ສມກຈ ຫັນຝຶກອົບຮົມຜ່ານລະບົບອອນລາຍ

   ສະມາຄົມການເງິນຈຸລະພາກ (ສມກຈ) ໄດ້ຫັນການຝຶກອົບຮົມແບບຢູ່ໃນຫ້ອງຮຽນທີ່ມີຄົນໜາແໜ້ນມາເປັນການຝຶກຜ່ານລະບົບອອນລາຍຫຼາຍຂຶ້ນທັງນີ້ກໍ່ເພື່ອຈັດຕັ້ງປະຕິບັດຕາມທິດກະທັດຮັດ, ວ່ອງໄວ, ປະຢັດເວລາ ແລະຄ່າໃຊ້ຈ່າຍຕ່າງໆ ລວມທັງເປັນການປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂ-ປ້ອງກັນການແຜ່ລະບາດຂອງພະຍາດໂຄວິດ-19 ແລະ ໄດ້ສໍາເລັດການຝຶກອົບຮົມໃນວັນທີ 17 ມິຖຸນາ 2021 ຊຶ່ງດໍາເນີນມາເປັນເວລາ 3 ວັນ ພາຍໃຕ້ຫົວຂໍ້: “ການພັດທະນາພາວະຜູ້ນຳ” ຜ່ານລະບົບອອນລາຍໃຫ້ແກ່ສະມາຊິກ ແລະເພີ່ມທະວີຄວາມຮູ້ຄວາມສາມາດໃຫ້ແກ່ຜູ້ຄະນະສະພາບໍລິຫານ, ຄະນະບໍລິຫານ ແລະພະນັກງານຂອງບັນດາສະຖາບັນການເງິນຈຸລະພາກໃນຂອບເຂດທົ່ວປະເທດ. 

   ການຝຶກອົບຮົມຄັ້ງນີ້, ກໍ່ຢູ່ໃນຂະນະນີ້ທີ່ປະເທດພວກເຮົາຍັງມີການລະບາດຂອງພະຍາດໂຄວິດ-19 ຈຶ່ງເຮັດໃຫ້ ສມກຈ ໄດ້ປ່ຽນຮູບແບບການຈັດຝຶກອົບຮົມມາເປັນລະບົບອອນລາຍເພື່ອປັບຕົວໃຫ້ທັນສະພາບການດໍາລົງຊີວິດແບບໃໝ່ແກ່ບັນດາສະມາຊິກ ສມກຈ ສືບຕໍ່ໃນການສ້າງຄວາມຄວາມສາມາດໃຫ້ສະມາຊິກ,ເພີ່ມທະວີຄວາມຮູ້ຄວາມສາມາດແກ່ຜູ້ຄະນະສະພາບໍລິຫານ, ຄະນະບໍລິຫານ ແລະພະນັກງານຂອງບັນດາສະຖາບັນການເງິນຈຸລະພາກເພື່ອສືບຕໍ່ບໍລິການລູກຄ້າໃຫ້ທັນເວລາ ແລະໃຫ້ແທດເໝາະກັບຄວາມຕ້ອງການຂອງເຂົາເຈົ້າ ແລະ ເພື່ອເປັນການຊ່ວຍເຫຼືອທາງດ້ານສັງຄົມຊຶ່ງນັກວິທະຍາກອນມືອາຊີບໄດ້ນໍາສະເໜີກ່ຽວກັບວຽກງານຕ່າງໆ ທີ່ຕິດ ພັນກັບການພັດທະນາພາວະຜູ້ນຳໃນການບໍລິຫານວຽກງານຂອງສະຖາບັນການເງິນຈຸລະພາກ ແລະວຽກອື່ນໆທີ່ກ່ຽວຂ້ອງອັນໄດ້ເຮັດໃຫ້ນັກຝຶກອົບຮົມທຸກຄົນກໍາໄດ້ແໜ້ນບົດຮຽນ ແລະຄວາມຮູ້ທີ່ເປັນພື້ນຖານໃຫ້ແກ່ການຈັດຕັ້ງປະຕິບັດວຽກງານຂອງສະຖາບັນການເງິນຂອງຕົນໃນຕໍ່ໜ້າ. 

   ນອກຈາກການຝຶກອົບຮົມໃນຫົວຂໍ້ການພັດທະນາພາວະຜູ້ນຳນີ້ແລ້ວໃນຕໍ່ໜ້າຍັງຈະສືບຕໍ່ມີການຝຶກອົບຮົມໃນ 5 ຫົວຂໍ້ຄື: ການບໍລິຫານສິນເຊື່ອ, ຄວາມສ່ຽງ ແລະໜີ້ຊັກຊ້າ; ການບໍລິຫານເວລາ,ຫ້ອງການ ແລະການສື່ສານທີດີ; ພື້ນຖານການບັນຊີ-ການເງິນ ຂອງ ສກຈ/ສສງ; ການຕື່ມແບບຟອມລາຍງານ factsheet ແລະການບໍລິຫານຄວາມສ່ຽງໂດຍຈະນໍາໃຊ້ເວລາຫົວຂໍ້ລະ 3 ວັນ ລວມທັງໝົດ 17 ວັນ ຈົນຮອດຕົ້ນເດືອນກັນຍາ 2021 ຈຶ່ງຈະສໍາເລັດ.

ຂ່າວ-ພາບ: ສມກຈ

แชร์