ຄົ້ນພົບຖໍ້າໃໝ່ ໃນຖໍ້າກອງລໍ-ນາຕານ

    ວັນທີ 11 ມິຖຸນາ 2021 ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງຄຳມ່ວນ ພ້ອມດ້ວຍຄະນະ ແລະອຳນາດການປົກຄອງບ້ານກອງລໍໄດ້ເຂົ້າຕິດຕາມ, ກວດກາຖໍ້າທີ່ຖືກຄົ້ນພົບໃໝ່ທີ່ມີຄວາມສວຍສົດງົດງາມບໍ່ແພ້ຖໍ້າອື່ນໆ ທີ່ເຄີຍໄດ້ຄົ້ນພົບມາກ່ອນ.

  ຖໍ້າດັ່ງກ່າວແມ່ນຕັ້ງຢູ່ທາງດ້ານໃນຂອງຖໍ້າກອງລໍ-ນາຕານ ເມືອງຄູນຄຳ ແຂວງຄຳມ່ວນ ໃຊ້ເວລາຂີ່ເຮືອເຂົ້າໄປປະມານ 10 ນາທີ ຢູ່ພາຍໃນຂອງຖໍ້າແມ່ນປະກອບໄປດ້ວຍຫີນງອກ, ຫີນຍ້ອນ, ເປັນຮູບຊົງທີ່ມີຄວາມແຕກຕ່າງກັນໄປບາງບ່ອນກໍ່ມີຮູບຊົງຄ້າຍຄືກັນກັບໂຕສັດ, ບາງບ່ອນກໍ່ຄ້າຍຄືກັບດອກໄມ້ ແລະບາງບ່ອນກໍ່ຈະມີຫີນເປັນຮູບມົນກົມຄ້າຍຄືກັບໄຂ່ເມື່ອເຮົາເຍືອງໄຟສ່ອງໃສ່ຈະມີແສງເຫຼື້ອມວິບວັບເງົາງາມ ແລະພາຍໃນຖໍ້າຍັງມີໂຄງກະດູກສັດທີ່ຄ້າຍຄືກັບໂຄງກະດູກງູຍັງຫຼົງເຫຼືອໃຫ້ເຫັນຢູ່.ເຖິງຢ່າງໃດກໍ່ຕາມຖໍ້າດັ່ງກ່າວແມ່ນຖໍ້າທີ່ຄົ້ນພົບໃໝ່ ແລະປະຈຸບັນຍັງຢູ່ໃນຂັ້ນຕອນການສຶກສາສຳຫຼວດເພື່ອຈະພັດທະນາໃຫ້ກາຍເປັນແຫຼ່ງທ່ອງທ່ຽວໃໝ່ຄູ່ຂະໜານກັບຖໍ້າກອງລໍ-ນາຕານ ແລະຍັງບໍ່ອະນຸຍາດໃຫ້ນັກທ່ອງທ່ຽວເຂົ້າທ່ຽວຊົມໄດ້.

แชร์