6 ເດືອນຕົ້ນປີ ສຄຄຊ ມີຫຍັງເດັ່ນ?

   ສໍານັກງານຄະນະກໍາມະການຄຸ້ມຄອງຫຼັກຊັບ (ສຄຄຊ) ເປັນເລຂາທິການໃຫ້ ຄຄຊ, ເປັນເສນາທິການໃຫ້ລັດຖະບານກ່ຽວກັບວຽກງານຄຸ້ມຄອງຫຼັກຊັບ ຢູ່ ສປປ ລາວ ແລະໃນໄລຍະ 6 ເດືອນຕົ້ນປີ 2021 ສາມາດຍາດໄດ້ຜົນສໍາເລັດຫຼາຍດ້ານໂດຍສະເພາະໄດ້ເອົາໃຈໃສ່ເຄື່ອນໄຫວວຽກວິຊາສະເພາະຢ່າງຕັ້ງໜ້າ, ເປັນລະບົບ, ມີແບບແຜນການເຮັດວຽກຢ່າງລະອຽດ,ມີການຈັດຕັ້ງຕິດຕາມການເຄື່ອນໄຫວຢ່າງໃກ້ຊິດ ແລະມີການປະເມີນແຕ່ລະໜ້າວຽກເປັນປະຈໍາ; ສາມາດຈັດກອງປະຊຸມ ຄຄຊ 1 ຄັ້ງເພື່ອພິຈາລະນາບັນຫາສໍາຄັນຈໍານວນໜຶ່ງຕິດພັນກັບການຂ້າມຜ່ານສູ່ມາດຕະຖານສາກົນການລາຍງານການເງິນສຳລັບຂະແໜງການຫຼັກຊັບ (IFRS Road Map) ພ້ອມລາຍງານກ່ຽວກັບການເຄື່ອນໄຫວວຽກງານປະຈຳປີ 2020 ແລະທິດທາງແຜນການປີ 2021 ຂອງ ສຄຄຊ ແລະຕະຫຼາດຫຼັກຊັບລາວ (ຕລຊລ).

   ທ່ານນາງ ສາຍສະໝອນ ຈັນທະຈັກ ຄະນະພັກທະນາຄານ ແຫ່ງ ສປປ ລາວ, ຫົວໜ້າ ສຄຄຊ ໄດ້ແຈ້ງໃຫ້ຮູ້ວ່າ: ສຄຄຊ ໄດ້ສຳເລັດການສ້າງ ແລະປັບປຸງນິຕິກຳ ໃຕ້ກົດໝາຍວ່າດ້ວຍຫຼັກຊັບ ຈຳນວນ 4 ສະບັບຄື: ດໍາລັດວ່າດ້ວຍການຈັດຕັ້ງແລະການເຄື່ອນໄຫວຂອງ ຄຄຊ (ປັບປຸງ); ແຈ້ງການກ່ຽວກັບການເປັນທະນາຄານ ຕົວແທນເພື່ອການຊໍາລະໃນວຽກງານຫຼັກຊັບ; ແຈ້ງການເລື່ອງການປ່ຽນແປງມູນຄ່າກຳນົດຮຸ້ນຂອງບໍລິສັດຈົດທະບຽນ. ນອກນີ້ໄດ້ອອກແຈ້ງການລາຍຊື່ບໍລິສັດທີ່ຮັບອະນຸຍາດໃຫ້ດໍາເນີນທຸລະກິດດ້ານຫຼັກຊັບ ແລະອອກຈໍາໜ່າຍຫຼັກຊັບເພື່ອລະດົມທຶນຈາກມວນຊົນ ແລະຈົດທະບຽນໃນ ຕລຊລ ແລະອື່ນໆ; ເອົາໃຈໃສ່ຕິດຕາມການ ເຄື່ອນໄຫວຂອງບັນດາສະຖາບັນສື່ກາງດ້ານຫຼັກຊັບເປັນປົກກະຕິເປັນຕົ້ນດ້ານໂຄງປະກອບການຈັດຕັ້ງ, ລະບຽບການພາຍໃນ, ຄວາມພຽງພໍຂອງທຶນ ແລະອື່ນໆ ດ້ວຍການກວດກາທາງເອກະສານ. ຂະນະດຽວກັນ, ກໍ່ສະເໜີໄປຍັງອົງການຂັ້ນເທິງ ກ່ຽວກັບການຄຸ້ມຄອງບໍລິສັດປະເມີນມູນຄ່າຊັບສິນຢູ່ ສປປ ລາວ; ກ່ຽວກັບຜູ້ຄຸ້ມຄອງຫຼັກຊັບຂອງບໍລິສັດປະເມີນ,ນັກວິຊາຊີບປະເມີນມູນຄ່າຊັບສິນ ແລະການກະກຽມສ້າງຕັ້ງສະມາຄົມບໍລິສັດປະເມີນມູນຄ່າຊັບສິນ; ຈັດກອງປະຊຸມຮ່ວມກັບບໍລິສັດປະເມີນມູນຄ່າຊັບສິນ 9 ແຫ່ງ ເພື່ອປຶກສາຫາລືກ່ຽວກັບຄວາມພ້ອມ ແລະນິຕິກໍາທີ່ກ່ຽວຂ້ອງກັບການສ້າງຕັ້ງບໍລິສັດປະເມີນມູນຄ່າຊັບສິນ, ຢູ່ ສຄຄຊ ແລະອອກແຈ້ງການເຖິງບັນດາທະນາຄານທຸລະກິດທີ່ສ້າງຕັ້ງຢູ່ ສປປ ລາວ ກ່ຽວກັບການຂໍຮັບຮອງເປັນທະນາຄານຕົວແທນເພື່ອການຊໍາລະໃນວຽກງານຫຼັກຊັບ.

  ສຄຄຊ ໄດ້ເອົາໃຈໃສ່ຄຸ້ມຄອງ ແລະຕິດຕາມການເຄື່ອນໄຫວຂອງບໍລິສັດຈົດທະບຽນຢ່າງໃກ້ຊິດເປັນຕົ້ນການນໍາໃຊ້ທຶນທີ່ລະດົມໄດ້ຈາກການອອກຈໍາໜ່າຍຫຼັກຊັບ,ການເປີດກອງປະຊຸມຜູ້ຖືຮຸ້ນ ແລະ ການຈ່າຍເງິນປັນຜົນເພື່ອຮັບປະກັນສິດ, ຜົນປະໂຫຍດຂອງຜູ້ລົງທຶນ. ອັນພົ້ນເດັ່ນແມ່ນໄດ້ລາຍງານໃຫ້ຜູ້ປະຈໍາການ ຄຄຊ ກ່ຽວກັບການອອກຈໍາໜ່າຍຮຸ້ນກູ້ຂອງອົງການການເງິນສາກົນ (IFC); ຈັດກອງປະຊຸມປຶກສາຫາລືຮ່ວມກັບກົມສ່ວຍສາອາກອນກະຊວງການເງິນກ່ຽວກັບບັນຫາ, ວິທີແກ້ໄຂ ແລະນະໂຍບາຍອາກອນທີ່ຕິດພັນກັບຕະຫຼາດທຶນ; ສໍາເລັດການປະກອບຄໍາເຫັນໃສ່ແຜນຟື້ນຟູກິດຈະການຂອງບໍລິສັດຈົດທະບຽນ 1 ແຫ່ງ; ສໍາເລັດການຕິດຕາມ ການລາຍງານ ແລະ ເປີດເຜີຍຂໍ້ມູນປະຈໍາໄຕມາດ 1 ປີ 2021 ແລະ ປະຈໍາປີ 2020; ສໍາເລັດການເຂົ້າຮ່ວມຕິດຕາມກອງປະຊຸມຜູ້ຖືຮຸ້ນຂອງບໍລິສັດຈົດທະບຽນ ປະຈຳປີ 2020.

 ວຽກງານມາດຕະຖານສາກົນດ້ານການລາຍງານການເງິນ (IFRS); ສຄຄຊ ໄດ້ສະເໜີປະທານ ຄຄຊ ຮັບຮອງເອົາຂໍ້ຕົກລົງວ່າດ້ວຍການຮັບຮອງເອົາແຜນວຽກການຈັດຕັ້ງປະຕິບັດມາດຕະຖານສາກົນດ້ານການລາຍງານການເງິນສໍາລັບຂະແໜງຫຼັກຊັບ; ສໍາເລັດການເຂົ້າຮ່ວມກອງປະຊຸມປຶກສາຫາລືກ່ຽວກັບການຂໍທຶນຊ່ວຍເຫຼືອກັບທະນາຄານໂລກສໍາລັບວຽກງານ IFRS ແລະຮ່ວມ ກັບກົມບັນຊີກະຊວງການເງິນ, ກົມບັນຊີ ແລະການເງິນ ທຫລ ແລະສະພານັກວິຊາຊີບບັນຊີ ແລະນັກກວດສອບລາວຈັດກອງປະຊຸມປຶກສາຫາລືກ່ຽວກັບການສ້າງຫຼັກສູດນັກບັນຊີການເງິນ. ນອກນີ້, ສຄຄຊ ສໍາເລັດການສະເໜີຂໍຄວາມຊ່ວຍເຫຼືອຈາກ IFC ປະຈໍາປີ 2021 ແລະສຳເລັດການຈັດຝຶກອົບຮົມຮ່ວມກັນກ່ຽວກັບວຽກງານການຄຸ້ມຄອງບໍລິຫານ; ອອກແຈ້ງການເຖິງບໍລິສັດຈົດທະບຽນເພື່ອເລີ່ມທົດລອງການປະເມີນການຈັດຕັ້ງປະຕິບັດຄໍາແນະນຳວ່າດ້ວຍການຄຸ້ມຄອງບໍລິຫານສໍາລັບບໍລິສັດຈົດທະບຽນໃນ ຕລຊລ ທີ່ມີຄວາມສະໝັກໃຈພ້ອມທັງສໍາເລັດຕິດຕາມການຈັດຕັ້ງປະຕິບັດການເລີ່ມທົດລອງການປະເມີນດັ່ງກ່າວ ແລະວຽກງານສໍາຄັນອື່ນໆຈໍານວນໜຶ່ງ.

    ສຄຄຊ ເອົາໃຈໃສ່ຕິດຕາມການເຄື່ອນໄຫວການຊື້-ຂາຍໃນ ຕລຊລ ຢ່າງເປັນປົກກະຕິຜ່ານທາງເອກະສານ ແລະ ສະຫຼຸບສັງລວມ ແລະ ວິເຄາະການຊື້-ຂາຍຮຸ້ນໃນ ຕລຊລ ປະຈໍາວັນ, ອາທິດ, ເດືອນ, ໄຕມາດ, ຫົກເດືອນ ແລະປີໃນນີ້, ສໍາເລັດການກວດກາ ຕລຊລ ປະຈຳປີ 2020; ສຳເລັດການປະຊຸມປຶກສາຫາລື ແລະຜ່ານຮ່າງລະບຽບວ່າດ້ວຍການຄຸ້ມຄອງຕະຫຼາດຫຼັກຊັບ (ສະບັບປັບປຸງ); ລາຍງານການປັບປຸງສະພາບໍລິຫານຂອງບໍລິສັດ ຕລຊລ ຈຳກັດ; ສຳເລັດການແບ່ງພາລະບົດບາດໃນ ການຄຸ້ມຄອງເບື້ອງຂອງ ສຄຄຊ ໃຫ້ແກ່ ຕລຊລ; ອອກແຈ້ງການເຖິງບໍລິສັດຫຼັກຊັບ 3 ແຫ່ງ ກ່ຽວກັບການເພີ່ມທະວີການໃຫ້ຄວາມຮູ້ແກ່ພະນັກງານທະນາຄານທຸລະ ກິດກ່ຽວກັບການຂາຍຮຸ້ນ, ພັນທະບັດລັດຖະບານ ແລະວຽກງານອື່ນໆ ທີ່ຕິດພັນກັບວຽກງານຫຼັກຊັບທີ່ເປັນຕົວແທນຂອງຕົນຢ່າງເປັນປົກກະຕິ. 

    ສຄຄຊ ໄດ້ພົວພັນຮ່ວມມືຫຼາຍຮູບແບບໃນເງື່ອນໄຂເຊື່ອມໂຍງເສດຖະກິດສາກົນດ້ວຍການຮ່ວມມືສອງຝ່າຍ, ຫຼາຍຝ່າຍໃນຫຼາຍລະດັບ ແລະ ອົງການຈັດຕັ້ງສາກົນ ເພື່ອຍາດແຍ່ງການຊ່ວຍເຫຼືອທາງດ້ານວິຊາການ, ຖອດຖອນບົດຮຽນ, ກໍ່ສ້າງບຸກຄະລາກອນ ແລະແລກປ່ຽນຂໍ້ມູນຂ່າວສານ. ອັນພົ້ນເດັ່ນແມ່ນຜົນການຮ່ວມມືສອງຝ່າຍກັບ ຄຄຊ ສປ ຈີນ ແລະ ກລຕ ໄທປະຈໍາປີ 2020, ແຜນປີ 2021 ແລະການຮ່ວມມສອງຝ່າຍກັບ ຄຄຊ ສສ ຫວຽດນາມ; ພ້ອມນັ້ນ ຍັງຮ່ວມມືກັບອົງການຄຸ້ມຄອງຫຼັກຊັບປະເທດຕ່າງໆ, ອົງການຈັດຕັ້ງສາກົນຈໍານວນໜຶ່ງໄດ້ດີຕະຫຼອດມາບົນຈິດໃຈປະຕິບັດສອດຄ່ອງກັບແນວທາງການຕ່າງປະເທດຂອງລັດຖະບານເຮົາ. ນອກນີ້, ສຄຄຊ ໄດ້ດໍາເນີນການແກ້ໄຂບັນຫາຕ່າງໆ ຕິດພັນກັບເຕັກນິກໄອທີພາຍໃນຢ່າງເປັນປົກກະຕິພ້ອມທັງດຳເນີນການພັດທະນາລະບົບຕ່າງໆເພື່ອຮອງຮັບວຽກງານຂອງ ສຄຄຊ ໃນຕໍ່ໜ້າໃຫ້ມີຄວາມວ່ອງໄວ ແລະທັນສະໄໝຂຶ້ນເລື້ອຍໆ.

ໂດຍ: ຣັດສະໝີ ດວງສັດຈະ

แชร์