ບົວລະພາ ສົ່ງອອກໄມ້ອັດຊຸດທຳອິດຈາກໂຮງງານໃໝ່ໄປອົດສະຕາລີ

 ທ່ານ ນາງ ສຸໄພວັນ ທ່ຽງຈັນໄຊ ຮອງຜູ້ອໍານວຍການບໍລິສັດບົວລະພາກະສິກໍາປ່າໄມ້ຈໍາກັດໄດ້ກ່າວວ່າ: ບໍລິສັດບົວລະພາໄດ້ສໍາເລັດການສ້າງຕັ້ງໂຮງງານ ແລະທົດລອງການຜະລິດໃນຕົ້ນເດືອນເມສາ 2021 ຊຶ່ງປະຈຸບັນໂຮງງານມີການຜະລິດແລ້ວ 30% ເຊິ່ງໃນວັນທີ 10 ມິຖຸນາ 2021 ບໍລິສັດ ບົວລະພາໄດ້ ສົ່ງອອກໄມ້ອັດຊຸດທໍາອິດທີ່ຜະລິດຈາກໂຮງງານ 180 ກວ່າແມັດກ້ອນ (5ຕູ້ຄອນເທັນເນີ) ມູນຄ່າກວ່າ 80 ພັນໂດລາສະຫະລັດ ໄປຕະຫຼາດອົດສະຕາລີ.

  ທ່ານກ່າວວ່າ: ໂຮງງານໄມ້ອັດແມ່ນຢູ່ເມືອງຫີນເຫີບ ແຂວງວຽງຈັນ ປະຈຸບັນມີພະນັກງານແລ້ວ 200 ກວ່າຄົນ ແລະໃນໄວໆນີ້ຈະຮັບພະນັກງານຕື່ມອີກໃຫ້ໄດ້ທັງ ໝົດ 400 ກວ່າຄົນ ເພື່ອຈະໄດ້ເປີດການຜະລິດເຕັມ 100% ໃນເດືອນສິງຫາ 2021.

    ໂຮງງານໄມ້ອັດຂອງພວກເຮົາຈະຜະລິດໄດ້ 5 ແສນກວ່າແມັດກ້ອນຕໍ່ປີມາຮອດປະຈຸບັນ ບໍລິສັດມີວັດຖຸດິບ 5 ພັນກວ່າເຮັກຕາ ມີພຽງພໍສໍາລັບການຜະລິດໄມ້ອັດຂອງໂຮງງານເພື່ອສົ່ງຂາຍໄປຕະຫຼາດຕ່າງປະເທດນໍາເງິນຕາເຂົ້າມາ; ທີ່ສໍາຄັນແມ່ນການຊອກຫາຕະຫຼາດເພື່ອສົ່ງອອກລວມທັງການແລ່ນເອກະສານເພື່ອໃຫ້ທັນ ລະບົບການສົ່ງອອກໂດຍສະເພາະແມ່ນການຂົນສົ່ງ, ການຈອງທ່າເຮືອ ແລະອື່ນໆ ເປັນບັນຫາສໍາຄັນສໍາລັບບໍລິສັດ. ສ່ວນຕະຫຼາດພາຍໃນມາຮອດປັດຈຸບັນມີບາງບໍລິສັດໄດ້ມາເຊັນ MOU ແລ້ວເພື່ອຈໍາໜ່າຍໃຫ້ບັນດາລູກຄ້າຂອງເຂົາເຈົ້າ ແລະສັງຄົມທົ່ວໄປ.

แชร์