ທຫລ ປັບປຸງການຈັດຕັ້ງ

  ໃນທ້າຍອາທິດແລ້ວນີ້,ທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງພິທີປະກາດການຈັດຕັ້ງຢູ່ບັນດາກົມ/ທຽບເທົ່າກົມພາຍໃນຂອງ ທຫລ ແລະໄດ້ຍົກຍ້າຍ,ແຕ່ງ ຕັ້ງພະນັກງານຂັ້ນກົມຈໍານວນໜຶ່ງໂດຍການໃຫ້ກຽດເຂົ້າຮ່ວມຂອງທ່ານ ສອນໄຊ ສິດພະໄຊ ຜູ້ວ່າການ ທຫລ; ພ້ອມນີ້ຍັງມີບັນດາຄະນະນໍາ, ຄະນະກົມ ແລະ ພາກ ສ່ວນກ່ຽວຂ້ອງເຂົ້າຮ່ວມ.

   ການແຕ່ງຕັ້ງ ແລະຍົກຍ້າຍໃນຄັ້ງນີ້ແມ່ນໄດ້ອະນຸມັດໃຫ້ທ່ານ ຄໍາຊ່ຽນ ມິ່ງບຸບຜາ ວ່າການຫົວໜ້າສາຂາ ທຫລ ພາກເໜືອແຂວງຫຼວງພະບາງພັກວຽກລໍຮັບນະໂຍ ບາຍອຸດໜູນບໍານານ; ຍົກຍ້າຍ ແລະແຕ່ງຕັ້ງທ່ານ ນາງ ໂພທິຈັນ ທໍາມະເທວາ ວ່າການຫົວໜ້າກົມຄຸ້ມຄອງທະນາຄານທຸລະກິດເປັນຫົວໜ້າສາຂາ ທຫລ ພາກເໜືອ ແຂວງຫຼວງພະບາງ; ຍົກຍ້າຍ ແລະ ແຕ່ງຕັ້ງ ທ່ານ ອາລຸນ ບຸນຍົງ ຫົວໜ້າກົມຄຸ້ມຄອງສະຖາບັນການເງິນເປັນຫົວໜ້າກົມຄຸ້ມຄອງທະນາຄານທຸລະກິດ; ແຕ່ງຕັ້ງທ່ານ ພູຂົງ ຈັນທະຈັກ ຜູ້ອຳນວຍກາທະນາຄານການຄ້າຕ່າງປະເທດລາວມະຫາຊົນ (ທຄຕລ) ຜູ້ເກົ່າມາເປັນຫົວໜ້າກົມຄຸ້ມຄອງສະຖາບັນການເງິນ; ຍົກຍ້າຍທ່ານ ຄໍາພຸດ ສິດທິລາດ ຫົວໜ້າກົມນະໂຍບາຍເງິນຕາເປັນຜູ້ອຳນວຍການ ທຄຕລ ຜູ້ໃໝ່;ຍົກຍ້າຍ ແລະແຕ່ງຕັ້ງທ່ານ ນາງ ຂັນແກ້ວ ຫຼ້າມະນີເງົາ ຫົວໜ້າກົມບັນຊີ ແລະການເງິນເປັນຫົວໜ້າກົມນະໂຍບາຍເງິນຕາ; ຍົກຍ້າຍ ແລະແຕ່ງຕັ້ງທ່ານ ນາງ ນະຄອນສີ ມະໂນທັມ ຮອງຫົວໜ້າກົມນະໂຍບາຍເງິນຕາເປັນວ່າການຫົວໜ້າກົມບັນ ຊີ ແລະການເງິນ; ແຕ່ງຕັ້ງທ່ານ ບຸນທະວີ ສຸກດາວົງ ວ່າການຫົວໜ້າກົມພິມຈໍາໜ່າຍເປັນຫົວໜ້າກົມພິມຈໍາໜ່າຍ;ຍົກຍ້າຍ ແລະແຕ່ງຕັ້ງທ່ານ ສົມເພັດ ວົງຄໍາຈັນ ຮອງຫົວໜ້າກົມບໍລິການທະນາຄານເປັນຮອງຫົວໜ້າສູນບໍລິການເກັບຊື້ໜີ້ ແລະຮັບຝາກເກັບໜີ້; ຊັບຊ້ອນ ແລະແຕ່ງຕັ້ງທ່ານ ພຸດສາລາ ອົມດາລາ ຍົກຍ້າຍມາຈາກທະນາຄານພັດທະນາລາວເປັນຮອງຫົວໜ້າສະຖາບັນການທະນາຄານ, ແຕ່ງຕັ້ງທ່ານ ນາງ ເພັດສະໝອນ ແສງຈັນ ຫົວໜ້າພະແນກນະໂຍບາຍເງິນຕາ ແລະອັດຕາແລກປ່ຽນ, ກົມນະໂຍບາຍເງິນຕາເປັນຮອງຫົວໜ້າກົມນະໂຍບາຍເງິນຕາ, ແຕ່ງຕັ້ງທ່ານ ໂພຕະມີ ພຸດທະວົງ ວ່າການຫົວໜ້າສາຂາເປັນຫົວໜ້າສາຂາ ທຫລ ພາກເໜືອແຂວງອຸດົມໄຊ.

   ໃນໂອກາດດັ່ງກ່າວ, ທ່ານ ສອນໄຊ ສິດພະໄຊ ໄດ້ກ່າວໂອ້ລົມວ່າ: ການແຕ່ງຕັ້ງ ແລະຍົກຍ້າຍໃນຄັ້ງນີ້ເປັນໄປຕາມກົດເກນພາວະວິໃສ ແລະລະບຽບກົດໝາຍຂອງ ສປປ ລາວ ແນໃສ່ເພື່ອພັດທະນາກົງຈັກການຈັດຕັ້ງໃຫ້ມີການຫັນປ່ຽນທີ່ຕັ້ງໜ້າ, ມີບາດກ້າວຂະຫຍາຍຕົວ ແລະສົມຄູ່ກັບການຂະຫຍາຍຕົວຂອງວຽກງານໃນສະພາບ ການໃໝ່ ແລະ ພ້ອມນັ້ນທ່ານໄດ້ຕີລາຄາສູງຕໍ່ໝາກຜົນແຫ່ງການນໍາພາ-ຊີ້ນໍາຂອງບັນດາທ່ານພ້ອມຄະນະນໍາທີ່ສາມາດສ້າງໄດ້ຜົນງານພົ້ນເດັ່ນຫຼາຍດ້ານເປັນການປະກອບສ່ວນເຂົ້າໃນການພັດທະນາຂະແໜງການທະນາຄານໃຫ້ມີຄວາມເຂັ້ມແຂງ ແລະທັນສະໄໝເປັນກ້າວໆ; ພ້ອມກັນນັ້ນ, ທ່ານຍັງໃຫ້ທິດຊີ້ນໍາຕໍ່ຜູ້ທີ່ໄດ້ຮັບໜ້າທີ່ໃໝ່ຈົ່ງພ້ອມກັນສືບຕໍ່ເສີມຂະຫຍາຍໝາກຜົນທີ່ຕັ້ງໜ້າຂອງຄະນະນໍາຊຸດເກົ່າໃຫ້ດີຂຶ້ນເປັນກ້າວໆ; ພ້ອມກັນປັບປຸງ ແລະແກ້ໄຂຂໍ້ຄົງຄ້າງຈໍານວນໜຶ່ງໃຫ້ໝົດໄປ ແລະນໍາພາກົມກອງ/ທະນາຄານຂອງຕົນກ້າວຂຶ້ນຢ່າງບໍ່ຢຸດຢັ້ງ.

ຂ່າວ: ຣັດສະໝີ ດວງສັດຈະ

แชร์