ຍົມມະລາດ ສ້າງຕັ້ງກຸ່ມໂຮງສີເຂົ້າເປັນສິນຄ້າ

  ໃນວັນທີ 14 ມິຖຸນາ 2021 ທີ່ຫ້ອງປະຊຸມສຳນັກງານ ເມືອງຍົມມະລາດ ໄດ້ເປີດກອງປະຊຸມປຶກສາຫາລື ແລະສ້າງຕັ້ງກຸ່ມໂຮງສີເຂົ້າພາຍໃນເມືອງຂຶ້ນໂດຍໃຫ້ກຽດເປັນປະທານຂອງ ທ່ານ ບຸນທະໃຫວ ໂດໄລສານ ຮອງເຈົ້າເມືອງຍົມມະລາດຊຶ່ງມີ ທ່ານ ແພງສະຫວັດ ເລືອງຄຳມາ ຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ທ່ານ ວິເສດ ໂຄດສຸວັນ ຜູ້ປະສານງານໂຄງການຜະລິດກະສິກຳເປັນສິນຄ້າຂັ້ນແຂວງພ້ອມດ້ວຍຜູ້ປະກອບການໂຮງສີເຂົ້າພາຍໃນເມືອງເຂົ້າຮ່ວມ.

   ເພື່ອເປັນການຊຸກຍູ້ສົ່ງເສີມການຜະລິດກະສິກຳປະເພດເຂົ້າເປັນສິນຄ້າ, ເພື່ອພັດທະນາຊຸມຊົນ, ອຳອວຍຄວາມສະດວກ, ສ້າງຄວາມເຂັ້ມແຂງໃຫ້ຜູ້ຜະລິດ ແລະຜູ້ປະກອບການໂຮງສີເຂົ້າໃຫ້ມີຄວາມຍືນຍົງ ແລະ ເຂົ້າເຖິງຕະຫຼາດການຄ້າເຂົ້າສູ່ລະບົບສາກົນ, ເພື່ອຄຸ້ມຄອງທາງດ້ານການເກັບຊື້-ຂາຍເຂົ້າເປັນສິນຄ້າພາຍໃນເມືອງ ແລະສົ່ງອອກໃຫ້ເປັນລະບົບ.

ກອງປະຊຸມດັ່ງກ່າວທ່ານ ຄຳຫວາ ແກ້ວມາລາ ຮອງຫົວໜ້າຫ້ອງການອຸດສາຫະກຳ ແລະການຄ້າເມືອງໄດ້ຂຶ້ນຜ່ານຮ່າງກົດລະບຽບການຄຸ້ມຄອງກຸ່ມ ແລະກົດລະບຽບການເກັບຊື້-ການເຄື່ອນຍ້າຍອອກນອກເມືອງ, ຫຼັງຈາກນັ້ນກອງປະຊຸມຍັງໄດ້ຄົ້ນຄວ້າປຶກສາຫາລືແລກປ່ຽນບົດຮຽນກ່ຽວກັບກົດລະບຽບການຄຸ້ມຄອງກຸ່ມ ແລະກົດລະບຽບການເກັບຊື້-ການເຄື່ອນຍ້າຍອອກນອກເມືອງ ແລະ ໄດ້ທາບທາມຄະນະບໍລິຫານງານກຸ່ມໂຮງສີເຂົ້າພາຍໃນເມືອງເພື່ອຄຸ້ມຄອງກຸ່ມໂຮງສີເຂົ້າ, ລະບຽບການເຄື່ອນໄຫວເກັບຊື້ເຂົ້າເພື່ອເຄື່ອນຍ້າຍຂາຍເປັນສິນຄ້າສົ່ງອອກເພື່ອຮັບປະກັນທາງດ້ານລາຄາຈາກຊາວກະສິກອນໃຫ້ຍືນຍົງຕາມກົນໄກຂອງຕະຫຼາດທັງພາຍໃນ ແລະຕ່າງປະເທດໂດຍອີງໃສ່ໂຄງປະກອບລາຄາເຂົ້າຂອງກະຊວງອຸດສາຫະກຳ ແລະການຄ້າກຳນົດເປັນແຕ່ລະໄລຍະ.

ກອງປະຊຸມຍັງໄດ້ຮັບຟັງການ ໂອ້ລົມຈາກທ່ານ ບຸນທະໃຫວ ໂດ ໄລສານ ຄະນະປະຈຳພັກເມືອງ, ຮອງເຈົ້າເມືອງຍົມມະລາດອີກ ດ້ວຍ.

แชร์