ສມກຈ ເພີ່ມການປະຊາສໍາພັນສູ່ສັງຄົມ

     ສະມາຄົມການເງິນຈຸລະພາກ (ສມກຈ) ໄດ້ຈັດຕັ້ງກອງປະຊຸມທາງອອນລາຍຜ່ານ Zoom ກ່ຽວກັບວຽກງານປະຊາສໍາພັນຂອງ ສມກຈ ທັງນີ້ກໍ່ເພື່ອເປັນການສົ່ງເສີມວຽກງານ ສມກຈ ຮ່ວມກັບອົງການ ADA ອອກສູ່ສາທາລະນະຊຶ່ງຈັດຂຶ້ນໃນທ້າຍເດືອນພຶດສະພາ 2021 ຜ່ານມາໂດຍການໃຫ້ກຽດເຂົ້າຮ່ວມຂອງທ່ານ ນາງ ປະມວນ ເພັດທານີ ຜູ້ອໍານວຍການ ສມກຈ; ພ້ອມນີ້, ຍັງມີທ່ານ ໂຈເຊັບ ອາລາບານ ທີ່ປຶກສາຈາກອົງການ ADA ແລະທ່ານ ປທ. ຣັດສະໝີ ດວງສັດຈະ ທີ່ປຶກສາ ຂ່າວສານ ສມກຈ; ພ້ອມດ້ວຍບັນດາຫົວໜ້າວິຊາການ, ຜູ້ປະສານງານທີມງານແຕ່ລະແຂວງ ແລະບັນດາພະນັກງານປະຈໍາຫ້ອງການ ສມກຈ ເຂົ້າຮ່ວມຈໍານວນໜຶ່ງ.

 ກອງປະຊຸມຄັ້ງນີ້ດໍາເນີນໄປທ່າມກາງການລະບາດຂອງພະຍາດໂຄວິດ-19; ແຕ່ ສມກຈ ໄດ້ສືບຕໍ່ປະຕິບັດຕາມ ຄໍາສັ່ງເລກທີ 15/ນຍ, ລົງວັນທີ 21 ເມສາ 2021 ແລະ ແຈ້ງການອື່ນໆໂດຍໄດ້ຈັດກອງປະຊຸມທາງໄກ ແລະ ມີການປະກອບຄໍາເຫັນຫຼາຍດ້ານທີ່ຕິດພັນກັບການປະຊາສໍາພັນ ສມກຈ ໂດຍສະເພາະການຖອດຖອນບົດຮຽນວຽກງານຜ່ານມາຂອງ ສມກຈ ທີ່ຮ່ວມມືກັບອົງການ ADA ໃນແຜນງານ ລາວ/030 ເພື່ອຜະລິດຂ່າວອອກສູ່ສາທາລະນະໄດ້ຮັບຮູ້ເຖິງຄວາມສໍາຄັນຂອງການເອົາໃຈໃສ່ໃນການປະຕິບັດວຽກງານຮ່ວມລະຫວ່າງ ສມກຈ ແລະ ADA ທີ່ໄດ້ດໍາເນີນສອດຄ່ອງກັບແຜນພັດທະນາເສດຖະກິດແຫ່ງຊາດໂດຍໄດ້ຮັບການມອບ ໝາຍໂດຍກົງຈາກທະນາຄານແຫ່ງ ສປປ ລາວ ຊຶ່ງ ສມກຈ ມີພາລະກິດສໍາຄັນໃນການສ້າງຄວາມອາດສາມາດໃນການເຂົ້າເຖິງການບໍລິການດ້ານການເງິນໃນເຂດຊົນນະບົດຂອງ ສປປ ລາວ.

 ກອງປະຊຸມຄັ້ງນີ້, ສມກຈ ຍັງມີການແບ່ງປັນຂໍ້ມູນທີ່ເປັນປະໂຫຍດໃຫ້ແກ່ວຽກງານຂ່າວສານສາມາດຮັບຮູ້ເຖິງພາບລວມກ່ຽວກັບວຽກງານຫຼັກໆ ແລະຜົນງານເດັ່ນໆທີ່ ສມກຈ ໄດ້ປະຕິບັດໃນແຕ່ລະປີຜ່ານມາຈົນເຖິງໜ້າວຽກປະຈຸບັນທີ່ກໍາລັງສືບຕໍ່ໃຫ້ຄວາມສໍາຄັນແກ່ວຽກງານການເງິນຊົນນະບົດ, ທ່ານ ໂຈເຊັບ ອາລາບານ ມີຄໍາເຫັນວ່າ: ກ່ຽວກັບຄວາມເປັນໄປໄດ້ໃນການລາຍງານຂ່າວຊຶ່ຈະອະທິບາຍໃຫ້ຮູ້ໂດຍສັງເຂບກ່ຽວກັບຈຸດປະສົງຂອງແຜນງານລາວ /030 ທີ່ໄດ້ປະຕິບັດຢູ່ແຂວງບໍ່ແກ້ວ, ແຂວງບໍລິຄໍາໄຊ ແລະແຂວງວຽງຈັນຊຶ່ງມີຄູ່ຮ່ວມງານທັງພາກລັດ ແລະພາກເອກະຊົນທີ່ມີບົດບາດໃນການປະສານງານຂອງແຜນງານ; ພ້ອມນີ້ກໍ່ໄດ້ເນັ້ນເຖິງວຽກງານທີ່ສໍາຄັນທີ່ສຸດກໍ່ຄື: ການຝຶກອົບຮົມເພື່ອສ້າງຂີດຄວາມສາມາດໃຫ້ແກ່ອົງກອນສະໜັບສະໜູນເຄືອຄ່າຍເພື່ອສ້າງເປັນສະຖາບັນການເງິນທີ່ຈະມາເປັນສື່ກາງໃນການຕິດຕາມ ແລະຊຸກຍູ້ກອງທຶນສິນເຊື່ອບ້ານໃນແຕ່ລະເມືອງກໍ່ຄືການກໍ່ສ້າງສະຫະກອນສິນເຊື່ອ ແລະ ເງິນຝາກປະຫຍັດ ແລະ ຫວັງວ່າວຽກງານດັ່ງກ່າວຈະສາມາດສໍາເລັດຕາມເປົ້າໝາຍຂອງແຜນງານທີ່ວາງອອກ.

   ທ່ານ ນາງ ປະມວນ ເພັດທານີ, ໃນຖານະຜູ້ອໍານວຍການ ສມກຈ ໄດ້ເລົ່າເຖິງປະຫວັດແຫ່ງຄວາມເປັນມາຂອງວຽກງານດັ່ງກ່າວໂດຍເປັນບາດກ້າວສໍາຄັນທີ່ເຮັດໃຫ້ ສມກຈ ກາຍເປັນອົງກອນທີ່ມີຄວາມຮູ້ເລິກເຊິ່ງດ້ານການເງິນຊົນນະບົດຊຶ່ງແຕ່ກ່ອນມີຊື່ວ່າ: ກຸ່ມເຮັດວຽກການເງິນຈະລະພາກ ຫຼື “ກຮກຈ” ແລະໄດ້ຮັບການສະໜັບ ສະໜູນຈາກ ADA ໃນປີ 2012 ແລະໃນປີ 2013 ສມກຈໄດ້ມີຄະນະນໍາທີ່ມີປະສົບການສູງ ແລະພະນັກງານທີ່ມີຄວາມຫ້າວຫັນເຮັດໃຫ້ສາມາດປະຕິບັດວຽກງານບັນລຸຕາມເປົ້າໝາຍທີ່ວາງໄວ້ ແລະບັນດາຜົນງານເຫຼົ່ານັ້ນກໍ່ໄດ້ສ້າງຄວາມເຊື່ອໝັ້ນໃຫ້ແກ່ບັນດາຜູ້ໃຫ້ທຶນທັງພາຍໃນ ແລະຕ່າງປະເທດ,ແຕ່ຍ້ອນຜົນງານເຫຼົ່ານັ້ນພັດບໍ່ທັນໄດ້ນໍາສະເໜີຕໍ່ສາທາລະນະຮັບຮູ້ຢ່າງຈິງຈັງຈຶ່ງເຮັດໃຫ້ພາບພົດຂອງ ສມກຈ ບໍ່ຮັບຮູ້ຢ່າງກ້ວາງຂວາງໃນທົ່ວສັງຄົມ.

 ເພື່ອໃຫ້ກອງປະຊຸມມີຄວາມໝາຍ ແລະຄວາມສໍາຄັນຍິ່ງຂຶ້ນ;ຫ້ອງການ ສມກຈ ຈຶ່ງໄດ້ຊຸກຍູ້ໃຫ້ພະນັກງານທີ່ເຮັດວຽກຕົວຈິງຢູ່ທ້ອງຖິ່ນ-ຮາກຖານ (ພາກສະໜາມ) ແລະຜູ້ປະສານງານໃນແຕ່ລະແຂວງຕິດຕາມ ແລະບັນທຶກເປັນລາຍລັກອັກສອນໜ້າວຽກທີ່ປະຕິບັດ, ສິ່ງທ້າທາຍ ແລະໝາກຜົນຂອງວຽກງານທີ່ຕົນປະຕິບັດເພື່ອເປັນຂໍ້ມູນໃຫ້ແກ່ທ່ານ ຣັດສະໝີ ດວງສັດຈະ ນໍາມາຜະລິດຂ່າວໃຫ້ຖືກຕ້ອງ, ຊັດເຈນ, ເປັນຈິງ ແລະວ່ອງໄວໃນການປະຕິບັດວຽກງານຂ່າວສານຂອງ ສມກຈ ໃນຕໍ່ໜ້າ.

แชร์