ມອບ-ຮັບ ຫົວໜ້າການເມືອງກອງພົນທີ 5

   ໂດຍປະຕິບັດຕາມຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການນະໂຍບາຍໃຫ້ພະນັກງານພັກການກະກຽມເຂົ້າຮັບບໍານານກະຊວງປ້ອງກັນປະເທດຕົກລົງໃຫ້ທ່ານ ພັນເອກ ບຸນທັນ ມາບຸດສະດີ ຫົວໜ້າກົມການເມືອງກອງພົນທີ 5 ພັກການກະກຽມຮັບບໍານານດັ່ງນັ້ນເພື່ອສຶບຕໍ່ພາລະກິດປົກປັກຮັກສາ ແລະສ້າງສາພັດທະນາປະເທດຊາດກໍ່ຄືວຽກງານໃນສະເພາະໜ້າ ແລະຍາວນານໃນວັນທີ 11 ມິຖຸນາຜ່ານມານີ້ຢູ່ກອງພົນທີ 5 ໄດ້ຈັດພິທີມອບຮັບຫົວໜ້າກົມການເມືອງຜູ້ເກົ່າ ແລະຜູ້ໃໝ່ຂຶ້ນໂດຍມີຄະນະພັກ-ຄະນະນໍາຈາກອົງການກອງພັນໃຫຍ່ 501-502 ພ້ອມດ້ວຍພະແນກການ ແລະພະນັກງານທີ່ກ່ຽວຂ້ອງເຂົ້າຮ່ວມ.

 ໃນໂອກາດດັ່ງກ່າວທ່ານ ພັນໂທ ສຸກສະກອນ ສິນສະໝຸດ ຫົວໜ້າຫ້ອງການກອງພົນກໍ່ໄດ້ຂຶ້ນຜ່ານບົດມອບ-ຮັບ ຊຶ່ງໄດ້ຍົກໃຫ້ເຫັນບັນດາຂົງເຂດວຽກງານການເມືອງໜ້າທີ່ຄວາມຮັບຜິດຊອບໃນແຕ່ລະໄລຍະຜ່ານມາພ້ອມທັງສະແດງຄວາມຂອບອົກຂອບໃຈຕໍ່ຄະນະນໍາຂັ້ນເທິງທີ່ໄດ້ເອົາໃຈໃສ່ຊີ້ນໍາຢ່າງໃກຊິດຕິດແທດເຮັດໃຫ້ຂົງເຂດວຽກ ງານທີ່ໄດ້ຮັບການມອບໝາຍສໍາເລັດໄປດ້ວຍດີ, ນອກນີ້ທ່ານກໍ່ຍັງໄດ້ສະແດງຄວາມຂອບໃຈຄະນະພັກ-ຄະນະບັນຊາບັນດາຄະນະນໍາກອງພົນທີ 5 ທີ່ພ້ອມກັນເອົາໃຈໃສ່ຈັດຕັ້ງປະຕິບັດໜ້າທີ່ວຽກງານທີ່ວາງອອກຢ່າງເຂັ້ມງວດເຮັດໃຫ້ວຽກງານມີຜົນສໍາເລັດສູງ.

 ໃນພິທີດັ່ງກ່າວກໍ່ໄດ້ເຊັນບົດບັນທຶກ ມອບ-ຮັບ ລະຫວ່າງຫົວໜ້າການເມືອງຜູ້ເກົ່າ ແລະຫົວໜ້າການເມືອງຜູ້ໃໝ່ ແລະທ່ານ ພັນເອກ ສີປະເສີດ ເຜີຍຄໍາສິງ ຫົວໜ້າການເມືອງຜູ້ໃໝ່ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຫົວໜ້າຜູ້ເກົ່າທີ່ໄດ້ເຮັດສໍາເລັດໜ້າທີ່ວຽກງານທີ່ທາງການຈັດຕັ້ງຂັ້ນເທິງມອບໝາຍໃຫ້ພ້ອມທັງໃຫ້ຄໍາໝັ້ນສັນ ຍາວ່າຈະສຶບຕໍ່ພາລະກິດປົກປັກຮັກສາ ແລະສ້າງສາພັດທະນາປະເທດຊາດກໍ່ຄືປັບປຸງກໍ່ສ້າງບັນດາກົມກອງຮາກຖານໃຫ້ມີຄວາມໜັກແໜ້ນເຂັ້ມແຂງເຮັດສໍາເລັດໜ້າທີ່ການຈັດຕັ້ງຂັ້ນເທິງມອບໝາຍໃຫ້.

ໂດຍ: ໂພທິລາດ

แชร์