ເກືອບ 100 ຕື້ກີບ ຍອດເສຍຫາຍນໍ້າຖ້ວມໄຊຍະ

   ເລີ່ມແຕ່ວັນທີ 11-14 ມິຖຸນາ 2021 ໄດ້ເກີດມີສະພາບຝົນຕົກໜັກ; ຊຶ່ງເນື່ອງມາຈາກຜົນກະທົບຂອງພາຍຸດິເປຼຊັນ (ພາຍຸໂຄກຸມະ) ແລະລົມມໍລະສຸມຕາເວັນຕົກສຽງໃຕ້ໄດ້ພັດປົກຄຸມ ແຂວງໄຊຍະບູລີ ດ້ວຍກຳລັງແຮງເຮັດໃຫ້ເກີດນໍ້າໄຫຼຊຸ, ດິນຖະລົ່ມ, ນໍ້າຖ້ວມເຮືອນປະຊາຊົນ, ຖ້ວມເນື້ອທີ່ການຜະລິດ, ເສັ້ນທາງຈໍານວນໜຶ່ງຂາດ, ເສົາໄຟຟ້າຫັກໂຄ້ນ, ຈໍານວນ 7 ເມືອງທີ່ ໄດ້ຮັບຜົນກະທົບຄື: ເມືອງໄຊຍະບູລີ, ພຽງ, ຄອບ, ຊຽງຮ່ອນ, ເງິນ, ຫົງສາ ແລະເມືອງໄຊສະຖານ, ໃນນັ້ນຢູ່ເມືອງໄຊຍະບູລີ ໄດ້ຮັບຜົນກະທົບຫຼາຍກວ່າໝູ່, ເຮັດໃຫ້ມີຊັບສິນຂອງລັດ, ຂອງລວມໝູ່ ແລະຂອງພໍ່ແມ່ປະຊາຊົນເສຍຫາຍເປັນຈຳນວນຫຼວງຫຼາຍ.

  ໃນວັນທີ 16 ມິຖຸນາ ປີນີ້ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມ, ຮອງປະທານຜູ້ປະຈໍາການຄະນະກໍາມະການຄຸ້ມ ຄອງໄພພິບັດຂັ້ນສູນກາງພ້ອມຄະນະໄດ້ລົງກວດກາພື້ນທີ່ນໍ້າຖ້ວມຢູ່ເມືອງໄຊຍະບູລີ, ໃຫ້ການຕ້ອນຮັບມີທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍການນໍາຂອງແຂວງ ແລະເມືອງໄຊຍະບູລີ.

   ທ່ານ ເພັດພິໄຊ ສູນວິໄວ ຮອງເຈົ້າ ແຂວງ, ປະທານຄະນະກໍາມະການຄຸ້ມຄອງໄພພິບັດຂັ້ນແຂວງໄດ້ລາຍງານສະພາບຄວາມເສຍຫາຍຂອງໄພນໍ້າຖ້ວມທ່ານໄດ້ກ່າວວ່າ: ການຈັດຕັ້ງປະຕິບັດໃນການແກ້ໄຂຊ່ວຍເຫຼືອສຸກເສີນໄພພິບັດ, ທາງຄະນະນໍາຂອງແຂວງ, ຂອງເມືອງກໍ່ຄືຄະນະກໍາມະການຄຸ້ມຄອງໄພພິບັດຂັ້ນແຂວງໄດ້ສົມທົບກັບກອງກໍາລັງປ້ອງກັນຊາດ, ປ້ອງກັນຄວາມສະຫງົບ ແລະຊາວໜຸ່ມຢູ່ພາຍໃນເມືອງຮ່ວມກັບພະແນກການອ້ອມຂ້າງແຂວງລົງຊ່ວຍເຫຼືອໃນການຕອບໂຕ້ໄພພິບັດໃນເບື້ອງຕົ້ນເຊັ່ນ: ເຄື່ອນຍ້າຍປະຊາຊົນຜູ້ທີ່ຕົກຢູ່ໃນໄພອັນຕະລາຍ ແລະວັດຖຸສິ່ງຂອງທີ່ຈໍາເປັນຈໍານວນໜຶ່ງໄປຢູ່ຈຸດປອດໄພ, ຊຶ່ງມີກໍາລັງພົນຊ່ວຍເຫຼືອທັງໝົດ 1.250 ຄົນ, ມີພາຫະນະຮັບໃຊ້ປະເພດລົດບັນທຸກ ຈໍານວນ 30 ຄັນ, ເຮືອກູ້ໄພ-ເຮືອກູ້ຊີບ-ເຮືອທ້ອງແບນ ຈໍານວນ 7 ລໍາ.

   ໃນນັ້ນການນໍາຂອງແຂວງຫຼວງພະບາງກໍ່ໄດ້ສົ່ງທີມງານຄຸ້ມຄອງໄພພິບັດ ແລະໜ່ວຍກູ້ໄພ, ກໍາລັງກອງບັນຊາການທະຫານເມືອງນານພ້ອມພາຫະນະລົດລາກແກ່ ແລະລົດບັນທຸກມາຊ່ວຍ, ໄດ້ແກ້ໄຂບັນເທົາທຸກເບື້ອງຕົ້ນເປັນປະເພດເຄື່ອງນຸ່ງຫົ່ມ, ເຂົ້າສານ, ອາຫານແຫ້ງ, ນໍ້າດື່ມພ້ອມທັງລະດົມທຶນຈາກທຸກພາກສ່ວນເພື່ອໃຫ້ການຊ່ວຍເຫຼືອໃນເບື້ອງຕົນ, ຜົນເສຍຫາຍຈາກການເອົາຂໍ້ມູນເບື້ອງຕົ້ນລວມມີ 56 ບ້ານ, ມີ 5.248 ຄອບຄົວ, ຈໍານວນພົນ 20.992 ຄົນ, ຍິງ 8.920 ຄົນ (ສະເພາະເມືອງໄຊຍະບູລີໄດ້ຮັບຜົນກະທົບ 39 ບ້ານ), ລວມມູນຄ່າເສຍຫາຍທັງໝົດໃນທົ່ວແຂວງ 94 ຕື້ກີບ.

   ໃນນີ້ມີເຮືອນປະຊາຊົນເປ່ເພເສຍຫາຍ 4.221 ຫຼັງຄາເຮືອນ, ໃນນັ້ນມີເຮືອນປະຊາຊົນ 19 ຫຼັງໄດ້ຖືກນໍ້າພັດໄຫຼໜີ, ໄຟຟ້າໄດ້ຖືກຕັດຂາດ 16 ບ້ານ (ສາມາດແກ້ໄຂໄດ້ແລ້ວ 7 ບ້ານ, ຍັງ 9 ບ້ານແກ້ໄຂບໍ່ທັນສໍາເລັດ), ໝໍ້ນັບໄຟ ຖືກນໍ້າຖ້ວມເສຍຫາຍ 6.050 ໜ່ວຍ (ໃນນີ້ບໍ່ສາມາດໃຊ້ໄດ້ 3.500 ໜ່ວຍ), ເສົາໄຟຟ້າລົ້ມ 7 ຕົ້ນ ແລະຕາຂາຍໄຟຟ້າຖືກຕັດຂາດ 3 ຈຸດ, ສ້ອມແປງຄືນໄດ້ແລ້ວ 1 ຈຸດ, ຍັງ 2 ຈຸດ, ຈັກສູບນໍ້າປະປາຖືກນໍ້າຖ້ວມເປ່ເພເຮັດໃຫ້ທົ່ວ ເມືອງໄຊຍະບູລີ ບໍ່ສາມາດນໍາໃຊ້ນໍ້າ ປະປາໄດ້, ເສັ້ນທາງຖືກຕັດຂາດເສຍຫາຍທັງໝົດ 25 ເສັ້ນ, ຂົວເບຕົງ 5 ແຫ່ງ, ທໍ່ດາໂລ 3 ແຫ່ງ, ຂົວອູ່ເປ່ເພ 1 ແຫ່ງ, ມີພາຫະນະລົດໃຫຍ່ຈົມນໍ້າເປເພ 472 ຄັນ, ລົດຈັກຈົມນໍ້າເປເພ 4.840 ຄັນ, ເຂົ້າສານຖືກນໍ້າຖ້ວມເສຍ 300 ໂຕນ, ໜອງປາ 240 ໜອງ, ສະເພາະນໍ້າຖ້ວມຄັ້ງນີ້ແມ່ນບໍ່ມີຄົນເສຍຊີວິດ.

   ໂອກາດດັ່ງກ່າວທ່ານ ນາງ ໃບຄໍາ ຂັດທິຍະ ກໍ່ໄດ້ໃຫ້ທິດທາງໃນການແກ້ໄຂ ແລະໃຫ້ການຊ່ວຍເຫຼືອປະຊາຊົນໃນເບື້ອງຕົ້ນເພື່ອໃຫ້ແຂວງກໍ່ຄືບັນດາເມືອງທີ່ຖືກຜົນກະທົບຄັ້ງນີ້ໃຫ້ກັບມາສູ່ສະພາບປົກກະຕິ, ຈາກນັ້ນກໍ່ໄດ້ລົງເບິ່ງຕົວຈິງຢູ່ບັນດາບ້ານ ແລະໄດ້ມອບເງິນຈໍານວນໜຶ່ງໃຫ້ແຂວງເພື່ອຊ່ວຍເຫຼືອ ແລະຟື້ນຟູຕໍ່ໄປ.

ຂ່າວ: ອຸ່ນເຮືອນ ໂພທິລັກ 

แชร์