ຈຳນວນ 15 ພັນ ໂດລາສະຫະລັດຕໍ່ປີ, ທຶນຝຶກອົບຮົມວິຊາການໃຫ້ແຂວງ, ເມືອງ ແລະບ້ານຕັ້ງຢູ່ຈຳນວນ 3 ພັນໂດລາສະຫະລັດຕໍ່ປີ, ທຶນຕິດຕາມກວດກາ MOU 10 ພັນໂດລາສະຫະລັດ, ທຶນຕິດຕາມວິຊາການທາງດ້ານວິຊາການ 50 ພັນໂດລາສະຫະລັດ, ທຶນຕິດຕາມກວດກາແຮ່ທາດ ຈຳນວນ 3 ພັນໂດລາສະຫະ ລັດ, ທຶນຕິດຕາມຄວາມປອດໄພການນຳໃຊ້ແຮງງານ 2 ພັນໂດລາ ແລະທຶນຕິດຕາມຄວາມສະຫງົບໃນໂຄງການ 2 ພັນໂດລາຕໍ່ປີ, ພາຍຫຼັງຂຸດຄົ້ນແມ່ນໃຫ້ແຂວງໄດ້ເງິນປັນຜົນ 10% ຂອງກຳໄລ.

   ສຳລັບຂອງບໍລິສັດ ໄທຢຸ້ຍ (ລາວ) ພັດທະນາບໍ່ແຮ່ ຈຳກັດຜູ້ດຽວ ຢູ່ເມືອງລ້ອງແຈ້ງ ມີຈຳນວນ 2 ເຂດ ຫຼື 2 ໂຄງການຄື: ຢູ່ເຂດບ້ານນໍ້າຊານໃນເນື້ອ ທີ່ 16,72 ກິໂລຕາແມັດ, ຢູ່ເຂດບ້ານນໍ້າຊານ ໃນເນື້ອທີ່ 64,64 ກິໂລຕາແມັດ ໃນນີ້ບໍລິສັດຕ້ອງໄດ້ວາງເງິນຄໍ້າປະກັນໂຄງການ 100.001 ແສນໂດລາສະຫະລັດ ພ້ອມທັງປະຕິບັດທະຕ່າງໆໃນຈຳນວນ 8 ກອງທຶນໃຫ້ແຂວງ ແລະເມືອງ ຈຳນວນ 1,2 ແສນໂດລາຕໍ່ປີ, ພາຍຫຼັງໂຄງການໄດ້ຮັບການຂຸດຄົ້ນແລ້ວແຮ່ເຫຼັກບໍລິສັດເຫັນດີຈ່າຍໃຫ້ ແຂວງໃນຈຳນວນ 1 ຫາ 1,5 ໂດລາຕໍ່ໂຕນ, ແຮ່ຄຳ ແລະແຮ່ທອງແມ່ນແບ່ງປັນໃຫ້ແຂວງ ຈຳນວນ 10% ຂອງກຳໄລນອກຈາກນີ້ບໍລິສັດຍັງຈະຊ່ວຍໃນການພັດທະ ນາດ້ານຕ່າງໆຂອງແຂວງ ແລະເມືອງຕາມຄວາມເໝາະສົມ ແລະຈະສ້າງໂຮງແຮມຢູ່ແຂວງໄຊສົມບູນຕື່ມອີກ.

   ໃນໄລຍະຜ່ານມາທັງສອງດັ່ງກ່າວແມ່ນໄດ້ມອບລົດຣີໂວ ເກຍກະປຸກ ໃຫ້ແກ່ ແຂວງໄຊສົມບູນ ບໍລິສັດລະ 2 ຄັນ ໃຫ້ແກ່ເພື່ອນຳໃຊ້ເຂົ້າໃນການເຄື່ອນໄຫວວຽກຕ່າງໆຂອງແຂວງ.

ຂ່າວ: ພຸດທະສອນ ເວດສະວົງ

แชร์