ປະຊາຊົນບ້ານໃຫຍ່ນໍ້າປຸກໄຖນາພົບພຣະພຸດທະຮູບ 2 ອົງ

   ໃນເມື່ອບໍ່ດົນຜ່ານມານີ້ປະຊາຊົນບ້ານໃຫຍ່ນໍ້າປຸກ (ຄຸ້ມໃຕ້) ເມືອງຫ້ວຍຊາຍ ແຂວງບໍ່ແກ້ວ ໄດ້ໄຖນາພົບເຫັນພຣະພຸດທະຮູບ 2 ຊຶ່ງເປັນພຣະພູດທະຮູບປາງຊະນະມານເຮັດດ້ວຍທອງປະສົມ ແລະທອງເຫຼືອງ.

    ພຣະພຸດທະຮູບ 2 ອົງນີ້ ໄດ້ພົບເຫັນຢູ່ທົ່ງນາຂອງທ້າວ ຊາຍທອງ ພອນຈະເລີນ ອາຍຸ 34 ປີປະຊາ ຊົນບ້ານໃຫຍ່ນໍ້າປຸກ (ຄຸ້ມໃຕ້) ເມືອງຫ້ວຍຊາຍແຂວງບໍ່ແກ້ວ ໃນຂະນະໄຖນາໂດຍໃນຕອນແລງ ເວລາ 17:00 ໂມງຂອງວັນທີ 12 ມິຖຸນາ 2021 ໄດ້ໄຖຖືກຖ້ວຍດິນ ແລະສັງເກດເຫັນຈອມເກດພະພຸດທະຮູບຈຶ່ງໄດ້ຂຸດຂຶ້ນມາ ທັງໄດ້ແຈ້ງຕໍ່ອົງການປົກຄອງບ້ານເພື່ອສະເໜີໃຫ້ພາກສ່ວນກ່ຽວຂ້ອງຮັບຊາບ ແລະ ພາຍຫຼັງພະນັກງານວິຊາການກວດກາພົບວ່າ: ເປັນພຣະພູດທະຮູບປາງຊະນະມານເຮັດດ້ວຍທອງປະສົມຊຶ່ງພຣະພຸດທະຮູບປາງຊະນະມານເຮັດດ້ວຍທອງປະສົມສູງ 20,2 ຊັງຕີແມັດ,ອົງພຣະສູງ 19,5 ຊັງຕີແມັດ, ໜ້າຕັກກວ້າງ 12 ຊັງຕີ ແມັດ ແລະໜັກ 1,7ກິໂລ. ຂະນະທີ່ພຣະພຸດທະຮູບປາງຊະນະມານເຮັດດ້ວຍທອງເຫຼືອງ ສູງ 21 ຊັງຕີແມັດ, ອົງພຣະ ສູງ 17 ຊັງຕີແມັດ, ໜ້າຕັກກວ້າງ 11,5 ຊັງຕີແມັດ ແລະໜັກ 1,2 ກິໂລ.

  ພະນັກງານວິຊາການກອງພິພິທະພັນພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງໄດ້ຂຶ້ນທະບຽນພຣະພຸດທະຮູບ 2 ອົງໄວ້ເປັນຊັບສົມບັດຂອງຊາດກໍ່ຄືຂອງພຸດທະສາສະນິກະຊົນທົ່ວແຂວງ, ຂະນະທີ່ອົງການປົກຄອງບ້ານໃຫຍ່ນໍ້າປຸກເຫັນດີນໍາມາປະດິດສະຖານຢູ່ວັດສີດອນມູນສາສະດາຣາມເພື່ອສັກກາລະບູຊາຕໍ່ໄປ. 

แชร์