ຜາອຸດົມ ນໍ້າຖ້ວມເສຍຫາຍ 200 ລ້ານກວ່າກີບ

   ຕາມການລາຍງານເບື້ອງຕົ້ນຂອງທ່ານ ຈັນທອນ ພົນທະລາ ເຈົ້າເມືອງໆ ຜາອຸດົມ ແຂວງບໍ່ແກ້ວ ໃຫ້ຮູ້ວ່າ: ພາຍຫຼັງເກີດມີຝົນຕົກໜັກຕໍ່ເນື່ອງກັນເປັນເວລາ 1 ວັນໃນວັນທີ 13 ມິຖຸນາ 2021 ນີ້, ຢູ່ເມືອງຜາອຸດົມ ແຂວງບໍ່ແກ້ວ ໄດ້ມີພາຍຸລົມແຮງ ແລະ ຝົນຕົກໜັກເຮັດໃຫ້ນໍ້າຖ້ວມເຮືອນຂອງພໍ່ແມ່ປະຊາຊົນ, ນໍ້າຖ້ວມເສັ້ນທາງ, ດິນເຈື່ອນຖົມທາງ, ຕົ້ນໄມ້ຫັກທັບຕາຂ່າຍໄຟຟ້າ, ເຊິ່ງສ້າງຜົນເສຍຫາຍໃຫ້ແກ່ວັດຖຸ ແລະຊັບສິນຂອງພໍ່ແມ່ປະຊາຊົນພາຍໃນເມືອງຜາອຸດົມຈໍານວນ 12 ບ້ານ, ໃນນັ້ນມີນໍ້າໄຫຼເຂົ້າຖ້ວມບ້ານເຮືອນ ຈໍານວນ 6 ບ້ານຄື: ບ້ານນາໂຮມ, ບ້ານສົມສະຫວ່າງ, ບ້ານປຸງລາດ, ບ້ານໂຮມສຸກ, ບ້ານວຽງພັດທະນາ ແລະບ້ານ ໃຫຍ່ນໍ້າຍາວ. ມີປະຊາຊົນໄດ້ຮັບຜົນກະທົບໃນເບື້ອງຕົ້ນມີຈໍານວນ 3 ບ້ານຄື: ບ້ານວຽງພັດທະນາ, ບ້ານມົກໂຊະ ແລະບ້ານໂຮມສຸກ ຈໍານວນ 13 ຄອບຄົວ, ມູນຄ່າຄວາມເສຍຫາຍ 200 ກວ່າລ້ານກີບ ຊຶ່ງມີລາຍລະອຽດດັ່ງນີ້: ເຮືອນຂອງປະຊາຊົນນໍ້າພັດໄຫຼນໍ້າຈໍານວນ 6 ຫຼັງ ຄາເຮືອນ, ລົດຈັກ 6 ຄັນ, ເຄື່ອງໃຊ້ໄຟຟ້າ 3 ເຄື່ອງ, ຕູບຕະຫຼາດນັດຢູ່ບ້ານວຽງພັດທະນາ ຈໍານວນ 12 ຫຼັງ, ງົວ 2 ໂຕ, ໝູ 6 ໂຕ ແລະສັດປີກຈໍານວນໜຶ່ງ, ໜອງປາ ແລະເຄື່ອງປູກຂອງຝັງຂອງປະຊາຊົນ. ເສັ້ນທາງ ແລະຂົວເຊາະເຈື່ອນ 8 ຈຸດ, ໄມ້ຫັກທັບຕາຂ່າຍໄຟຟ້າ 1 ຈຸດ, ຫໍພັກນັກຮຽນຈໍານວນ 4 ຫຼັງ ແລະຫໍພັກຄູ-ອາຈານສອນຢູ່ບ້ານກອນຊອດຈໍານວນ 1 ຫຼັງ 6 ຫ້ອງນອນ. 

   ສາເຫດທີ່ພາໃຫ້ເກີດມີນໍ້າຖ້ວມໃນຄັ້ງນີ້ຍ້ອນ: ມີຝົນຕົກໜັກຕະຫຼອດຄືນຕັ້ງແຕ່ 8 ໂມງແລງເຖິງ 9 ໂມງເຊົ້າເຮັດໃຫ້ມີປະລິມານນໍ້າຫຼາຍ, ທໍ່ນ໋ອກ ແລະຂົວຂ້າມນໍ້າຕາມເສັ້ນທາງແຕ່ລະຈຸດມັນນ້ອຍເຮັດໃຫ້ນໍ້າໄຫຼບໍ່ທັນຈິ່ງເຮັດໃຫ້ນໍ້າຍຶ່ງຂຶ້ນຖ້ວມ, ມີຕົ້ນໄມ້, ຂີ້ເຫຍື້ອໄຫຼມາຕັນທໍ່ ແລະຂົວຂ້າງເຮັດໃຫ້ນໍ້າໄຫຼບໍ່ສະດວກຕໍ່ກັບສະພາບດັ່ງກ່າວໄດ້ແຕ່ງຕັ້ງຄະນະຮັບຜິດຊອບລົງຕິດຕາມ, ເຝົ້າລະວັງໃນຈຸດຕ່າງໆທີ່ມີຄວາມສ່ຽງຊ່ວຍເຫຼືອສຸກເສີນຊ່ວຍປະຊາຊົນປະກອບມີ: ຄະນະພັກອໍານາດການປົກຄອງເມືອງ,ຄະພັກຮາກຖານຜູ້ຊີ້ນໍາແຕ່ລະກຸ່ມໄດ້ເປັນເຈົ້າການລົງກວດກາ ແລະປະສານສົມທົບທຸກພາກສ່ວນເພື່ອຊ່ວຍເຫຼືອປະຊາຊົນຢ່າງທັນການ. ໄດ້ນໍາເອົາກໍາລັງກອງບັນຊາການທະຫານເມືອງຈໍານວນ 25 ສະຫາຍ ແລະກອງພັນ 302 ຈໍານວນ 50 ສະຫາຍ, ປະສານສົມທົບລົງຊ່ວຍເຫຼືອປະຊາຊົນໃນຈໍານວນ 4 ຈຸດຄື: ຈຸດບ້ານນາໂຮມ, ບ້ານໂຮມສຸກ, ບ້ານວຽງພັດທະນາ ແລະບ້ານສີບຸນເຮືອງໃນການຊ່ວຍເຫຼືອອຸທົກກະໄພເບື້ອງຕົ້ນເຊັ່ນ: ຍົກຍ້າຍເຄື່ອງຂອງຕ່າງໆຂອງພໍ່ແມ່ປະຊາຊົນໄວ້ບ່ອນທີ່ປອດໄພ. ພ້ອມທັງໂຄສະນາປຸກລະດົມໃຫ້ທຸກຄົນເອົາໃຈໃສ່ຕິດຕາມສະພາບດິນຟ້າອາກາດຢ່າງໃກ້ຊິດໂດຍຈະໄດ້ສືບຕໍ່ຕິດຕາມສະພາບຢູ່ແຕ່ລະຈຸດທີ່ປະສົບໄພນໍ້າຖ້ວມຈົນກວ່າມີທ່າອ່ຽງກັບຄືນເຂົ້າສູ່ສະພາວະປົກກະຕິສໍາລັບມູນຄ່າເສຍຫາຍເພີ່ມເຕີມຈະລາຍງານຕາມຫລັງຕື່ມອີກ.

ໂດຍ: ວໍລະສິດ ພິດສະຫາຍ

แชร์