5ເດືອນ ເມືອງເງິນ ເກັບລາຍຮັບໄດ້ 71%

 ໃນວັນທີ 9 ມິຖຸນາຜ່ານມາທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີພ້ອມຄະນະໄດ້ລົງຊີ້ນຳວຽກງານຮອບດ້ານຢູ່ ເມືອງເງິນ ໂດຍມີທ່ານ ທະວິສັກ ໄຊຍະວົງ ເຈົ້າເມືອງເງິນພ້ອມດ້ວຍການນໍາຂອງເມືອງ ແລະນາຍບ້ານອ້ອມຂ້າງເມືອງເຂົ້າຮ່ວມ.
   ທ່ານ ທະວິສັກ ໄຊຍະວົງ ເຈົ້າເມືອງເງິນໄດ້ລາຍງານວຽກງານຮອບດ້ານທີ່ພົ້ນເດັ່ນວ່າ: ໃນ 5 ເດືອນຜ່ານມາສາມາດເກັບລາຍຮັບເຂົ້າງົບປະມານໄດ້ທັງໝົດ 1,32 ຕື້ກີບ ເທົ່າກັບ 71,17% ຂອງແຜນການປີ ໃນນີ້ລາຍຮັບຈາກສ່ວຍສາອາກອນ 1,26 ຕື້ກີບ ແລະລາຍຮັບຊັບສິນ0,06 ຕຶ້ກີບ; ພ້ອມດຽວກັນນີ້ກໍ່ສາມາດເກັບລາຍຮັບຊ່ວຍແຂວງໄດ້ 2,85 ຕື້ກີບ, ດ້ານລາຍຈ່າຍເງິນບໍລິຫານ ແລະເງິນນະໂຍບາຍອື່ນໆແມ່ນປະຕິບັດໄດ້ 1,03 ຕື້ກີບ, ກະກຽມປູກພືດລະດູຝົນມາຮອດປະຈຸບັນ ການປູກເຂົ້າເນີນສູງສໍາເລັດ 1.020 ເຮັກຕາ ເທົ່າກັບ 60% ຂອງເນື້ອທີ່ແຜນການ, ການປູກພືດເປັນສິນຄ້າສຳເລັດ 37,51%, ການກະກຽມເນື້ອທີ່ເຂົ້ານາປີສໍາເລັດ 60% ແລະປັກດໍາສໍາເລັດແລ້ວ 10%, ໄດ້ຊຸກຍູ້ສົ່ງເສີມການຜະລິດຂອງໂຮງງານອຸດສາຫະກໍາຂະໜາດນ້ອຍ 28 ແຫ່ງມີມູນຄ່າການຜະລິດ ແລະຈໍາໜ່າຍບັນລຸໄດ້ 7,86 ຕື້ກີບ; ອອກໃບຢັ້ງຢືນກວດກາການເຄື່ອນຍ້າຍສິນຄ້າມູນຄ່າ 655 ລ້ານກີບ, ການຈໍລະຈອນສິນຄ້າຜ່ານດ່ານສາກົນນໍ້າເງິນບັນລຸໄດ້ 20,07 ລ້ານໂດລາທຽບໃສ່ໄລຍະດຽວກັນຂອງປີຜ່ານມາ (ຫຼຸດລົງ 3,45 ລ້ານໂດລາ) ເທົ່າກັບ 14,67% ໃນນີ້ມູນຄ່າການ ນໍາເຂົ້າ 19,89 ລ້ານໂດລາ ແລະສົ່ງອອກ 0,18 ລ້ານໂດລາ, ດ້ານພື້ນຖານໂຄງລ່າງ ແລະລະບົບສາລະນຸປະໂພກກໍ່ໄດ້ຮັບການປັບປຸງ ແລະຍົກລະດັບດີຂຶ້ນ.

   ວຽກງານໃນຂົງເຂດວັດທະນະທໍາ-ສັງຄົມ: ພາຍຫຼັງເກີດມີການລະບາດຂອງພະຍາດໂຄວິດ-19 ແມ່ນໄດ້ຊີ້ນໍາປິດການຮຽນ-ການສອນເປັນການຊົ່ວຄາວ ແລະມາ ຮອດປະຈຸບັນໄດ້ເປີດການຮຽນ-ການສອນ ຊັ້ນ ປ5, ມ4 ແລະມ7 ຄືນໃໝ່,ພ້ອມນີ້ກໍ່ໄດ້ກະກຽມຄວາມພ້ອມເພື່ອຈັດການສອບເສັງພາກຮຽນທີ II ສົກຮຽນ 2020-2021, ພ້ອມດຽວກັນກໍ່ໄດ້ເອົາໃຈໃສ່ຈັດຕັ້ງປະຕິບັດບັນດາມາດຕະການສະກັດກັ້ນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຢ່າງເຂັ້ມງວດເປັນຕົ້ນໄດ້ຕັ້ງຈຸດກວດກາ,ກັ່ນກອງຄົນເຂົ້າ-ອອກເມືອງ,ໄດ້ປິດການເຂົ້າ-ອອກບ້ານ, ຜ່ານມາໄດ້ນຳເອົາກຸ່ມສ່ຽງເຂົ້າສູນກັກກັນໄດ້ທັງໝົດ ຈຳນວນ 181 ຄົນ ຍິງ 61 ຄົນ, ເກັບຕົວຢ່າງສົ່ງກວດ 208 ກໍລະນີ, ສັກຢາວັກແຊງໄດ້ 2.425 ໂດສ ເທົ່າກັບ 12,3%.

   ໂອກາດດັ່ງກ່າວທ່ານເຈົ້າແຂວງກໍ່ໄດ້ເນັ້ນໜັກໃຫ້ການນໍາຂອງເມືອງສືບຕໍ່ສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ,ພະນັກງານ,ລັດຖະກອນ ແລະອົງການປົກຄອງບ້ານຕິດພັນກັບການຈັດຕັ້ງເຊື່ອມຊຶມມະຕິ XI ຂອງພັກ, ມະຕິກອງປະຊຸມໃຫຍ່ອົງຄະນະພັກແຂວງ ຄັ້ງທີ VII ຄຽງຄູ່ກັບການຂຶ້ນແຜນກໍານົດຕໍາແໜ່ງງານອົງການປົກຄອງບ້ານ 22 ບ້ານໃນທົ່ວເມືອງ, ສູ້ຊົນເກັບລາຍຮັບເຂົ້າງົບປະມານໃຫ້ໄດ້ຕາມແຜນການ, ຊຸກຍູ້ການປູກພືດລະຝົນໃຫ້ໄດ້ຕາມເນື້ອທີ່ແຜນການທີ່ວາງໄວ້, ເອົາໃຈໃສ່ໃນການຕິດຕາມການກໍ່ສ້າງບ້ານຈັດສັນໃໝ່ບ້ານກິ່ວງິ້ວໃຫ້ສໍາເລັດຕາມສັນຍາທີ່ໄດ້ລະບຸໄວ້, ສືບຕໍ່ປະຕິບັດໃຫ້ເຂັ້ມງວດໃນການປ້ອງກັນ,ຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19, ກວດກາການລັກລອບເຂົ້າເມືອງແບບບໍ່ຖືກຕ້ອງຕາມຊາຍແດນໃຫ້ເປັນປົກກະຕິ, ເຝົ້າລະວັງການລະບາດຂອງພະຍາດໄຂ້ຍຸງລາຍ ແລະເຝົ້າລະວັງ,ຄວບຄຸມການລະບາດຂອງພະຍາດສັດລ້ຽງຢູ່ພາຍໃນເມືອງໂດຍສະເພາະແມ່ນພະຍາດຜີວໜັງງົວ-ຄວາຍ,ເອົາໃຈໃສ່ແກ້ໄຂຕໍ່ບັນຫາປາກົດການຫຍໍ້ທໍ້ຕ່າງໆເປັນຕົ້ນແມ່ນການຄ້າ-ຂາຍ, ການເສບຢາເສບຕິດ ແລະອື່ນໆ. 

แชร์