ຫຼວງພະບາງ ແຕ່ງຕັ້ງຮັກສາການຫົວໜ້າພະແນກພາຍໃນ

   ພິທີມອບ-ຮັບໜ້າທີ່ລະຫວ່າງທ່ານ ສົມພອນ ສີອຸດົມພັນ ຫົວໜ້າພະແນກພາຍໃນແຂວງຫຼວງພະບາງຜູ້ເກົ່າ ແລະທ່ານ ເພັງ ຄໍາມະວົງ ເປັນຮັກສາການຫົວໜ້າພະແນກພາຍໃນແຂວງຫຼວງພະບາງຜູ້ໃໝ່ໄດ້ຈັດຂຶ້ນໃນວັນທີ 11 ມິຖຸນາ 2021 ນີ້ຢູ່ຫ້ອງປະຊຸມພະແນກດັ່ງກ່າວໂດຍການເຂົ້າຮ່ວມຂອງ ທ່ານ ສຸກັນ ບຸນຍົງ ຮອງເລຂາພັກແຂວງປະທານແນວລາວສ້າງຊາດ, ມີຫົວໜ້າພະແນກການອ້ອມຂ້າງແຂວງພ້ອມດ້ວຍພະນັກງານ-ລັດຖະກອນພະແນກພາຍໃນແຂວງເຂົ້າຮ່ວມ.

   ໃນພິທີຕາງໜ້າຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງທ່ານເຈົ້າແຂວງວ່າດ້ວຍການຍົກຍ້າຍບ່ອນປະຈໍາການຂອງພະນັກງານ-ລັດຖະກອນ ເລກທີ 59/ຈຂ.ຫຼບ ລົງວັນທີ 11 ມິຖຸນາ 2021 ເຫັນດີຍົກຍ້າຍທ່ານ ສົມພອນ ສີອຸດົມພັນ ກໍາມະການພັກແຂວງຫົວໜ້າພະແນກພາຍໃນ (ຜູ້ເກົ່າ) ໄປປະຈໍາການຢູ່ສະພາປະຊາຊົນແຂວງຫຼວງພະບາງ ແລະ ຂໍ້ຕົກລົງເລກທີ53/ຈຂ.ຫຼບ ລົງວັນທີ 11 ພຶດສະພາ ເຫັນດີແຕ່ງຕັ້ງທ່ານ ເພັງ ຄໍາມະວົງ ເປັນຮັກສາການຫົວຫນ້າພະແນກພາຍໃນແຂວງຫລວງພະບາງຜູ້ໃໝ່.

  ຈາກນັ້ນກໍໄດ້ມີພິທີເຊັນມອບ-ຮັບໜ້າທີ່ລະຫວ່າງທ່ານ ສົມພອນ ສີອຸດົມພັນ ກໍາມະການພັກແຂວງຫົວໜ້າພະແນກພາຍໃນ (ຜູ້ເກົ່າ)ກັບທ່ານ ເພັງ ຄໍາມະວົງ ເປັນຮັກສາການຫົວໜ້າພະແນກພາຍໃນແຂວງຫຼວງພະບາງຜູ້ໃໝ່ເພື່ອສຶບຕໍ່ຊີ້ນໍາໆພາວຽກງານພາຍໃນແຂວງຫຼວງພະບາງໃຫ້ສໍາເລັດ ແລະ ຕອນທ້າຍພິທີຍັງໄດ້ຮັບຟັງການໂອ້ລົມຈາກທ່ານປະທານຕື່ມອີກ.

ຂ່າວ: ສີສຸວັນ

แชร์